Mapisarema 91 - Bhaibhiri Idzva rechiShona rine Dhuterokanonika

Mwari ndiye mudziviriri wedu

¹ Munhu anogara mudumba roWokumusorosoro, anogara mumumvuri waSamasimbaose,

² anogona kuti kuna TENZI, “Ndimi diziro rangu nhare.”

³ Nokuti achakununura kumunhu anokuteya zvakaipa uye kudenda rinoparadza.

⁴ Achakufukidza neminhenga yake uchiwana pokuhwanda mumapapiro ake. Kutendeka kwake inhowo yakatenderedza.

⁵ Zvinotyisa zvousiku hauzozvitya kana museve unokandwa masikati.

⁶ Kana mharadzi dzinofamba murima, nyange zvinoparadza masikati machena.

⁷ Kurutivi rwako kungawire zvako churu kurudyi kwako kugowira gumi rezviuru asi iwe hapana chinokusvika.

⁸ Uchangozvitarisawo nameso kuti uone mubayiro wavakaipa.

⁹ Nokuti unenge wati TENZI ndiye mudziviriri wangu waita musha wako muna Wokumusorosoro.

¹⁰ Hapana chakaipa chinokuwira kana denda rinosvikawo pamusha pako.

¹¹ Nokuti achapa vatumwa vake basa rokukuchengeta panzira dzako dzose.

¹² Vachakubata mumaoko kuti urege kugumbura tsoka yako pabwe.

¹³ Uchatsika zvako pamusoro peshumba nechiva. Shumba, ino chaiyo, yechidiki nenyoka, uchazvitsika-tsika pasi petsoka dzako.

¹⁴ Pamusana pokuti anoita chiname neni ndichamununura norudo. Ndichamudzivirira nokuti anoziva zita rangu.

¹⁵ Akadana kwandiri ndichamupindura; ndichava naye munhamo; ndichamununura ndichimuremekedza.

¹⁶ Ndichamugutsa noupenyu hurefu ndigoita kuti aone ruponeso rwangu.