Mapisarema 87 - Bhaibhiri Idzva rechiShona rine Dhuterokanonika

Rwiyo urwu rumbo rwavana vokwaKora. Rumbo

Jerusaremu amai venyika dzapasi pose

¹ Pagomo rinoera ndipo pane guta rakavakwa naMwari.

² Mwari anoda guta reZioni kupinda dzimwe nzvimbo dzose dzomaJakobho.

³ Munorumbidzwa kwazvo imi guta raMwari. Dzepfunde.

⁴ Ndingagone kudoma veRahabhu neveBhabhironi kwoti veFirisitia neveTire nevekuItiopia pakati pavanondiziva zvichatonzi, “Uyu newoyo akaberekwa imomo.”

⁵ Kana zviri zveguta reZioni, zvingatonzi, “Nyika iyi neyoyo yakaberekwa imomo,” uye kuti Wokumusorosoro achaita kuti rimire.

⁶ TENZI anonyora mubhuku ravanhu achitoti nyika iyi neiyi yakaberekwa imomo. Dzepfunde.

⁷ Vaimbi uyewo vatambi vose vanoti, “Takatubuka mauri.”