Mapisarema 85 - Shona Bible 1949 revised 2002

Jehovha ndiye Mubatsiri

Kumutungamiriri wokuimba. Pisarema ravanakomana vaKora.

¹ Jehovha, makafarira nyika yenyu; Makadzosa Jakobho pakutapwa.

² Makakanganwira kutadza kwavanhu venyu, Makafukidza zvivi zvavo zvose.

³ Makabvisa kutsamwa kwenyu kwose; Makazvidzora pahasha dzenyu dzakanyanya.

⁴ Tidzosei, Mwari muponesi wedu, Gumisai hasha dzenyu kwatiri.

⁵ Ko mucharamba makatitsamwira nokusingaperi? Muchasvitsa kutsamwa kwenyu kumarudzi namarudzi here?

⁶ Imi hamungatiraramisizve here, Kuti vanhu venyu vafare nemi?

⁷ Tiratidzei ngoni dzenyu, Jehovha, Mutipe ruponeso rwenyu.

⁸ Ndichanzwa zvichataura Mwari Jehovha; Nokuti achataura rugare kuvanhu vake, nokuvatsvene vake; Asi ngavarege kudzokerazve kuupenzi.

⁹ Zvirokwazvo kuponesa kwake kuri pedyo navanomutya; Kuti kubwinya kugare munyika yedu.

¹⁰ Ngoni nezvokwadi zvakasangana; Kururama norugare zvakatsvodana.

¹¹ Zvokwadi zvinomera pasi; Kururama kwakatarira pasi kuri kudenga.

¹² Zvirokwazvo, Jehovha uchapa zvinhu zvakanaka; Nyika yedu ichabereka zvibereko zvayo.

¹³ Kururama kuchamutungamirira; Kuchagadzirira tsoka dzake nzira.