Mapisarema 86 - Shona Bible 1949 revised 2002

Dhavhidhi anovimba nenyasha dzaJehovha

Munyengetero waDhavhidhi.

¹ Rerekai nzeve dzenyu, Jehovha, ndipindurei; Nokuti ndiri murombo nomushaiwi.

² Chengetai mweya wangu; nokuti ndiri mudikanwi wenyu; Haiwa Mwari wangu, ponesai muranda wenyu anovimba nemi.

³ Ndinzwirei ngoni, Ishe; Nokuti ndinodana kwamuri zuva rose.

⁴ Fadzai mweya womuranda wenyu; Nokuti ndinosimudzira mweya wangu kwamuri Ishe wangu.

⁵ Nokuti imi, Ishe makanaka, munofarira kukanganwira, Mune ngoni zhinji kuna vose vanodana kwamuri.

⁶ Rerekerai nzeve yenyu, Jehovha kumunyengetero wangu; Teererai izwi rokukumbira kwangu.

⁷ Pazuva rokutambudzika kwangu ndichadana kwamuri, Nokuti muchandipindura.

⁸ Hapana akafanana nemi pakati pavamwari, Ishe, Uye hapana mabasa akafanana namabasa enyu.

⁹ Ndudzi dzose dzamakaita dzichauya kuzonamata pamberi penyu, Ishe, Dzicharumbidza zita renyu.

¹⁰ Nokuti imi muri mukuru, munoita zvinhu zvinoshamisa; Ndimi Mwari woga.

¹¹ Ndidzidzisei nzira yenyu, Jehovha, ndichafamba muzvokwadi yenyu, Batanidzai mwoyo wangu kuti nditye zita renyu.

¹² Ndichakurumbidzai, Ishe Mwari wangu, nomwoyo wangu wose, Ndicharumbidza zita renyu nokusingaperi.

¹³ Nokuti ngoni dzenyu ihuru kwandiri; Makarwira mweya wangu pagomba rakadzika-dzika.

¹⁴ Mwari, vanozvikudza vakandimukira, Ungano yavanhu, vanomanikidza, vakatsvaka mweya wangu, Havana kukuisai pamberi pavo.

¹⁵ Asi imi, Ishe muri Mwari une tsitsi nenyasha, Hamukurumidzi kutsamwa, mune ngoni zhinji nezvokwadi.

¹⁶ Ringirai kwandiri, mundinzwire ngoni; Ipai muranda wenyu simba renyu, Muponese mwanakomana womurandakadzi wenyu.

¹⁷ Ndiratidzei chiratidzo mundiitire zvakanaka; Kuti vanondivenga vazvione, vanyadziswe; Nokuti imi Jehovha, makandibatsira nokundinyaradza.