Jozue 1 - Bibl Koad 21: Ar Bibl e Brezhoneg evit ar Vretoned

Pennad 1 Jozue e penn Israel

¹ Goude marv Moizez servijer an AOTROU , setu, an AOTROU a gomzas da Jozue mab Nun, servijer Moizez, o lavarout:

² Moizez va servijer a zo marv. Bremañ sav, tremen ar Jordan-mañ, te hag an holl bobl-se, evit mont er vro a roan da vibien Israel.

³ Pep lec'h ma vac'ho sol ho treid warnañ, a roan deoc'h, evel ma em eus lavaret da Voizez.

⁴ Ho harzoù a vo adalek ar gouelec'h hag al Liban-mañ, adalek ar stêr, ar stêr Eufratez, holl vro an Hitited, betek ar Mor Bras er c'huzh-heol.

⁵ Den ne zalc'ho dirazout e-pad holl zeizioù da vuhez; me a vo ganit evel ma'z on bet gant Moizez, ne zilaoskin ket ac'hanout, ne zilezin ket ac'hanout.

⁶ En em galoneka ha bez kreñv! Rak te eo a lakaio ar bobl-mañ da berc'hennañ ar vro am eus touet d'o zadoù reiñ dezho.

⁷ En em galoneka ha bez kreñv-meurbet, evit ober diouzh an holl lezenn en deus kemennet dit Moizez va servijer; ne zistroi nag a-zehou nag a-gleiz, evit ober berzh dre holl ma'z i.

⁸ Ra ne bellaio ket al levr-mañ eus al lezenn diouzh da c'henoù, prederiañ a ri warnañ deiz ha noz, evit ober diouzh kement a zo skrivet ennañ, rak neuze e ri tro-vat ez hent, ha neuze e ri berzh.

⁹ Ha ne'm eus ket gourc'hemennet dit: En em galoneka ha bez kreñv? Na spont ket ha na'z pez ket aon, rak an AOTROU da Zoue a vo ganit dre holl ma'z i.

¹⁰ Neuze Jozue a roas urzhioù da ofiserien ar bobl o lavarout:

¹¹ Tremenit e-barzh ar c'hamp ha roit urzhioù d'ar bobl o lavarout: Kempennit pourvezioù, rak a-benn tri devezh e tremenot ar Jordan-mañ, evit mont da berc'hennañ ar vro a ro deoc'h an AOTROU ho Toue da berc'hennañ.

¹² Jozue a gomzas ivez d'ar Rubeniz, d'ar C'hadiz ha da hanter-veuriad Manase o lavarout:

¹³ Ho pet soñj eus ar c'homzoù en deus gourc'hemennet deoc'h Moizez servijer an AOTROU o lavarout: An AOTROU ho Toue en deus roet diskuizh deoc'h hag en deus roet deoc'h ar vro-se.

¹⁴ Ho kwragez, ho pugaligoù hag ho loened a chomo er vro en deus roet deoc'h Moizez en tu-mañ d'ar Jordan, met c'hwi holl, tud kadarn ha kreñv, a dremeno harnezet dirak ho preudeur, hag e sikourot anezho,

¹⁵ ken na roio diskuizh an AOTROU d'ho preudeur evel deoc'h, ha ken na berc'hennint int ivez ar vro emañ an AOTROU ho Toue o vont da reiñ dezho. Hag e tistroiot d'ar vro a zo deoc'h da berc'hennañ anezhi, an hini en deus roet deoc'h Moizez servijer an AOTROU en tu-mañ d'ar Jordan, war-zu ar sav-heol.

¹⁶ Hag e respontjont da Jozue o lavarout: Ni a raio kement ec'h eus gourc'hemennet deomp, ni a yelo e kement lec'h ma kasi ac'hanomp,

¹⁷ ni a sento ouzhit evel hon eus sentet ouzh Moizez. Nemet, ra vo an AOTROU da Zoue ganit evel ma'z eo bet gant Moizez.

¹⁸ Pep den a zisento ouzh da urzhioù ha na sento ket ouzh da gomzoù e kement ha ma c'hourc'hemenni deomp, a vo lakaet d'ar marv. Nemet, en em galoneka ha bez kreñv.