Numera 29 - O LE TUSI PA'IA - Ekalesia Katoliko Roma

O Taulaga o le Tausaga Fou

¹ O le masina e fitu, o le ulua‘i aso o le masina, ‘ia faia e ‘outou se fa‘apotopotoga pa‘ia; tou te lē fai ai se galuega mamafa e tasi; o le aso o le iligāpu lea ‘iā te ‘outou.

² Tou te osia fo‘i se taulaga mū e fai ma mea manogi lelei i le ALI‘I; o le povi po‘a ta‘anoa e tasi, o le mamoe po‘a e tasi, ma tama‘i mamoe e fitu e tasi lo latou tausaga, e sao ‘ona lelei.

³ O a latou taulaga i mea e ‘ai, o falaoa lelei e palua ma le suāu‘u, e tolu omera i le povi po‘a; e lua omera i le mamoe po‘a;

⁴ o le omera e tasi i tama‘i mamoe ta‘itasi e fa‘atatau i tama‘i mamoe e fitu.

⁵ O le ‘oti po‘a e tasi, o le taulaga mo le agasala, e fai a‘i se togiola mo ‘outou;

⁶ E fa‘aopoopoina i le taulaga mū o le masina, ma lana taulaga i mea e ‘ai, ‘atoa ma le taulaga mū e lē aunoa, ma lana taulaga i mea e ‘ai, ma a latou taulaga i mea e inu e tusa ma a latou sauniga, e fai ma mea manogi lelei, o le taulaga e fai i le afi i le ALI‘I.

O Taulaga mo le Togiola o Agasala

⁷ ‘Ia faia e ‘outou le fa‘apotopotoga pa‘ia i le aso e sefulu o lea masina e fitu, ‘ia fa‘apuapuagātia ai ‘outou e ‘outou, tou te lē fai ai se galuega e tasi.

⁸ Tou te avatua fo‘i se taulaga mū i le ALI‘I, o le mea manogi lelei; o le povi po‘a ta‘anoa e tasi, ma le mamoe po‘a e tasi, ma tama‘i mamoe e fitu e tasi lo latou tausaga,

⁹ ‘ia sao ‘ona lelei mo ‘outou o a latou taulaga i mea e ‘ai, o falaoa lelei e palua ma le suāu‘u, e tolu omera i le povi po‘a; e lua omera i le mamoe po‘a e tasi;

¹⁰ o le omera e tasi i tama‘i mamoe ta‘itasi e fa‘atatau i tama‘i mamoe e fitu.

¹¹ O le ‘oti po‘a e tasi e fai ma taulaga mo le agasala, e fa‘aopoopoina i le taulaga mo le agasala e fai a‘i togiola, ‘atoa ma le taulaga mū e lē aunoa, ma lana taulaga i mea e ai, ma a la taulaga i mea e inu.

O Taulaga mo Fale Apitaga

¹² ‘Ia faia fo‘i e ‘outou le fa‘apotopotoga pa‘ia i le aso e sefulu ma le lima o le masina e fitu, tou te lē fai ai se galuega mamafa e tasi; ‘ae tou te faia le tausamiga i le ALI‘I i aso e fitu.

¹³ Tou te avatua fo‘i se taulaga mū, o le taulaga e fai i le afi, o le mea manogi lelei i le ALI‘I, o povi po‘a ta‘anoa e sefulu ma le tolu, o mamoe po‘a e lua, ma tama‘i mamoe e sefulu ma le fa o tasi lo latou tausaga, e sao ‘ona lelei i latou.

¹⁴ O latou taulaga i mea e ‘ai, o falaoa lelei e palua ma le suāu‘u, e tolu omera i povi po‘a ta‘itasi e fa‘atatau i povi po‘a e sefulu ma le tolu; e lua omera i mamoe po‘a ta‘itasi e fa‘atatau i mamoe po‘a e lua.

¹⁵ O le omera e tasi i tama‘i mamoe ta‘itasi e fa‘atatau i tama‘i mamoe e sefulu ma le fa.

¹⁶ O le ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, o lana taulaga i mea e ‘ai, ma lana taulaga i mea e inu.

¹⁷ O lona lua o aso tou te avatua ai o povi po‘a ta‘anoa e sefulu ma le lua, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.

¹⁸ O la latou taulaga i mea e ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe ‘ia fa‘atatauina i lo latou faitau, e tusa ma le sauniga.

¹⁹ O le ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, ma lana taulaga i mea e ‘ai, ma a la taulaga i mea e inu.

²⁰ O lona tolu fo‘i o aso, o povi po‘a e sefulu ma le tasi, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.

²¹ O la latou taulaga i mea e ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe, e fa‘atatauina i lo latou faitau, e tusa ma le sauniga.

²² O le ‘oti po‘a e tasi e fai ma taulaga mo le agasala, o fa‘aopoopoina i le taulaga mū e lē aunoa, ma lana taulaga i mea e ‘ai, ma lana taulaga i mea e inu.

²³ O lona fa fo‘i o aso, o povi po‘a e sefulu, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.

²⁴ O la latou taulaga i mea e ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe, o fa‘atatau i lo latou faitau, e tusa ma le sauniga.

²⁵ O le ‘oti po‘a e tasi e fai ma taulaga mo le agasala e fa‘aopoopoina i le taulaga mū e lē aunoa, o lana taulaga i mea e ‘ai, ma lana taulaga i mea e inu.

²⁶ O lona lima fo‘i o aso, o povi po‘a e iva, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.

²⁷ O la latou taulaga fo‘i i mea e ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe, e fa‘atatauina i lo latou faitau, e tusa ma le sauniga.

²⁸ O le ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, ma lana taulaga i mea e ‘ai, ma lana taulaga i mea e inu.

²⁹ O lona ono fo‘i o aso, o povi po‘a e valu, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.

³⁰ O la latou taulaga i mea e ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe, e fa‘atatauina i lo latou faitau, e tusa ma le sauniga.

³¹ O le ‘oti po‘a e tasi e fai ma taulaga mo le agasala, e fa‘aopoopoina i taulaga mū e lē aunoa o lana taulaga i mea e ‘ai, ma lana taulaga i mea e inu.

³² O lona fitu fo‘i o aso, o povi po‘a e fitu, o mamoe po‘a e lua, ma tama‘i mamoe e sefulu ma le fa e tasi lo latou tausaga, e sao ‘ona lelei.

³³ O la latou taulaga fo‘i i mea o ‘ai, ma a latou taulaga i mea e inu, i povi po‘a, ma mamoe po‘a, ma tama‘i mamoe, e fa‘atatauina i lo latou faitau, e tusa ma le sauniga.

³⁴ O le ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, o lana taulaga i mea e ‘ai, ma lana taulaga i mea e inu.

³⁵ O lona valu fo‘i o aso ‘ia faia e ‘outou le fa‘apotopotoga, tou te lē fai ai se galuega mamafa e tasi;

³⁶ ‘ae tou te avatua ai se taulaga mū, o le taulaga, e fai i le afi, o le mea manogi lelei i le ALI‘I; o povi po‘a e tasi, o le mamoe po‘a e tasi, ma tama‘i mamoe e fitu e tasi lo latou tausaga, e sao ‘ona lelei.

³⁷ O la latou taulaga i mea e ‘ai, ma a latou taulaga i mea e inu, i le povi po‘a, ma le mamoe po‘a, ma tama‘i mamoe, ia fa‘atatauina i lo latou faitau, ‘ia tusa ma le sauniga.

³⁸ O le ‘oti po‘a e tasi e fai ma taulaga mo le agasala, e fa‘aopoopoina i le taulaga mū e lē aunoa, ma lana taulaga i mea e ‘ai ma lana taulaga i mea e inu.

³⁹ O taulaga ia tou te osia i le ALI‘I i o ‘outou tausamiga, e fa‘aopoopoina i mea ‘ua ‘outou tautō ai, ma taulaga ‘ua ‘outou loto ‘ina fai, e fai ma a ‘outou taulaga mū ma a ‘outou taulaga i mea e le ai ma a ‘outou taulaga i mea e inu, ma a ‘outou taulaga fa‘afetai.

⁴⁰ ‘Ua fai atu fo‘i Mose i le fānauga a Isaraelu e tusa ma mea uma na fetalai mai ai le ALI‘I ‘iā Mose.