ESTER 3 - Quichua Imbabura 2016

Amán runa, Judá llacta gentecunata tucuchingapa munashcamanda

¹ Chashna tucushca jipa punllacunapimi, jatun mandaj Asuero shuti runaca, Hamedata shuti runapaj churi, Amán runataca jatumbi churashpa, cati mandajcunata mandajuchun churarca. Hamedata runaca, Agag runapaj miraimi carca.

² Jatun mandaj, mandana huasipi tucuita rurashpa causajcunaca, Amán shuti runapaj ñaupajpi cungurishpami, urai cumurinajurca. Chaitaca, jatun mandajllatami chashna mandashca carca. Ashtahuangarin, Mardoqueo runaca chaitaca na rurarcachu.

³ Chaimandami, jatun mandajpajta rurashpa pungupi ricujcunaca: “¿Imashpata jatun mandaj mandashcataca na cazungui?” nishpa, Mardoqueotaca tapunajurca.

⁴ Punllandi chashna ninajujpipash, Mardoqueo na cazujpimi, chaitaca Amán runaman villanajurca. Paicuna chashna villajpica, Judá llactamanda Mardoqueo runaca, Amán runapaj ñaupajpi nachu cungurin yashpami, chashna villanajurca.

⁵ Amán runaca, paipaj ñaupajpi na cungurijpimi, Mardoqueo runataca ninandapacha fiñarca.

⁶ Shina cajpipash Mardoqueo runatalla llaquichingapaca, na munarcachu. Ashtahuangarin, jatun mandaj Asuero mandajuj llactacunapi causanajuj, Judá llactamanda tucuilla gentecunatami huañuchishpa tucuchingapa Amán runaca yarijurca. Mardoqueo runa judio cajpimi chashna yarijurca.

⁷ Nisán shuti callari quillapi, jatun mandaj Asuero shuti runa chunga ishcai huatata ña mandajujpimi, pipaj urmajta ricungapa, Amán runapaj ñaupapimi, Pur nishca ruranata ruranajurca. Chaitaca, Judá llacta gentecunata ima punlla, ima quilla, ima huata huañuchinata yachangapami, chashna ruranajurca. Shina rurajpimi, Adar shuti chunga ishcai quillapi urmarca.

⁸ Shinamandami Amán runaca, jatun mandaj Asuerotaca, cashna nijurca: “Can mandajuj tucuilla llactapimi, caipi chaipi, shicanyarishpa causaj gentecuna tiyan. Paicunaca, jatun mandaj mandashcata na cazushpa, ashtahuangarin shicanpacha mandashcacunata pactachishpami causanajun. Paicuna chashna causanajuchun saquishpaca, jatun mandajpajca ima alipash na ricuringachu.

⁹ Can jatun mandajpaj ricuipi ali cajpica, tucuicunata tucuchinajuchun mandashpa quilcapailla. Shina rurajpica, jatun mandajpaj culquita alichina huasiman cungapami, sucta huaranga pusaj patsaj quintalta pezaj culquita cusha” nijurcami.

¹⁰ Shina nijpimi jatun mandajca, paipaj maquipi churajushca surtijata llujchishpa, Judá llacta gentecunata fiñaj, Agag runapaj mirai Hamedata runapaj churi, Amán runaman curca.

¹¹ Paitaca cashnami nirca: “Ñucaman cusha nijushca culquitaca, canllata japilla. Shinallata chai gentecunatapash, imata rurangapa munashpapash can ricushpa ruranguilla” nircami.

¹² Shina nijpimi, chai huata callari quilla, chunga quimsa punllapica, jatun mandajpaj quilcajcunata Amán runaca cayarca. Chaipimi Amán runaca, Jatun mandaj churashca sátrapa cati mandajcunaman, tucui llactapi macanajuj runacunata mandajcunaman, pueblocunapi cati mandajcunaman mandashpa quilcachirca. Chaitaca, chai llacta pueblocunapaj shican shican rimaicunapimi quilcashpa cacharca. Jatun mandaj Asuero runapaj shutipi quilcashpami, jatun mandajpaj surtijahuanllata sellashpa cacharca.

¹³ Chai quilcashca fangacunataca, jatun mandaj mandajuj tucui llactacunapi saquigrichunmi, quilcashpa villashca fangacunata apajcunaman cacharca. Chai fangacunapica, Judá llactamanda chairalla viñaicunata, rucucunata, huahuacunata, huarmicunatapash shuj punllapilla, tucuicunata huañuchishpa, paicuna imata charishcacunatapash apanajuchunmi mandashca carca. Chaitaca, Adar shuti chunga ishcai quillapaj chunga quimsa punllapi chashna rurachunmi mandashca carca.

¹⁴ Chai punllapaca, alichirishcalla cachunmi, tucui pueblocunapi chai mandashcataca, shujman yalichishpa quilcashcacunahuan, tucui gentecunaman villachun cacharca.

¹⁵ Jatun mandaj mandajpimi, quilcashpa villashca fangacunata apajcunaca, uchalla llujshinajurca. Chai mandashcataca, llactata mandana Susa shuti jatun pueblopimi curca. Chai jipallami jatun mandajhuan, Amán runahuanga ufiangapa tiyarirca. Ashtahuangarin Susa shuti pueblopi causajcunaca, ninandami manllarinajurca.