Mapisarema 88 - Bhaibhiri Idzva rechiShona rine Dhuterokanonika

Rumbo. Rwiyo rwevekwaKora. Muimbisi, rumbo urwu rwunoimbwa maimbiro eMaharatireanoti: Inhetembo yaHemani muEzira.

Kukumbira rubatsiro munhamo

¹ TENZI Mwari wangu, muponesi wangu ndinochema kwamuri siku nesikati.

² Gamuchiraiwo munamato wangu teererai kuchema kwangu

³ nokuti ndiri kutambura zvikuru ndavakutosvika kunzvimbo yavakafa.

⁴ Ndavakutoverengerwa pakati paavo vanodzika kunzvimbo yavakafa. Ndiri murume asisina simba

⁵ somunhu akaraswa pakati pezvitunha savakafa varere muguva; savaya vamusisayeuki zvenyu nokuti havachisiri mumaoko menyu.

⁶ Makandiradzika mugomba rakadzika munzvimbo yerima pasi pasi.

⁷ Kunditsamwira kwenyu kunondiremera munonditsimbirira namasaisai enyu. Dzepfunde.

⁸ Munoita kuti vamwe vangu vandiseme muchiita kuti ndive chinhu chinosemesa kwavari. Makandizaririra zvokuti handikwanisi kupunyuka.

⁹ Ziso rangu rava kuonera madzerere pamusana pokutambura. Ndinodana kwamuri mazuva ose TENZI ndakasimudza maoko angu kwamuri.

¹⁰ Munoda kuitira zvishamiso vakafa here? Ko ivo vava zvimuvhuri-vhuri vangamuke kuzokurumbidzai here? Dzepfunde

¹¹ Mwoyochena wenyu unoparidzwa muguva here kana kutendeka kwenyu munzvimbo yokuparadzwa?

¹² Zvishamiso zvenyu zvinozivikanwa munzvimbo yerima here kana ururami hwenyu munzvimbo yavasina chavanoyeuka?

¹³ Asi ini ndinochema kwamuri TENZI; mangwanani munamato wangu unosvika pamberi penyu.

¹⁴ Nhai TENZI munondirasireikowo munondivanzireiko chiso chenyu?

¹⁵ Ndinotambura zvokunge ndichafa kubva pauduku hwangu. Ndinorwadziwa ini nezvamunoita zvinotyisa zvandishaisa zano.

¹⁶ Hasha dzenyu dzandimomotera; kundivhundutsira kwenyu kunondiparadza.

¹⁷ Zvinondikomba samapopopo emvura zuva rose; zvinondimomotera pamwechete.

¹⁸ Makaita kuti vanondida neshamwari dzangu vandiseme rima ndiro rava shamwari yangu.