ESTER 2 - Quichua Imbabura 2016

Jatun mandaj cachun, Esterta agllashcamanda

¹ Chai jipami, jatun mandaj Asuero shuti runaca, chai fiñarishcata ña yalichishca cashpa, Vasti shuti paipaj huarmi imata rurashcatapash, imashna llaquichinata mandashcatapash yarijurca.

² Chaimandami, Jatun mandapajta rurajcunaca, cashna ninajurca: “Jatun mandajpaj huarmi tucuchunga, jarihuan nara tacarishca, chairalla viñai, ali ñavi cuitsacunata mascachun mandailla.

³ Can jatun mandajca, can mandajuj tucui marcacunapimi, jarihuan nara tacarishca, chairalla viñai, ali ñavi tucui cuitsacunata apamuchun, shuj runacunata churana cangui. Chai runacunami, can jatun mandaj causajuj Susa shuti pueblopi, cambaj huarmicuna tiyana huasiman apamunga. Chaipica chai cuitsacunataca, can jatun mandajpaj huarmicunata ricuj Hegai shuti eunuco runami, juyailla churajunata churachinga.

⁴ Jarihuan nara tacarishca maijan cuitsagupash, jatun mandajpaj ñavipi ali ricurijpica, paimi Vasti huarmipaj randica, jatun mandaj tucunga” ninajurcami. Chai nishcacunaca ali uyarijpimi, jatun mandajca chashna rurarca.

⁵ Jatun mandaj causajuj Susa shuti pueblopimi, Judá llactamanda Mardoqueo shuti runa causajurca. Paica, Jair shuti runapaj churimi carca. Jair shuti runaca, Simei shuti runapaj churimi carca. Simei shuti runaca, Cis shuti runapaj mirai, Benjamín ayllupurallatami carca.

⁶ Mardoqueo runaca, Judá llactata jatun mandaj Jeconías shuti runahuanmi, Jerusalenmanda prezu apai tucushpa, chaipi causajurca. Paicunataca, Babilonia llactata jatun mandaj Nabucodonosor runami, prezu apashca carca.

⁷ Mardoqueo runaca, paipaj taitapaj huauquipaj ushi, Hadasa shuti Estertami, taita mama illaj cajpi viñachirca. Chairalla viñai chai cuitsaguca ali ñavi, juyaillagumi carca. Esterpaj taitapash, mamapash huañujpimi Mardoqueo runaca, paipaj ushitashnalla viñachirca.

⁸ Jatun mandaj, mandashcata quilcachishca shimicuna tucuilla llactapi uyarijpica, jatun mandaj causajuj Susa shuti pueblopimi, jarihuan nara tacarishca ashtaca cuitsacunata tandachishpa, Hegai shuti runa ricuchun apamunajurca. Estertapashmi, huarmicunata ricuj Hegai shuti runa ricuchun, jatun mandajpaj huasiman apamurca.

⁹ Jarihuan nara tacarishca Ester cuitsaguca, Hegai shuti runapaj ñaupajpi aligu ricurijpimi, ninanda alicachishpa juyailla churajunacunahuan, paitara ucha alichishpa, micunatapash carajurca. Shinallata, jatun mandajpaj huasimanda, jarihuan nara tacarishca, canchis cuitsacunatapashmi, paita ricuchun churarca. Estertaca, jarihuan nara tacarishca chai cuitsacunandimi, jatun mandajpaj huarmicuna causana ashtahuan ali huasiman pusharca.

¹⁰ Esterca, maijan llactamanda, maijan ayllumanda cashcatapash na villarcachu. Mardoqueo runami, ama villanguichu nishpa mandashca carca.

¹¹ Ester imashna cajta, paita imashna charinajujta yachangapami, Mardoqueo runaca, huarmicunapaj huasi patio ñaupajpi punllandi purijuj carca.

¹² Chai tucuilla huarmicunatami, mandashcapi nijushcashna paicuna juyailla tucuchunga, shuj huatacaman alichina carca. Punda sucta quillataca, mirra shuti aceitehuan, shuj sucta quillataca, mishquilla ashnajun yacuhuan, huarmicuna churarina jambicunahuambashmi alichina carca. Shuj huatata chashna alichishca jipaca, jatun mandaj Asuero runapaj ñaupajman shamuna punlla chayajpimi, jarihuan nara tacarishca cuitsacunaca, shuj shuj shamushpa ricurina carca.

¹³ Chashnami jarihuan nara tacarishca cuitsaca, jatun mandajpaj ñaupajman shamuna carca. Chai cuitsa, alichiringapa imata mañajpipash tucuita cujpimi, chaicunata churajushpa alichirishpa, huarmicuna tiyana huasimandaca, jatun mandajpaj huasicaman shamuna carca.

¹⁴ Chai cuitsa chishi shamushpaca, cayandi tutamandami, jatun mandajpaj caishuj huarmicuna tiyanajuj huasiman tigran carca. Chaipica, Saasgaz shuti eunuco runami ricujun carca. Chai cuitsaca, na ashtahuan jatun mandajpajman shamui ushanachu carca. Maijan shamuchun munashpapash, jatun mandaj shutipi cayajpillami, cutin shamuna carca.

¹⁵ Esterca, Mardoqueo runapaj taitapaj huauqui Abihail shuti runapaj ushimi carca. Mardoqueo runami, paipaj ushigutashna viñachirca. Esterca, jatun mandajpajman ña rina chayajpica, imatapash na ruranachu carca. Jatun mandajpaj huarmicunata ricuj Hegai shuti eunuco runa mandashcatallami rurana carca. Esterca, tucui paita ricujcunapajca, ashtahuan aligumi ricurijurca.

¹⁶ Jatun mandaj Asuero shuti runaca, ñami canchis huatata mandajurca. Tebet shuti chunga quillapimi Esterca, jatun mandajpajman pushai tucurca.

¹⁷ Jatun mandajca, tucui huarmicunata ashtahuan yalimi Estertaca juyarca. Esterca, jarihuan nara tacarishca tucui cuitsacunamanda yali aligumi, paipaj ñavipica ricurirca. Chaimandami, jatun mandajcunapaj coronata churachishpa, paitaca Vasti shuti huarmipaj randi jatun mandaj cachun churarca.

¹⁸ Chai jipaca jatun mandajca, pai churashca cati mandajcunamambash, paipajta ruraj runacunamambashmi, Esterta alicachishpa jatun micuita rurarca. Shinallata, llactacunapi causajcunapaj impuestotapash, ashatallami japichun mandarca. Jatun mandajcuna na mitsashpa caranshnallatami, ashtaca caranacunata carajurca.

Jatun mandajta huañuchingapa, pacalla parlanajujta Mardoqueo runa villashcamanda

¹⁹ Jarihuan nara tacarishca cuitsacunata cutin tandachinajujpimi Mardoqueo runaca, jatun mandajpaj huasi pungupi tiyajurca.

²⁰ Esterca, Mardoqueo runa mandashcashnami, maijan llactamanda cashcatapash, maijan ayllumanda cashcatapash na villarca. Esterca, Mardoqueo yachachishcashnami tucuita rurajurca.

²¹ Chai punllacunami, jatun mandajpaj pungupi ricuj Bigtán shuti, Teres shuti eunuco runacuna ninanda fiñarishpa parlanajujta Mardoqueo runaca, jatun mandajpaj huasi pungupi tiyajushpa uyarca. Paicunaca, jatun mandaj Asuero shuti runata huañuchingapami parlanajurca.

²² Mardoqueo runa chaita yachashpa, jatun mandaj Esterman villajpimi, Esterca: “Mardoqueo runami villahuan” nishpa, jatun mandaj Asuero shuti runaman villarca.

²³ Shina villashcata tapushpa ali yachashpami, chashnapacha cashcata yacharca. Chaimandami, chai ishcai eunuco runacunaca, huarcushpa sipinapi huarcui tucurca. Chashna tucushcataca, jatun mandaj imatalla rurashcata quilcashca libropimi tiyajun.