Mapisarema 81 - Bhaibhiri Idzva rechiShona rine Dhuterokanonika

Muimbisi, rumbo urwu rwaAsafu rwunoimbwa namaimbiro evokwaGati.

Rumbo rwezuva guru

¹ Imbirai Mwari wedu nesimba, iye simba redu, pururudzirai Mwari waJakobho norufaro.

² Shaurai rumbo muridze tambureni, muridze chipendani nedimbwa zvinakidze.

³ Ridzai hwamanda pakugara kwomwedzi, pajena guru romwedzi, pazuva redu guru,

⁴ nokuti murawo weIsiraeri, chirevo chaMwari waJakobho.

⁵ Akatemera mutemo muna Josefi paakaenda kundorwisa Ijipiti ndakanzwa izwi randisati ndambonzwa,

⁶ “Ndakakurerutsira mutoro pamafudzi ako ndikaregesa maoko ako kubata tswanda.

⁷ Pakutambudzika kwako wakadanidzira ndikakununura. Ndakakupindura ndiri pakavanda ndiri makavanda mumheni. Ndakakuedza pamvura iya yokuMeribha.” Dzepfunde.

⁸ “Teererai munzwe vanhu vangu ndichikuyambirai. Dai mukanditeererawo zvenyu, imi vaIsiraeri.

⁹ Hapafaniri kuva navamwari vasiriivo pakati penyu. Hamufaniri kupfugamira mwari asingazivikanwi.

¹⁰ Ndini TENZI Mwari wako akakuburitsa munyika yeIjipiti, shamisisa muromo wako ndiuzadze.

¹¹ “Asi vanhu vangu havana kunditeerera, Isiraeri yakanga isinei neni.

¹² Saka ndakavarega vachiomesa musoro kuti vaite zvavanoda.

¹³ Dai vanhu vachingonditeerera zvavo, vaIsiraeri vachitevera nzira dzangu.

¹⁴ Ndaikurumidza kuti vavengi vavo vatevere muteto ndichirwisana nemhandu dzavo.

¹⁵ Vanovenga TENZI vaitohuta pamberi pake, chirango chavo chaibva chaita firapo.

¹⁶ Ndaikupai koroni yakanakisisa kuti mudye uye ndaikugutsai nouchi hwomudombo.”