ESTER 4 - Quichua Imbabura 2016

Esterca, paipaj llacta gentecunamandami rimashca

¹ Mardoqueo runaca, tucui chaicunata yachashpami, pai churajushcata liquishpa, cañamuta churajushpa, uchufata churarishpa, ninanda llaquirishpa, ninanda huacashpa pueblopi purijurca.

² Mardoqueo runaca, jatun mandajpaj pungu ñaupacamanmi shamurca. Jatun mandajpaj pungutaca, cañamuta churajushcacunaca napacha yaicui ushanachu carca.

³ Jatun mandaj mandashcata, tucui marcacunapi causajcunaman villajpi yachashpami, Judá llacta gentecunaca ninanda llaquirishpa, na micushpa ninandapacha huacanajurca. Ashtacacunami cañamuta churajushpa, uchufapi sirinajurca.

⁴ Esterpajta ruranajuj, jarihuan nara tacarishca cuitsacunapash, paita ricuj eunuco runacunapash shamushpami, chaitaca villanajurca. Shina villajpimi jatun mandaj Esterca, ninanda llaquirishpa, cañamuta churajushcataca anchuchishpa, ali churajunata Mardoqueoman churachigrichun cacharca. Ashtahuangarin Mardoqueoca, na chasquircachu.

⁵ Chaimandami Esterca, jatun mandajpajta ruraj Hatac shuti eunuco runata cayarca. Jatun mandajmi, chai runataca Esterta ricuriachun churashca carca. Chai runatami Esterca, imashna cajtapash, imamanda Mardoqueo chashna purijujtapash tapuchun cacharca.

⁶ Shina cachajpimi Hatac shuti runaca, pueblo plazapi Mardoqueo runa tiyajujpi tapungapa rirca. Chai plazaca, jatun mandajpaj huasi pungu chimbapurapimi carca.

⁷ Shina tapujpimi Mardoqueo runaca, ima tucushcatapash tucuilla villajurca. Shinallata Amán runaca, Judá llacta gentecunata tucuchijpica, jatun mandajpaj culquita alichinapi alichijuchun, culquita pezashpa cusha nishcatapashmi villajurca.

⁸ Shinallata, Judá llacta gentecunata tucuchinajuchun mandashcata shujman yalichishpa quilcashpa, Susa shuti pueblopi tucuicunaman cushcatapashmi, Esterman cuchun cacharca. Shina cushpaca, jatun mandajpajman rishpa, paipaj llacta gentecunata ama huañuchipaichu nishpa, Ester parlagrichunmi mingashpa cacharca.

⁹ Hatac shuti runa tigrashpaca, Mardoqueo runa imashna nishcatami, tucuita Esterman villajurca.

¹⁰ Shina villajpimi Esterca, Hatac shuti runataca Mardoqueoman, cashna nichun cutin cacharca:

¹¹ “Jatun mandajpajta rurajcunapash, jatun mandaj mandajuj marcacunapi causajcunapash yachanmi. Maijan jari cashpa, huarmi cashpapash, jatun mandaj na cayajpita, pai jatun mandajta ricungapa ucu patioman yaicujpica huañuchinapachami nishpa, shujlla mandashcami tiyajun. Na cashpaca, jatun mandaj charijuj curi varata chutashpa ricuchijpillami na huañuchi tucuna carca. Ñucataca, jatun mandajca, shuj quillatami na cayahuashca” nichunmi cacharca.

¹² Ester imatalla nishcatami, Mardoqueo runaman villarca.

¹³ Chaimandami Mardoqueo runaca, Esterman cashna nichun cacharca: “Jatun mandajpaj huasipi cashpalla, Judá llacta gentecunashnaca na huañushachu yajunguiman.

¹⁴ Ñucanchimanda cai punllacunapi imatapash na nishpa, can upalla saquijpica, Judá llactamanda gentecunapaca imashnallapash quishpirina tiyangami. Ashtahuangarin cambash, cambaj taitapaj huasi ucupurapashmi huañunguichi. Canga, cai llaquimanda ñucanchita quishpichingapa, jatun mandaj tucushcatapash, ¿pita yachangayari?” nichunmi cacharca.

¹⁵ Esterca, Mardoqueo runaman cashna nichunmi cacharca:

¹⁶ “Cai Susa shuti pueblopi causaj, Judá llacta tucui gentecunata tandachishpami, ñucamanda na micushpa mañana canguichi. Quimsa punlla, quimsa tutatami na micuna, na ufiana canguichi. Ñucapash, ñucapajta ruranajuj cuitsacunahuanmi, na micushpa chashnallata rurasha. Chai jipami, jatun mandajhuan parlangapa yaicusha. Mandashcapi nijushcashna, chaiman yaicushcamanda huañuchinalla cajpipash, huañushallami” nichunmi cacharca.

¹⁷ Shina nijpi Mardoqueo rishpaca, Ester mandashcashna tucuita rurarca.