ESTER 6 - Diospaj Shimi

Amán shuti runaca, Mardoqueo runata alicachinapachami tucushca

¹ Chai tutallatami, jatun mandajca puñui chingajpi na puñui tucujurca. Shinamandami, jatun mandaj imatalla rurashcacunata yaringapaj escribishca librota apamushpa, paipaj ñaupajpi leyishpa uyachinajuchun mandarca.

² Chaita leyishpaca, pungupi cuidashpa, jatun mandajta servij Bigtán shuti, Teres shuti ishcai eunuco runacuna, jatun mandaj Asuero shuti runata huañuchingapaj yarinajushcata Mardoqueo runa villajpi escribishcatami tarirca.

³ Chaita uyashpami jatun mandajca, cashna nirca: —Chashna villashcamandaca Mardoqueotaca, ¿imashnallapash alicachishcachu, na cashpaca ima alitapash carashcachu?— nircami. Shina nijpimi, pai jatun mandajta servij mandajcunaca: —Paita alicachingapaca, imatapash na rurashcachu— ninajurca.

⁴ Amán shuti runaca, pai rurachishca huarcushpa sipinapi Mardoqueo runata huarcuchun ningapajmi, jatun mandaj mandashpa tiajuj huasi patioman shamushca carca. Shinamandami, jatun mandajca: —¿Pita canlla patiopi?— nishpa tapurca.

⁵ Shina tapujpimi, jatun mandajta servijcunaca: —Ricui, Amán shuti runami shamushca. Patiopi shayajun— ninajurca. Shina nijpimi jatun mandajca, yaicumuchunlla nirca.

⁶ Amán shuti runa yaicumujpimi jatun mandajca, cashna nirca: —Shuj runata alicachingapaj jatun mandaj munajushpaca, ¿imatata rurana?— nircami. Shina nijpimi Amán shuti runaca, paipaj shungupica cashna yajurca: “Jatun mandajca, ¿pitashi ñucatapash ashtahuan yali alicachingapaj munan” yajurcami.

⁷ Chaimandami Amán shuti runaca, cashna nishpa tigrachirca: —Jatun mandaj alicachingapaj munajushca runataca,

⁸ jatun mandajpaj churajunatami apamushpa churachina. Shinallata jatun mandaj tiarina caballopimi tiachina, umapipash jatun mandajpaj coronatami churachina.

⁹ Churajunatapash, caballotapash, jatun mandaj churashca mandaj puramanda ashtahuan alicachi tucushca mandajcunapaj maquipimi cuna. Jatun mandaj alicachingapaj munajushca runataca, paicunami churachinga. Shinallata caballopi tiachishpa, pueblo plazaman pushashpami, paipaj ñaupajpi cashna nishpa caparichun mandana: ‘Jatun mandaj jatunyachingapaj munajushca runataca, cashnami alicachinga’ nichunmi mandana— nijurcami.

¹⁰ Shina nijpimi jatun mandajca, Amán shuti runata cashna nirca: —Ucha rishpa, can nishcashnallata churajunatapash, caballotapash apamugri. Ña apamushpaca, ñuca mandajuj huasi pungupi tiajuj, Judá llactamanda Mardoqueo runataca, can nishcashnallata rurangui. Can nishcataca, tucuita pactachingui— nircami.

¹¹ Chashna nijpimi, Amán shuti runaca churajunatapash, caballotapash apamurca. Churajunataca, Mardoqueo runaman churachishpami, Mardoqueo runa tiarishca caballota pueblo plazaman pushashpa, paipaj ñaupajpi cashna nishpa caparichun mandarca: “Jatun mandaj alicachingapaj munajushca runataca, cashnami alicachinga” nichunmi mandarca.

¹² Chai jipaca Mardoqueo runaca, jatun mandaj mandajuj huasi pungumanllatami tigrarca. Amán shuti runaca, ninandapacha llaquirishpami, paipaj umatapash quilpashca, paipaj huasiman ucha tigrarca.

¹³ Amán shuti runa ña chayashpaca, Zeres shuti paipaj huarmimambash, paipaj cumbacunamambashmi, tucui imalla tucushcata villarca. Chaita villajpimi, ali yachajushca cumbacunapash, Zeres shuti paipaj huarmipash, cashna ninajurca: —Judá llactamanda mirai chai Mardoqueo runapaj ñaupajpi ña urmai callarishca cashpaca, imatapash na rurai ushanguichu. Ashtahuangarin paipaj ñaupajpica urmanguipachami— ninajurcami.

¹⁴ Amán shuti runahuan, paicuna shina parlanajujpillatami, jatun mandajta servij eunuco runacunaca, jatun micuita Ester rurashcaman, Amán shuti runata ucha pushangapaj chayamunajurca.