Mapisarema 95 - Shona Bible 1949 revised 2002

Jehovha ngaakudzwe ateererwe navanhu

¹ Uyai, tiimbire Jehovha; Ngatipururudzei dombo rokuponeswa kwedu.

² Ngatisvike pamberi pake tichivonga, Ngatimupururudzei namapisarema,

³ Nokuti Jehovha ndiMwari mukuru, Mambo mukuru anokunda vamwari vose.

⁴ Nzvimbo dzakadzika dzapasi dziri muruoko rwake; Misoro yamakomo ndeyakewo.

⁵ Gungwa nderake, ndiye akariita; Maoko ake akaumba nyika yakaoma.

⁶ Uyai, tinamate tikotamire pasi; Ngatipfugame pamberi paJehovha Muiti wedu.

⁷ Nokuti ndiye Mwari wedu, Isu tiri vanhu vanofudzwa naye, namakwai oruoko rwake. Nhasi dai muchinzwa henyu izwi rake!

⁸ “Regai kuomesa mwoyo yenyu sapaMeribha, Sapazuva reMasa murenje;

⁹ Panguva yandakaidzwa namadzibaba enyu, Vakandiidza, vakaona zvandakaita.

¹⁰ Ndakanga ndine shungu pamusoro porudzi urwo makore makumi mana, Ndikati, ‘Ndivanhu vakarashika pamwoyo yavo, Havana kuziva nzira dzangu;’

¹¹ Saka ndakapika pakutsamwa kwangu, ndikati, ‘Havangazopindi pazororo rangu.’ ”