SOFONÍAS 3 - Diospaj Shimi

Jerusalenbi causajcunapaj juchataca, Diosmi anchuchinga

¹ Na cazuj, juchahuan mapayashca, imagutapash na charijcunata llaquichij pueblolla, ¡aij imachari tucunga!

² Dios rimashcatapash na uyanayachircachu, ali tucuchun llaquichijpipash na cazurcachu. Mandaj Diostapash na yariashpa causanajushpami, paicunapaj Taita Diospajmambash na quimirinajurca.

³ Paicunata mandajcunapash, paicunapaj chaupipica huacanajuj leongunashnami. Paicunapaj juezcunapash, tuta purij atujcunashna cayapaca, shuj tullutallapash na saquinshnami.

⁴ Paicunapaj villajcunaca, yanga umachishpalla villajcuna, yachashpata na cazuj runacunami. Paicunapaj curacunapash, Diospaj huasita mapayachishpami, mandashcatapash huaglichinajurca.

⁵ Mandaj Diosca, paicunapaj chaupipimi imatapash cashcatapacha rurajun. Paica, ima nalitapash na rurangachu. Paica, aliguta rurashpa mandanataca, tutamandata llujchishpami punlla ricuchinga. Shina ruranataca, napacha cungangachu. Ashtahuangarin jatun nalita ruraj runaca, imashna pingai tucunatapash na yachanllu.

⁶ “Llactacunatapash tucuchijuchunmi mandarcani. Paicuna causana huasicunapash, llaquinayaitami tucuchi tucushca. Ñangunatapash, jichushca pambatashna pipash na yali ushanallatami saquircani. Paicunapaj pueblocunaca, shuj runallapash na quedangacaman, llaquinayaita pipash na causai ushanalla quedangacamanmi, tucuchi tucushca.

⁷ ‘Chai llaquicunata ricushpaca, ñucataca manllangapashchari. Imamanda jarcashpa llaquichishcatapash cazungapashchari. Ñuca llaquichishcata paicuna cazujpica, paicuna causana huasicunatapash na chingachimanllu’ yashpami, chashna rurarcani. Ashtahuangarin paicunaca huaglicunatalla rurangapajmi, ucha rinajurca.

⁸ Shina cashcamanda Mandaj Dios ñucaca, cashnami nini: Cangunata llaquichina punlla chayangacaman, shuyaichilla. Ñucaca, tucui llactacunatapash, mandajuj llactacunatapash tandachishpa, nina japirinshna ninandapacha ñuca fiñarishcata talinshna, paicunapaj jahuapi cachamunatami yarishcalla cani. Ñucapajlla cachun munashpa nina japirinshna fiñarijpimi, tucui cai pachaca tucuringa.

⁹ Chai huatacunapica, ima mapatapash na rimajcuna cachunmi, gentecunataca cutin rurasha. Paicunaca, Mandaj Dios ñuca shutipilla tucuicuna mañanajuchun, shinallata tucuicuna shujllashna yarishpa, ñucatalla servinajuchunmi, chashna rurasha.

¹⁰ Etiopía llacta huaicu yacucunata yalishpa causajcunami, ñucataca mañanajunga. Caiman chaiman cachai tucushca israelcunami, imagutapash ñucaman carangapaj apamunajunga.

¹¹ Chai punllapica, ñucata na cazushpa, ima nalita rurashcamandapash, na pingai tucunguichu. Cangunapaj chaupimandaca, canguna ñucata na cazushcamanda, jariyashpa jatun tucuj runacunataca anchuchishami. Chaimandami ñucapajlla urcupica, cutinga na jariyashpa jatun tucunguichi.

¹² Cangunapaj chaupipica, na jariyashpa causaj, imagutapash na charij gentecunatallami saquisha. Paicunaca, Mandaj Dios ñucatallami yariashpa causanajunga.

¹³ Huaquin puchushca israelcunaca, ima nalitapash na rurangachu, llullaitallapash na llullanajungachu. Paicunapaj shimipica, umashpa parlanaca na tiangachu. Paicunataca, aliguta michijpimi puñunajunga. Chaipica, pipash na manllachingachu” ninmi.

¹⁴ Sion pueblopi causajcunalla, candaichiyari. Israelcunalla, ninanda cushijushpa caparichiyari. Jerusalenbi causajcunalla, tucui shungumandapacha ninanda cushijuichiyari.

¹⁵ Mandaj Diosca, cangunata llaquichinataca anchuchishcamari. Cangunata fiñajcunatapash, llujchishpami cachashca. Cangunapaj chaupipi israelcunata Jatun Mandajca, Mandaj Diosmi. Ima horapash llaquitaca na ashtahuan ricushpami causanguichi.

¹⁶ Chai punllacunapica, Jerusalenbi causajcunataca cashnami ninga: “Na manllanachu canguichi. Sion pueblopi causajcuna, cangunapaj maquipash ushai illaj tucuchunga, na saquinachu canguichi” ninajungami.

¹⁷ Ninan ushaita charij Mandaj Diosca, cangunapaj chaupipimi. Paimi, cangunataca quishpichinga. Cangunamandaca, ninandami cushijunga. Cangunata juyashpami, upalla canga. Cangunamandaca, cushijushpami candanga.

¹⁸ “Unai huatacunata, llaquichi tucushpalla causajcunataca tandachishami. Paicunaca, canguna purallatami carca. Paicuna nalicachi tucushpa rimai tucushcapash, llasha quipishnami carca.

¹⁹ Ricuichi, chai punllacunapica, cangunata llaquichishpa charijcunatapashmi, tucuillatami llaquichisha. Shina rurashpami, suchucunatapash quishpichishpa, chingashca purijujtapash tandachisha. Cangunataca, alicachi tucuchunmi, tucui cai pachapi rijsishca cachun churasha.

²⁰ Chai huatacunapica, ñucami cangunataca pushamusha. Chai huatacunapica, ñucami cangunataca tandachisha. Prezu apai tucushcacunataca, canguna ricujta cacharichishpami, tucui cai pachapi tiaj llactacunapi causajcuna rijsinajuchun, alicachinajuchun, caipi churasha” ninmi Mandaj Diosca.