Mapisarema 90 - Shona Bible 1949 revised 2002

Bhuku 4 ( Mapisarema 90—106 ) Kupfupika kwoupenyu hwomunhu

Munyengetero waMosesi, munhu waMwari.

¹ Ishe, makanga muri ugaro hwedu Pamarudzi namarudzi.

² Makomo asati azvarwa, Musati matongosika nyika nevhu, Kubva pakusingaperi kusvikira pakusingaperi imi muri Mwari.

³ Munodzosera munhu kuguruva; Muchiti, “Dzokai vana vavanhu.”

⁴ Nokuti kwamuri makore ane chiuru Akangofanana nezuva razuro kana rapfuura, Senguva yokurinda yousiku.

⁵ Munovakukura semvura zhinji; vava sehope; Mangwanani vakaita souswa hunomera.

⁶ Mangwanani hunotumbuka, hunomera; Madekwana hunodzurwa, ndokusvava.

⁷ Nokuti tinopedzwa nokutsamwa kwenyu, Tinotambudzika nehasha dzenyu.

⁸ Makaisa zvakaipa zvedu pamberi penyu, Zvivi zvedu zvakavanzika pachiedza chechiso chenyu.

⁹ Nokuti mazuva edu ose anopfuura makatsamwa; Makore edu anopera sorungano.

¹⁰ Mazuva amakore edu anosvika makore makumi manomwe, Kana tine simba makore makumi masere; Asi kunyange achikudzwa ndiko kutambudzika nenhamo bedzi. Nokuti gare-gare aenda, nesu tabhururuka taenda.

¹¹ Ndianiko anoziva simba rokutsamwa kwenyu, Nehasha dzenyu, kuti mutyiwe zvakafanira here?

¹² Tidzidzisei kunatsoverenga mazuva edu, Kuti tizviwanire mwoyo wakachenjera.

¹³ Dzokai Jehovha; kusvikira riniko? Muzvidembe pamusoro pavaranda venyu.

¹⁴ Tigutsei mangwanani nengoni dzenyu; Kuti tifarise, tive nomufaro mazuva edu ose:

¹⁵ Tifadzei zvinoenzana namazuva amakatitambudza, Namakore atakaona zvakaipa.

¹⁶ Zvamakaita ngazvionekwe navaranda venyu, Nokubwinya kwenyu pamusoro pavana vavo.

¹⁷ Kunaka kwaJehovha Mwari wedu ngakuve pamusoro pedu; Mutisimbisire basa ramaoko edu; Zvirokwazvo, basa ramaoko edu murisimbise.