Sant Marc 8 - Bibl Koad 21: Ar Bibl e Brezhoneg evit ar Vretoned

Pennad 8 Pevar mil den maget gant Jezuz (Eil kreskadur ar bara)

¹ En deizioù-se e oa gant Jezuz un niver bras a dud hag, evel n’o doa netra da zebriñ, e c’halvas e ziskibien hag e lavaras dezho:

² Truez am eus ouzh ar bobl-mañ, rak tri devezh a zo emaint em c’hichen ha n’o deus netra da zebriñ.

³ Ha mar kasan anezho war yun d’o ziez, o nerzh a vanko dezho en hent, rak darn anezho a zo deuet a-bell.

⁴ E ziskibien a respontas dezhañ: Penaos e c’hellfemp kavout bara a-walc’h da bredañ anezho en ul lec’h distro?

⁵ Eñ a c’houlennas outo: Pet bara hoc’h eus? Hag int a lavaras: Seizh.

⁶ Neuze e c’hourc’hemennas d’ar bobl azezañ war an douar, e kemeras ar seizh bara hag e trugarekaas, o zorras hag o roas d’e ziskibien evit m’o lodennjent. Hag o lodennjont d’ar bobl.

⁷ Bez’ e oa ivez peskedigoù hag, o vezañ o benniget, e c’hourc’hemennas o reiñ ivez dezho.

⁸ Debriñ a rejont hag o doe a-walc’h, hag e tegasjont seizh panerad eus an tammoù a oa manet.

⁹ Ar re o doa debret a oa war-dro pevar mil. Goude-se o c’hasas en o hent.

Goell ar farizianed

¹⁰ O vont kerkent er vag gant e ziskibien, ez eas e kostezioù Dalmanuta.

¹¹ Ar farizianed a zeuas hag en em lakaas da riotal anezhañ, o c’houlenn digantañ, evit e demptañ, ur mirakl eus an neñv.

¹² O huanadiñ en e spered, e lavaras: Perak e c’houlenn ar rummad-mañ ur mirakl? Me a lavar deoc’h e gwirionez, ne vo roet mirakl ebet d’ar rummad-mañ.

¹³ Hag, o vezañ o c’huitaet, ez eas adarre er vag hag e tremenas en tu all.

¹⁴ Ankounac’haet o doa kemer bara ganto, ha n’o doa nemet ur bara er vag ganto.

¹⁵ Eñ a reas outo an difenn-mañ: En em virit gant evezh eus goell ar farizianed hag eus goell Herodez.

¹⁶ Int a soñjas etrezo hag a lavaras: Abalamour n’hon eus ket a vara eo.

¹⁷ Jezuz, o vezañ anavezet kement-se, a lavaras dezho: Perak e soñjit ez eo abalamour n’hoc’h eus ket kemeret a vara? Bez’ oc’h c’hoazh hep skiant c’hoazh ha ne gomprenit ket? Bepred eo kaletaet ho kalon?

¹⁸ O kaout daoulagad, ne welit ket? O kaout divskouarn, ne glevit ket? Ha n’hoc’h eus ket a soñj?

¹⁹ Pa dorris pemp bara evit pemp mil den, pet panerad leun a dammoù chomet a zilerc’h ho poa dastumet? Int a lavaras dezhañ: Daouzek.

²⁰ Ha pa dorris ar seizh bara evit ar pevar mil den, pet panerad leun a dammoù ho poa dastumet? Int a lavaras: Seizh.

²¹ Hag e lavaras dezho: Penaos eta ne gomprenit ket c’hoazh?

Jezuz a yac’ha un den dall e Betsaida

²² O vezañ deuet da Vetsaida, e voe degaset dezhañ un den dall hag en pedjont da stekiñ outañ.

²³ Kemer a reas dorn an dall hag en kasas er-maez eus ar bourc’h. Krañch a lakaas war e zaoulagad hag, o vezañ lakaet e zaouarn warnañ, e c’houlennas digantañ hag eñ a wele un dra bennak.

²⁴ Eñ, o vezañ sellet, a lavaras: Gwelout a ran tud evel gwez o kerzhout.

²⁵ Eñ a lakaas adarre e zaouarn war e zaoulagad hag a lavaras dezhañ sellout. Yac’haet e voe hag e wele holl fraezh mat.

²⁶ Hag e kasas anezhañ d’e di, o lavarout: N’a ket er bourc’h ha na lavar ket an dra-mañ da zen eus ar bourc’h.

Disklêriadenn Bêr

²⁷ Jezuz a yeas gant e ziskibien e bourc’hioù Kezarea-Filip. War an hent, e c’houlennatas e ziskibien hag e lavaras: Piv a lavar an dud ez on?

²⁸ Respont a rejont: Yann-Vadezour; darn all, Elia; ha darn all, unan eus ar brofeded.

²⁹ Eñ a lavaras dezho: Ha c’hwi, piv a lavarit ez on? Pêr a respontas dezhañ: Te eo ar C’hrist.

³⁰ Hag e tifennas gwall start outo lavarout kement-se anezhañ da zen.

Jezuz a ziougan e varv

³¹ Neuze en em lakaas da zisklêriañ dezho e oa ret da Vab an den gouzañv kalz a draoù, bezañ taolet kuit gant an henaourien, gant ar veleien vras ha gant ar skribed, bezañ lakaet d’ar marv, hag adsevel a varv tri devezh goude.

³² Hag e lavare ar c’homzoù-se dezho sklaer-mat. Neuze Pêr, o vezañ e gemeret a-du, en em lakaas d’e repren.

³³ Met eñ, o tistreiñ hag o sellout ouzh e ziskibien, a c’hourdrouzas Pêr hag a lavaras dezhañ: A-dreñv din, Satan! Rak da soñjezonoù n’emaint ket hervez an traoù a sell ouzh Doue, met hervez an traoù a sell ouzh an dud.

Heuliañ Jezuz

³⁴ O c’hervel ar bobl gant e ziskibien, e lavaras dezho: Mar fell da unan bennak dont war va lerc’h, ra raio dilez anezhañ e-unan, ra gemero e groaz ha ra heulio ac’hanon.

³⁵ Rak piv bennak a fello dezhañ saveteiñ e vuhez he c’hollo, met piv bennak a gollo e vuhez abalamour din ha d’an Aviel he saveteo.

³⁶ Rak petra a dalvfe d’un den gounit ar bed holl, ma kollfe e ene?

³⁷ Petra a rofe an den e trok ouzh e ene?

³⁸ Rak piv bennak en devo bet mezh ac’hanon hag eus va c’homzoù, e-touez ar rummad-mañ, avoultrer ha pec’her, Mab an den ivez en devo mezh anezhañ pa zeuio e gloar e Dad gant an aelez santel.