Mapisarema 80 - Shona Bible 1949 revised 2002

Mwari ngaarwire mudzambiringa wake

Kumutungamiriri wokuimba; nomuimbirwo weShoshanimi Eduti. Pisarema raAsafi.

¹ Tererai nenzeve, Mufudzi waIsiraeri, Iyemi munotungamirira Josefa seboka rezvipfuwo; Imi mugere pakati pamakerubhi, penyai!

² Mutsai simba renyu pamberi paEfuremu naBhenjamini naManase, Muuye kuzotirwira.

³ Tidzosereizve, Mwari; Penyesai chiso chenyu, isu tiponeswe.

⁴ Jehovha, Mwari wehondo, Muchatsamwira munyengetero wavanhu venyu kusvikira riniko?

⁵ Makavadyisa zvokudya zvemisodzi, Nokuvanwisa misodzi yakawanda kwazvo.

⁶ Makatiita chinhu chinoitirwa nharo navatigere navo; Vavengi vedu vanotiseka pakati pavo.

⁷ Tidzosereizve, Mwari wehondo; Penyesai chiso chenyu, isu tiponeswe.

⁸ Makandotora mudzambiringa paIjipiti; Makadzinga vahedheni, mukausima.

⁹ Makaugadzirira, Ukabata kwazvo, ukazadza nyika.

¹⁰ Makomo akafukidzwa nomumvuri wawo, Nemisidhari yaMwari namatavi awo.

¹¹ Wakatandisa matavi awo kusvikira pagungwa, Namashizha awo kusvikira kuRwizi.

¹² Makaputsireiko mhanda dzawo, Kuti vose vanopfuura nenzira vautanhe?

¹³ Nguruve yomudondo inouparadza, Mhuka dzesango dzinoudya.

¹⁴ Dodzokai henyu, Mwari wehondo, Tarirai muri kudenga, muone, muve nehanya nomudzambiringa uyu.

¹⁵ Muchengete chakasimwa noruoko rwenyu rworudyi, Nomwanakomana, wamakazvirerera.

¹⁶ Wapiswa nomoto, watemwa; Vanopera nokutuka kwechiso chenyu.

¹⁷ Ruoko rwenyu ngaruve pamusoro pomunhu woruoko rwenyu rworudyi, Pamusoro poMwanakomana womunhu, wamakazvirerera.

¹⁸ Ipapo hatingazobvi kwamuri; Tiraramisei isu, tigodana zita renyu.

¹⁹ Tidzosereizve, Jehovha Mwari wehondo; Penyesai chiso chenyu, isu tiponeswe.