Numera 33 - O LE TUSI PA'IA - Ekalesia Katoliko Roma

O Sāvaliga e Fagafulu ma le Lua a le Fānauga a Isaraelu

¹ O sāvaliga ia a le fānauga a Isaraelu, e na ō mai mai le nu‘u o Aikupito, ‘iā latou ‘au i le pule a Mose ma Arona.

² Na tusia e Mose o mea na latou ō mai ai i o latou sāvaliga e tusa ma le afioga a le ALI‘I, o latou sāvaliga ia i mea na latou ō mai ai.

³ Na ō mai i latou mai Ramese i le masina muamua, i le aso e sefulu ma le lima o le masina muamua; o le aso ‘ua aupito mai i le paseka na ō mai ai le fānauga a Isaraelu ma le lima malosi i luma o Aikupito uma.

⁴ Auā na tatanu e Aikupito o ulumatua uma na fasiotia e le ALI‘I ‘iā te i latou ē na fa‘asalaina fo‘i e le ALI‘I o latou atua.

⁵ Na ō mai le fānauga a Isaraelu mai Ramese, ma latou tolauapi i Sukota.

⁶ Na latou ō mai mai Sukota, ma latou tolauapi i Etama, o lo‘o tupito i le vao.

⁷ Na latou ō mai mai Etama, ‘ona toe fo‘i atu lea i Peairota, ‘ua fesagai ma Paalasefona, ma latou tolauapi i luma o Mekatala.

⁸ Na latou ō mai mai luma o Airota, lona latou ui atu lea i totonu o le sami i le vao, e tolu aso o la latou malaga i le vao o Etama, ‘ona latou tolauapi ai lea i Mara.

⁹ Na latou ō mai mai Mara, ‘ona o‘o mai ai lea o i latou i Ailima; ‘ua i Ailima o vaipuna e sefulu ma le lua, ma pama e fitugafulu; ‘ua latou tolauapi ai.

¹⁰ Na latou ō mai mai Ailima, ma latou tolauapi e latalata ane i le sami Ulaula.

¹¹ Na latou ō mai mai le sami Ulaula, ma latou tolauapi i le vao o Sina.

¹² Na latou ō mai mai le vao o Sina, ma latou tolauapi i Tapeka.

¹³ Na latou ō mai mai Tapeka, ma latou tolauapi i Alusa.

¹⁴ Na latou ō mai mai Alusa, ma latou tolauapi i Refiti; sa leai se vai i lea mea e feinu ai le nu‘u.

¹⁵ Na latou ō mai mai Refiti; ma latou tolauapi ui le vao o Sinai.

¹⁶ Na latou ō mai mai le vao o Sinai, ma latou tolauapi i Kiperota-atava.

¹⁷ Na latou ō mai mai Kiperota-atava, ma latou tolauapi i Haserota.

¹⁸ Na latou ō mai mai Haserota, ma latou tolauapi i Ritima.

¹⁹ Na latou ō mai mai Ritima, ma latou tolauapi i Rimoni-paresa.

²⁰ Na latou ō mai mai Rimoni-paresa, ma latou tolauapi i Lipena.

²¹ Na latou ō mai mai Lipena, ma latou tolauapi i Risa.

²² Na latou ō mai mai Risa, ma latou tolauapi i Kailata.

²³ Na latou ō mai mai Kailata, ma latou tolauapi i le mauga o Sapera.

²⁴ Na latou ō mai mai le mauga o Sapera, ma latou tolauapi i Harata.

²⁵ Na latou ō mai mai Harata, ma latou tolauapi i Makelota.

²⁶ Na latou ō mai mai Makelota, ma latou tolauapi i Taata.

²⁷ Na latou ō mai mai Taata, ma latou tolauapi i Tara.

²⁸ Na latou ō mai mai Tara, ma latou tolauapi i Meteka.

²⁹ Na latou ō mai mai Meteka, ma latou tolauapi i Hasamoni.

³⁰ Na latou ō mai mai Hasamoni, ma latou tolauapi i Moserota.

³¹ Na latou ō mai mai Moserota, ma latou tolauapi i Peneakana.

³² Na latou ō mai mai Peneakana, ma latou tolauapi i Horokikata.

³³ Na latou ō mai mai Horokikata, ma latou tolauapi i Iatepata.

³⁴ Na latou ō mai mai Iatepata, ma latou tolauapi i Aperona.

³⁵ Na latou ō mai mai Aperona, ma latou tolauapi i Esiokape.

³⁶ Na latou ō mai mai Esiokape, ma latou tolauapi i le vao o Tisina, o Katesa lea.

³⁷ Na latou ō mai mai Katesa, ma latou tolauapi i le mauga o Horo, i le pito nu‘u o Etoma.

³⁸ Na alu a‘e Arona le ositaulaga i le mauga o Horo, e tusa ma le afioga a le ALI‘I, ‘ona oti ai lea o ia i lea mea i le tausaga e fagafulu talu ‘ona ō mai o le fānauga a Isaraelu ai le nu‘u o Aikupito, i le aso muamua o le masina e lima.

³⁹ E tasi le selau ma le luafulu ma le tolu o tausaga o Arona ‘ina ‘ua oti o ia i le mauga o Horo.

⁴⁰ Na fa‘alogo le tupu o Arata, o le sa Kananā, o lē na nofo i Kanana, i le itū i saute, ‘ua ō mai le fānauga a Isaraelu.

⁴¹ Na latou ō mai mai le mauga o Horo, ma latou tolauapi i Salemoni.

⁴² Na latou ō mai mai Salemoni, ma latou tolauapi i Pinono.

⁴³ Na latou ō mai mai Pinono, ma latou tolauapi i Opoto.

⁴⁴ Na latou ō mai mai Opoto, ma latou tolauapi i Ieaperima, o i le tuā‘oi o Moapi.

⁴⁵ Na latou ō mai mai Iima, ma latou tolauapi i Tipona-kato.

⁴⁶ Na latou ō mai mai Tipona-kato, ma latou tolauapi i Alemoni-tipelata.

⁴⁷ Na latou ō mai mai Alemoni-tipelata, ma latou tolauapi i mauga o Aperima, e feagai ma Nepo.

⁴⁸ Na latou ō mai mai mauga o Aperima, ma latou tolauapi i le ‘ele‘ele laugatasi o Moapi, e latalata ane i Ioritana e fesagai ma Ieriko.

⁴⁹ Na tolauapi i latou e latalata ane i Ioritana, pau mai i Petesemota, pau mai i Apelasetima, i le ‘ele‘ele laugatasi o Moapi.

O Fa‘atonuga ‘ae le‘i La‘asia Ioritana

⁵⁰ ‘Ona fetalai mai lea o le ALI‘I ‘iā Mose i le ‘ele‘ele laugatasi o Moapi, e latalata ane i Ioritana, e fesagai ma Ieriko, ‘ua fa‘apea mai:

⁵¹ ‘Ia e fai atu i le fānauga a Isaraelu, ‘ia fa‘apea atu ‘iā te i latou, A ‘outou o‘o atu i lelā itū o Ioritana i le nu‘u o Kanana,

⁵² ‘ona ‘outou tulia ai lea o ē o nonofo i le nu‘u uma lava a‘i o ‘outou luma, ‘ia ‘outou fa‘aumatia a latou fa‘atagata uma lava, ‘ia fa‘aumatia fo‘i e ‘outou a latou tupua u‘amea lava; o a latou mea maualuluga uma lava tou te matuā fa‘aumatia.

⁵³ ‘Ia tulia e ‘outou le nu‘u, ma ‘outou nonofo ai; auā ‘ua ‘ou tu‘uina atu le nu‘u ‘iā te ‘outou e fai mo ‘outou tofi.

⁵⁴ Tou te tofitofi le nu‘u i le vili e fai ma tofi i o ‘outou ‘āiga; o ē to‘atele ‘ia ‘outou avatu i ai le tofi ‘ia tele; a o ē to‘aitiiti, ‘ia ‘outou avatu i ai le tofi ‘ia itiiti; o le mea e fa‘asaga i ai le vili a le tagata e fai lea mōna, e maua o ‘outou tofi i itū‘āiga o ‘outou tamā.

⁵⁵ ‘Ae ‘āfai tou te lē tulia i o ‘outou luma o ē o nonofo i le nu‘u, ‘ona ‘avea lea o i latou o ē ‘ua ‘outou fa‘atotoeina, ma mea matuitui i o ‘outou mata, ma la‘au talatala i o ‘outou itū, ma latou fa‘atigā ‘iā te ‘outou i le nu‘u tou te nonofo ai.

⁵⁶ E i‘u fo‘i ‘ina ‘ou faia ‘iā te ‘outou e fa‘apei ‘ona ‘ou manatu e fai ‘iā te i latou.