Numera 31 - O LE TUSI PA'IA - Ekalesia Katoliko Roma

O le Tau‘a a Isaraelu ma Mitiana, ma Tulafono i mea e maua i Tau‘a

¹ ‘Ua fetalai mai fo‘i le ALI‘I ‘iā Mose, ‘ua fa‘apea mai,

² “‘Ia e taui atu ‘iā Mitiana ‘ona o le fānauga a Isaraelu, mulimuli ane ‘ona fa‘atasiina atu ai lea o oe i lou nu‘u.”

³ ‘Ona fai atu ai lea o Mose i le nu‘u, ‘ua fa‘apea atu, “‘Ia sauniuni nisi o ‘outou i le tau‘a e si‘i atu e i latou ‘iā Mitiana, e fa‘ao‘o atu le taui mai i le ALI‘I ‘iā Mitiana.

⁴ ‘Ia ta‘ito‘aafe i itū‘āiga uma o Isaraelu tou te ‘a‘auina atu ai i le tau‘a.”

⁵ ‘Ona fa‘i ‘au lea ai le manomānō o Isaraelu e ta‘ito‘aafe i itū‘āiga; e sefulu o afe ma afe e lua ē ‘ua sauni i le tau‘a.

⁶ ‘Ua ‘a‘auina atu i latou e Mose i le tau‘a e ta‘ito‘aafe i itū‘āiga; latou te ō i le tau‘a ma Fineaso le atali‘i o Eleasaro le ositaulaga, sa ‘iā te ia mea pa‘ia ma pū e ili.

⁷ ‘Ona latou tau ai lea ma Mitiana, e pei ‘ona poloa‘i mai o le ALI‘I ‘iā Mose, ‘ua fasiotia o i latou o tane uma lava.

⁸ ‘Ua latou fasiotia fo‘i tupu o Mitiana fa‘atasi ma i latou na fasia, o Evi, ma Rekema, ma Suro, ma Huro, ma Repa, o tupu e to‘alima o Mitiana; o Palaamo fo‘i le atali‘i o Peoro ‘ua latou fasiotia i le pelu.

⁹ ‘Ua ‘ave fo‘i fa‘atagataotau‘a e le fānauga a Isaraelu o fafine o Mitiana, ‘atoa ma o latou tama iti; o a latou lafu povi uma fo‘i, ma a latou lafu mamoe uma, ‘atoa ma a latou ‘oloa uma ‘ua latou vetea.

¹⁰ O a latou ‘a‘ai uma fo‘i na latou nonofo ai, ‘atoa ma o latou ‘olo uma, ‘ua latou susunuina i le afi.

¹¹ ‘Ua latou ‘ave fo‘i le vete uma ma mea uma na maua, o tagata ‘atoa fo‘i ma manu.

¹² ‘Ona latou ‘aumai ai lea o fa‘atinifuga, ma mea na maua, ‘atoa ma vete ‘iā Mose, ma Eleasaro le ositaulaga, ma le fa‘apotopotoga o le fānauga a Isaraelu i le toagalauapi i le ‘ele‘ele laugatasi o Moapi e latalata ane i Ioritana, e fesagai ma Ieriko.

O le Toe fo‘i mai o Fitafita Tau

¹³ ‘Ona ō atu lea o Mose, ma Eleasaro le ositaulaga, ma ali‘i sili uma o le fa‘apotopotoga, e fa‘afetaia‘i ‘iā te i latou i tua o le toagalauapi.

¹⁴ ‘Ona ita lea o Mose i ē sa pule i ‘au o le tau‘a, o ē na ‘ave i ta‘ito‘aafe, ma ē na ‘ave i ta‘ito‘aselau; o ē na ō mai i le tau‘a sa tau.

¹⁵ ‘Ua fa‘apea atu a Mose ‘iā te i latou, “‘Ua ‘outou fa‘aolaina ‘ea o fafine uma?

¹⁶ Fa‘auta, o i latou ia na ala ai ‘ona solia e le fānauga a Isaraelu le afioga a le ALI‘I i le mea a Peoro, ‘ona o le ‘upu a Palaamo; ‘ona tupu ai lea o le fa‘ama‘i i le fa‘apotopotoga a le ALI‘I.

¹⁷ O lenei ‘ia ‘outou fasiotia tama tane uma o i tama iti, ma ‘ia ‘outou fasiotia fo‘i fafine uma ‘ua feusua‘i ma se tamaloa.

¹⁸ A o tama teine uma e le‘i feusua‘i ma ni tamaloloa, ‘ia ‘outou fa‘aolaina mo ‘outou.

¹⁹ A o ‘outou fo‘i, tou te nonofo i tua o le toagalauapi i aso e fitu; ai se na na fasiotia se tasi, ai se na pa‘i atu fo‘i i se tagata oti, tou te fa‘amamāina ‘outou i le aso tolu ma le aso fitu; o ‘outou ‘atoa ma o ‘outou tagata o tau‘a.

²⁰ ‘Ia ‘outou fa‘amamāina fo‘i ‘ofu uma, ma mea uma ‘ua faia i pa‘u, ma mea uma ‘ua faia i fulufulu o ‘oti, ‘atoa ma mea uma ‘ua faia i la‘au.”

²¹ ‘Ua fai atu fo‘i Eleasaro le ositaulaga i ‘au na ō atu i le tau‘a, “O le sauniga lenei o le tulafono na poloa‘i mai ai le ALI‘I ‘iā Mose,

²² Tau lava o le auro, ma le ario, o le ‘apamemea, o le u‘amea, o le ‘apa sinasina, ma le pulu,

²³ o mea uma e lē afaina i le afi tou te tu‘u i le afi, ‘ona mamā ai lea; ‘ae ui lava i lea ‘ia fa‘amamāina pea i le vai mo ē ‘ua leaga; a o mea uma e leaga i le afi tou te tu‘u i le vai.

²⁴ Tou te taia fo‘i o ‘outou ‘ofu i le aso fitu, ‘ona mamā ai lea o ‘outou, mulimuli ane tou ō mai i le toagalauapi.”

O le Tufatufaga o mea na maua i le Tau‘a

²⁵ ‘Ona fetalai mai lea o le ALI‘I ‘iā Mose, ‘ua fa‘apea mai,

²⁶ “‘Ia e faitau mai le ‘ato‘atoa o mea na maua i le vete, o tagata ‘atoa ma manu; o oe ma Eleasaro le ositaulaga, ma matai sili o le fa‘apotopotoga;

²⁷ ma ‘ia ‘outou vaeluagalemūina o mea na maua mo i latou ē na faia le tau‘a, ma latou ō atu e tau i le tau‘a, ‘atoa ma le fa‘apotopotoga uma.

²⁸ ‘Ia ‘outou vāea mai fo‘i se taulaga i le ALI‘I a‘i ‘au na o i le tau‘a, ‘ia ta‘itasi a‘i le ta‘ilima o selau o mea, o tagata, ma povi, ma asini, ‘atoa ma mamoe.

²⁹ O la latou vaega ia ‘aumai ai le taulaga, ma avatu ‘iā Eleasaro le ositaulaga e fai ma taulaga si‘i i le ALI‘I.

³⁰ A o le vaegāmea a le fānauga a Isaraelu, ‘ia e ‘aumai ai ‘ia ta‘itasi i le ta‘ilimagafulu o mea, o tagata, ma povi, ma asini, ma mamoe, o manu uma lava, ma avatu ai i sa Levī, o ē ‘ua tausi i le tausiga o le malumalu o le ALI‘I.”

³¹ ‘Ona faia lea e Mose ma Eleasaro le ositaulaga, e pei ‘ona poloa‘i mai ai o le ALI‘I ‘iā Mose.

³² O mea na maua, o toe o vete na maua e ‘au o le tau‘a, o mamoe e ono selau o afe ma afe e fitu sefulu ma afe e lima.

³³ O povi e fitu sefulu o afe ma afe e lua.

³⁴ O asini e ono sefulu o afe ma le afe e tasi.

³⁵ O le ‘atoa fo‘i o tagata, o fafine o lo‘o taupou, e tolu sefulu o afe ma afe e lua.

³⁶ O le vaeluagalemū fo‘i, o le vaegāmea lea a ē na ō i le tau‘a, o le tauaofa‘i o mamoe e tolu selau o afe ma afe e tolu sefulu ma afe e fitu ma le lima o selau.

³⁷ O le taulaga fo‘i i le ALI‘I a‘i mamoe ia, e ono o selau ma le fitu o sefulu ma le lima.

³⁸ O povi e tolu sefulu o afe ma afe e ono o le taulaga fo‘i i le ALI‘I a‘i ia mea, o fitugafulu ma le lua.

³⁹ O asini e tolu sefulu o afe ma le lima o selau o le taulaga fo‘i i le ALI‘I a‘i ia mea, e onogafulu ma le tasi.

⁴⁰ O tagata e sefulu o afe ma afe e ono o le taulaga fo‘i i le ALI‘I a‘i ‘iā te i latou e to‘atolugafulu ma le to‘alua.

⁴¹ ‘Ua avatu e Mose le taulaga ‘iā Eleasaro le ositaulaga, o le taulaga si‘i i le ALI‘I, e pei ‘ona poloa‘i mai ai o le ALI‘I ‘iā Mose.

⁴² A o le vaegāmea a le fānauga a Isaraelu na vāea e Mose a‘i ‘au na tau i le tau‘a;

⁴³ o le vaegāmea lenei a le fa‘apotopotoga; o mamoe e tolu selau o afe ma afe e tolu sefulu ma afe e fitu ma le lima o selau;

⁴⁴ o povi e tolu sefulu o afe ma afe o ono;

⁴⁵ o asini e tolu sefulu o afe ma le lima o selau;

⁴⁶ o tagata fo‘i sefulu o afe ma afe e ono.

⁴⁷ ‘Ua ‘ave e Mose a‘i le vaegāmea a le fānauga a Isaraelu e ta‘itasi i le limagafulu o mea, o tagata ‘atoa ma manu, ma na avatua i sa Levī, o ē ‘ua tausi i le tausiga o le malumalu o le ALI‘I, e pei ‘ona poloa‘i mai ai o le ALI‘I ‘iā Mose.

⁴⁸ ‘Ona ō mai ai lea ‘iā Mose o ali‘i na pule i afe na o i le tau‘a, o ē na ‘ave i ta‘ito‘aafe, ma ē na ‘ave i ta‘ito‘aselau.

⁴⁹ ‘Ua latou fai mai ‘iā Mose, “‘Ua uma ‘ona faitau e au ‘au‘auna le aofa‘i o ‘au o le tau‘a na ‘iā te i matou; ‘ua leai so matou e to‘atasi o lē iloa;

⁵⁰ o le mea lea ‘ua matou ‘aumai ai le taulaga i le ALI‘I, o mea na maua ta‘itasi a tagata, o teuga auro, ma filifili auro, ma taulima, ma mama, ma mama o taliga, ma asoa auro, e fai a‘i se togiola mo i matou i luma o le ALI‘I.”

⁵¹ ‘Ona talia lea e Mose ma Eleasaro le ositaulaga le auro mai ‘iā te i latou, o teuga uma ‘ua faia.

⁵² O auro uma fo‘i o le taulaga si‘i na avatu i le ALI‘I e ali‘i na ‘ave i ta‘ito‘aafe, ma ali‘i na ‘ave i ta‘ito‘aselau, e sefulu o afe ma afe e ono ma le fitu o selau ma le limagafulu o sekeli ia.

⁵³ O ‘au o le tau‘a na latou ta‘ito‘atasi ma fai lana vete.

⁵⁴ ‘Ua talia e Mose ma Eleasaro le ositaulaga le auro i ali‘i na ‘ave i ta‘ito‘aafe, ma ē na ‘ave i ta‘ito‘aselau, ‘ua la avatua i le fale fetāfa‘i o le fa‘apotopotoga e fai ma fa‘amanatuga mo le fānauga a Isaraelu i luma o le ALI‘I.