Mapisarema 78 - Bhaibhiri Idzva rechiShona rine Dhuterokanonika

Nhetembo yaAsafu.

Chidziidzo chinobva kunhoroondo yavaIsiraeri

¹ Teererai vanhu vangu kune zvandinokudzidzisai, rerekerai nzeve dzenyu kumazwi omuromo wangu.

² Ndichazarura muromo wangu nomufananidzo ndichataura madimikira akadzama apasichigare,

³ zvinhu zvatakanzwa zvatinoziva, zvatakaudzwa namadzitateguru edu.

⁴ Hatingazvivanziri vana vavo, asi tinozvitaurira zvizvarwa zvinotevera, zviito zvaTENZI nesimba rake nezvishamiso zvaakaita.

⁵ Akadzika mutemo maJakobho akatema mutemo muIsiraeri yaakati madzibaba edu adzidzise vana vavo

⁶ kuitira kuti chizvarwa chinotevera chizvizive, ichocho chichazvarwa chimuke chizotaurirawo vana vacho

⁷ kuti vaise chivimbo chavo muna Mwari varege kukanganwa mabasa aMwari, asi kuti vachengete mitemo yake

⁸ uye kuti varege kuita samadzibaba avo vaiva tsvuuramuromo nechizvarwa chakapanduka, vaiva chizvarwa chisina kugadzana mwoyo, vakanga vasina mweya wokutendeka kuna Mwari.

⁹ VokwaEfuremu vaive vakapakata miseve nouta, vakadzokera shure pazuva rehondo.

¹⁰ Havana kuchengeta chitenderano chaMwari. Vakatoramba kutevera mutemo wake.

¹¹ Vakakanganwa zvaakanga aita uye zvishamiso zvaakanga avaratidza.

¹² Akaita minana pamberi pamadzitateguru avo munyika eIjipiti, mumasango okuZoani.

¹³ Akaganhura gungwa akavapfuudza nomo akamisa mvura kuita murwi.

¹⁴ Kumasikati aivatungamirira negore, usiku hwose aivatungamirira nerimi romoto.

¹⁵ Akatsemura matombo murenje akavapa mvura yokunwa yakawanda sokunge yaibva pasi pasi chaipo.

¹⁶ Akaburitsa tukova mudombo akaita kuti mvura iyerere sehova.

¹⁷ Asi vakatoramba vachimutadzira vachipandukira wokumusorosoro murenje.

¹⁸ Vakaedza Mwari mumwoyo yavo nokuramba vachingokumbira chokudya chavaipanga.

¹⁹ Vakapopotera Mwari vachiti, “Mwari angaisire vanhu chokudya pamberi pavo murenje here?

²⁰ Akarova dombo wani mvura ikapozhoka, tukova tukafashukira. Angakwanise kupa chingwa here kana kupa vanhu vake nyama?”

²¹ Naizvozvo TENZI paakazvinzwa akazara nehasha. Akatungidza Jakobho nemoto. Hasha dzake dzakavirukira Isiraeri

²² nokuti vakanga vasingatendeseki naMwari, havana kuvimba nesimba rake rokununura.

²³ Zvakadaro zvazvo akataurira matenga kumusoro akazarura makonhi okudenga.

²⁴ Akavanaisira mana kuti vadye akavapa chingwa chokudenga.

²⁵ Vanhu vakadya chingwa chavatumwa, akavatumira chokudya chakawanda.

²⁶ Akaita kuti mhepo yokumabvazuva ivhuvhute kumatenga. Akatungamirira nesimba mhepo yokumaodzanyemba.

²⁷ Akanaisa pavari nyama sohuruva, shiri dzina mapapiro sejecha ramakungwa.

²⁸ Akadzidonhesa pakati pamatendhe avo munharaunda yose yapavaigara.

²⁹ Vakadya vakanyatsoguta nokuti akavapa zvavaipanga.

³⁰ Asi havi yavo isati yambopera, chokudya chichiri mukanwa mavo,

³¹ Mwari akavavirukira nehasha akauraya vakanyatsosimba vacho akarizha majaya akasvika eIsiraeri.

³² Zvakadaro zvazvo vakangoramba vachitadza chete, kunyange nezvishamiso zvake havana kuvimba naye.

³³ Nezvo akanyangarisa mazuva avo sefemo, akanyangarisawo makore avo nepfumvu nechimbichimbi.

³⁴ Paakavauraya vakamutsvaka vakatendeuka vakatsvakisisa Mwari.

³⁵ Vakayeuka kuti Mwari ndiye dombo ravo uye kuti Mwari Wokumusorosoro ndiye mununuri wavo.

³⁶ Asi vakamubata kumeso nemiromo yavo vakamurevera nhema norurimi rwavo.

³⁷ Vakanga vasiri pachokwadi naye, havana kuita zviri pachokwadi nechitenderano chake.

³⁸ Asi iye netsiyenyoro dzake akavaregerera uipi hwavo akarega kuvaparadza, akadzora hasha dzake kazhinji, akarega kuviruka nehasha dzake dzose.

³⁹ Akayeuka kuti vanongova nyama, mhepo zvayo inopfuura isingazodzokizve.

⁴⁰ Kanganiko kavakamupandukira murenje vakamushatirisa mugwenga.

⁴¹ Vakamuedza kakawanda vakadenha Mutsvene waIsiraeri.

⁴² Havana kurangarira simba rake kana kurangarira zuva raakavanunura kumuvengi

⁴³ paakaita zvishamiso zvake muIjipiti paakaita minana yake mumasango ekuZoani.

⁴⁴ Akasandura hova dzikava ropa zvokuti havana kukwanisa kunwa mutukova twavo.

⁴⁵ Akavatumira bute renhunzi dzakavadya namatafi akavaparadza.

⁴⁶ Akapa mbeswa dzavo kumakonye uye muchero wamabasa avo kumhashu.

⁴⁷ Akaparadza migirepisi yavo nechimvuramahwe uye mionde yavo nechando.

⁴⁸ Akarova mombe dzavo nechimvuramahwe uye hwai akadzirova nemheni.

⁴⁹ Akavavirukira kwazvo nehasha akavashatirirwa akavatsamwira zvikuru akavapa nhamo idzi dzaiva nhumwa dzake dzokuparadza.

⁵⁰ Akavaputikira nehasha, haana kurega kuvauraya, akavaparadza upenyu nedenda.

⁵¹ Akauraya matangwe ose muIjipiti, vana vokutanga vesimba ravo mumatumba okwaHamu.

⁵² Iye akatungamirira vanhu vake sehwai akavatungamirira murenje sedanga.

⁵³ Akavatungamirira zvisina njodzi zvokuti havana kutya asi gungwa rakafusira vavengi vavo.

⁵⁴ Akavaunza kunyika yake inoera kugomo rake raakawana nesimba reruoko rwake rworudyi.

⁵⁵ Akafanovatandira marudzi, akavakamuranisa migove yavo, akagarisa vaIsiraeri mumatendhe avo.

⁵⁶ Vakaedza Mwari Wokumusorosoro, vakamupandukira uye havana kuchengeta mitemo yake.

⁵⁷ Asi vakatotsauka vakaiita zvisina kutendeka samadzibaba avo; vakamonyoroka souta husina kutsarukana.

⁵⁸ Nokuti vakamushatirisa nenzvimbo dzavo dzokunamatira dzakatunhumara; vakaita kuti aite shanje nokuda kwezvifananidzo zvavo zvokunamata.

⁵⁹ Mwari paakazvinzwa akazara nehasha, akabva aramwa Isiraeri chaizvo.

⁶⁰ Akafuratira nzvimbo yake yaaigara kuShiro, dumba raaigara pakati pavanhu.

⁶¹ Akaisa simba rake, paArika yechitenderano, kuutapwa, akaisa mbiri yake mumaoko omuvengi.

⁶² Akapinza vanhu vake mukuuraiwa nebakatwa rehondo akavirukira nhaka yake nehasha.

⁶³ Majaya avo akavaroromesa nemoto, mhandara dzavo dzakashaya rumbo rwomuchato.

⁶⁴ Vapristi vavo vakauraiwa namapakatwa chirikadzi dzavo hadzina kuvachema.

⁶⁵ TENZI akaita seari kupepuka muhope segamba rakundwa newaini.

⁶⁶ Akagarisa vavengi vake pasi, akavanyadzisa zvinogara zvakadaro.

⁶⁷ Akaramba vemba yokwaJosefi. Akarega kusarudza vedzinza rokwaEfuremu,

⁶⁸ asi paakasarudza vedzinza rokwaJudha veGomo reZioni raanoda,

⁶⁹ akavaka ipapo nzvimbo yake inoera, nhunga makore chaiyo ikaita senyika yaakadzika pasichigare.

⁷⁰ Akasarudza Dhavhidhi muranda wake akamutora kumatanga ehwai.

⁷¹ Akamubvisa mukufudza nhunzvi dzaiva navana, kuti ave mufudzi wevokwaJakobho vanhu vake Isiraeri, nhaka yake.

⁷² Akavafudza nemwoyo uri pachokwadi akavatungamirira nouchenjeri.