Mapisarema 84 - Bhaibhiri Idzva rechiShona

Muimbisi, urwu rumbo rwavana vokwaKora, rwunoimbwa maimbiro ovokwaGati.

Kusuwira Temberi yaMwari

¹ Hakusi kunaka ikoko kwakaita nzvimbo yenyu yamunogara imi TENZI wehondo nehondo.

² Ndinobva ndatorwa mwoyo chaizvo, ndinodisisa kwazvo mipanda yaTENZI mwoyo wangu nenyama yangu zvinoimbira Mwari mupenyu norufaro.

³ Kunyange nzvidya inowanawo pokugara, kashiri kachizvivakira dendere rako pakanogona kukandirira vana vako kuatari dzenyu imi TENZI wehondo nehondo mambo wangu naMwari wangu.

⁴ Vakakomborerwa zvavo vanogara mumba menyu vachikurumbidzai. Dzepfunde.

⁵ Vakakomborerwa zvavo vanowana simba mamuri; vanodisisa migwagwa mikuru inoenda kuguta reZioni.

⁶ Pavanopfuura nomubani reBhaka vanoriita nzvimbo ine zvisipiti, mvura yemunhuruka inorizadza namadziva.

⁷ Vanoramba vachingosimba Mwari wavamwari achaonekwa muZioni.

⁸ TENZI wehondo nehondo inzwai munamato wangu. Teererai imi Mwari waJakobho. Dzepfunde

⁹ Tarisai muone Mwari nhoo yedu tarirai uso hwomuzodzwa wenyu.

¹⁰ Nokuti zuva rimwechete mumipanda yenyu riri nani pane churu chawo kumwe. Zviri nani zvangu kuva muchengeti wapamusuo mumba maMwari wangu panokugara mumatendhe avakaipa.

¹¹ Nokuti Mwari izuva nenhoo, anoitira munhu mwoyochena uye anovasimudzira. TENZI hapana chaanonyima munhu anofamba pachokwadi.

¹² TENZI wehondo nehondo, akakomborerwa zvake munhu anovimba nemi.