SOFONÍAS 1 - Quichua Imbabura 2016

Mandaj Dios ninanda fiñarishpa llaquichinamanda

¹ Amón shuti runapaj churi Josías, Judá llactata mandajui huatacunapimi, Mandaj Diosca, Cusi shuti runapaj churi Sofonias shuti runaman cai shimicunata villarca. Cusi shuti runaca, Gedalías shuti runapaj churimi carca. Gedalías runaca, Amarías shuti runapaj churimi carca. Amarías shuti runaca, Ezequías runapaj churimi carca.

² Mandaj Diosca cashnami nin: “Cai pachapi tucui imalla tiyashcacunataca, tucuillatami tucuchisha.

³ Gentecunata, animalcunatapashmi tucuchisha. Jahuata rij alasyu animalcunatapash, mama cuchapi causaj pijicunatapashmi tucuchisha. Diosta na manllajcunatapash tucuillatami tucuchisha. Cai pachapi causaj gentecunatapash, tucuillatami tucuchisha” ninmi Mandaj Diosca.

⁴ Shinallata: “Judá llactapi causajcunata, Jerusalenbi causajcunatapash, Ñuca maquita chutashpami llaquichisha. Baal shuti rurashcalla diosmanda imalla puchushcatapash, rurashcalla dioscunapajta ruraj sacerdotecunandimi, caimandaca tucuillata anchuchisha.

⁵ Huasi jahuacunapi cungurishpa, jahua pachapi tiyajcunata mañajcunatapash, Mandaj Dios Ñucata mañashpapash, Milcom shuti rurashcalla diospaj shutipi juramentushpa cungurijcunatami tucuchisha.

⁶ Mandaj Diosta catijushpata saquishpa anchurijcunatapash, Mandaj Diosta na mascashpa, Paita na tapujcunatapashmi tucuchisha” ninmi.

⁷ Mandaj Jatun Diospaj ñaupajpica upalla caichi. Mandaj Dios shamuna punllami, ña pactamujun. Mandaj Diosca, tucuita alichishpami, chaiman shamujcunataca paipajlla cachun rurashca.

⁸ Taita Diosca cashnami nin: “Mandaj Dios Ñuca huañuchijui punllacunapica, mandajcunatapash, cati mandajcunatapashmi llaquichisha. Shuj llactamanda apamushca churajunata churajun, tucui gentecunatapashmi llaquichisha.

⁹ Chai punllacunapica, rurashcalla dioscunata mañajcunatapashmi llaquichisha Chai rurashcalla dioscunata yarina huasicunapi, umachishpa, shuhuashpa jundachijcunatapashmi llaquichisha” ninmi.

¹⁰ Mandaj Dios Ñucami, cashnatapash nini: “Chai punllapica, Pijihuan yaicuna pungumandaca, caparinajujmi uyaringa. Caishuj cati pungumandaca, huacashpa caparinajujmi uyaringa. Lomacunamandaca, ninanda manllarishpa caparinajujmi uyaringa.

¹¹ Mactes shuti pambapi causajcunalla, caparishpa huacaichiyari. Chaipi randishpa jatushpa causaj tucui gentecunapash tucuchi tucungami. Culquita apamujcunapash tucuchi tucushcami.

¹² Chai punllacunapica, Jerusalenbi causajcuna imatalla rurashcataca, michata japichishpami aligutapacha ricusha. Shina rurashpami, sangu vino na cuyurinshna imatapash na manllashpa causanajuj runacunataca llaquichisha. Paicunapaj shungupica, cashnami ninajunga: ‘Mandaj Diosca ima alitapash, ima na alitapash na rurangachu’ ninajungami.

¹³ Chaimandami, paicuna ima charishcacunataca shuhuashpa apanajunga. Paicunapaj huasicunatapash, tucuillami urmachishpa tucuchinga. Huasicunata shayachishpapash, chaipica na causanajungachu. Uvata tarpushpapash, chai uva chagracunamanda vinotaca na ufianajungachu” ninmi.

¹⁴ Mandaj Dios Ñuca shamushpa llaquichina jatun punllami ña chayamujun, Chai punllami, ñallapacha chayamujun. Mandaj Dios llaquichijui punllapica, jatun llaqui, huacai punllami canga. Chai punllapica, ninan shinlli runapash llaquinayaitami huacanga.

¹⁵ Chai punllapica, ninanda fiñarishpa llaquichina punllami canga. Ninan llaqui, imata ruraitapash na ushana punllami canga. Ninanda caparina, llaquinayaita tucuchi tucuna punllami canga. Punllapash amsayashca, fuyu quilpashca, llaqui punllami canga.

¹⁶ Chai punllapica, trompetata huacachishpami, pueblo muyundi jatun pirca jahuacunamandapash, jatun torre jahuacunamandapash caparinajunga.

¹⁷ Taita Diosca: “Mandaj Dios Ñucata fiñashpa, juchata rurashcamandami ninandapacha llaquichisha. Chaimandami paicunaca, ñausashna maitapash na puri ushanajunga. Paicunapaj yahuarpash, ñutu alpashnami taliringa. Paicuna huañujpica, huanutashnami shitanajunga” ninmi.

¹⁸ Mandaj Dios ninanda fiñarishpa llaquichijui punllapica, paicunapaj culquipash, curipash, na quishpichi ushangachu. Paipajlla cachun munashpami, Mandaj Diosca ninandapacha fiñarishpa, tucui cai pachapi causajcunataca llaquichishpa tucuchinga.