Sant Ian 1 - Bibl Koad 21: Ar Bibl e Brezhoneg evit ar Vretoned

Pennad 1 Ar Ger a zo deuet da vezañ kig

¹ Er penn-kentañ e oa ar Ger, hag ar Ger a oa gant Doue, hag ar Ger a oa Doue.

² Er penn-kentañ e oa gant Doue.

³ An holl draoù a zo bet graet drezañ, ha netra eus ar pezh a zo bet graet n’eo bet graet heptañ.

⁴ Ennañ e oa ar vuhez, hag ar vuhez a oa sklêrijenn an dud.

⁵ Ar sklêrijenn a lugern en deñvalijenn hag an deñvalijenn n’he deus ket he degemeret.

⁶ Bez’ e voe un den kaset a-berzh Doue, Yann a oa e anv.

⁷ Dont a reas da vezañ test, da reiñ testeni d’ar sklêrijenn, evit ma kredje an holl drezañ.

⁸ Ne oa ket ar sklêrijenn, met kaset e oa da reiñ testeni d’ar sklêrijenn,

⁹ ar sklêrijenn wirion hag a sklaera kement den a zeu er bed.

¹⁰ Er bed e oa hag ar bed a zo bet graet gantañ, met ar bed n’en deus ket e anavezet.

¹¹ Deuet eo da gavout e re, hag e re n’o eus ket e zegemeret.

¹² Met d’ar re holl o deus e zegemeret, en deus roet ar galloud da vezañ graet bugale da Zoue, da c’houzout eo d’ar re holl a gred en e anv,

¹³ ar re n’int ket bet ganet eus ar gwad, nag eus bolontez ar c’hig, nag eus bolontez an den, met eus Doue.

¹⁴ Ar Ger a zo bet graet kig hag en deus chomet en hon touez, leun a c’hras hag a wirionez, ha gwelet hon eus e c’hloar, ur gloar evel hini ar Mab nemetañ deuet eus an Tad.

¹⁵ Yann a roas testeni dezhañ pa grias o lavarout: Hemañ eo an hini am eus lavaret diwar e benn: An hini a zeu war va lerc’h a zo dreiston, rak a-raok din e oa.

¹⁶ Ni holl hon eus resevet eus e leunder, ha gras war c’hras.

¹⁷ Rak al lezenn a zo bet roet dre Voizez, ar c’hras hag ar wirionez a zo deuet dre Jezuz-Krist.

¹⁸ Den n’en deus biskoazh gwelet Doue. Ar Mab nemetañ a zo en askre an Tad, eo an hini en deus e roet da anavezout.

Testeni Yann-Vadezour

¹⁹ Setu amañ testeni Yann, pa gasas ar Yuzevien eus Jeruzalem beleien ha Levited da c’houlenn digantañ: Piv out-te?

²⁰ Anzav a reas ha ne nac’has ket, ya anzav a reas: N’on ket ar C’hrist.

²¹ Hag e c’houlennjont digantañ: Piv out eta? Bez’ out Elia? Eñ a lavaras: N’on ket. Bez’ out ar profed? Eñ a respontas: Nann.

²² Int a lavaras eta dezhañ: Piv out? Evit ma roimp respont d’ar re o deus hor c’haset. Petra a lavarez ac’hanout da-unan?

²³ Eñ a lavaras: Me eo mouezh an hini a gri el lec’h distro: Grit eeun hent an Aotrou, evel m’en deus lavaret ar profed Izaia.

²⁴ Ar re a oa bet kaset a oa farizianed.

²⁵ Goulenn a rejont digantañ: Perak e vadezez, ma n’out nag ar C’hrist, nag Elia, nag ar profed?

²⁶ Yann a respontas dezho: Me a vadez en dour, met unan bennak a zo en ho touez ha n’anavezit ket anezhañ.

²⁷ Hennezh eo an hini a zeu war va lerc’h hag a zo dreiston, ha n’on ket dellezek da zieren korreenn e votoù.

²⁸ Kement-mañ a c’hoarvezas e Betabara en tu all d’ar Jordan, e-lec’h ma vadeze Yann.

²⁹ An deiz war-lerc’h, Yann a welas Jezuz o tont d’e gavout hag a lavaras: Setu Oan Doue, an hini a lam kuit pec’hed ar bed.

³⁰ Eñ eo an hini am eus lavaret diwar e benn: Dont a ra war va lerc’h un den hag a zo dreiston, rak a-raok din e oa.

³¹ Me n’anavezen ket anezhañ, met deuet on da vadeziñ en dour evit ma vo disklêriet da Israel.

³² Yann a roas an testeni-mañ, o lavarout: Gwelet em eus ar Spered o tiskenn eus an neñv evel ur goulm hag o chom warnañ.

³³ Me n’anavezen ket anezhañ, met an hini en deus va c’haset da vadeziñ en dour en deus lavaret din: An hini a weli ar Spered o tiskenn hag o chom warnañ, hennezh eo an hini a vadez er Spered-Santel.

³⁴ Hag em eus gwelet, hag em eus roet testeni eo eñ Mab Doue.

An diskibien gentañ

³⁵ An deiz war-lerc’h, Yann a oa c’hoazh eno gant daou eus e ziskibien,

³⁶ hag o welout Jezuz a valee, e lavaras: Setu Oan Doue.

³⁷ An daou ziskibl en klevas o komz evel-se hag a heulias Jezuz.

³⁸ Jezuz o vezañ distroet hag o welout e heulient anezhañ, a lavaras dezho: Petra a glaskit? Respont a rejont dezhañ: Rabbi, da lavarout eo Mestr, pelec’h e chomez?

³⁹ Eñ a lavaras dezho: Deuit ha gwelit. Mont a rejont hag e weljont pelec’h e chome, hag e chomjont gantañ an deiz-se. War-dro an dekvet eur e oa.

⁴⁰ Andrev breur Simon-Pêr, a oa unan eus an daou o doa klevet ar pezh en doa lavaret Yann hag o doa heuliet anezhañ.

⁴¹ Eñ a gavas da gentañ e vreur e-unan, Simon, hag a lavaras dezhañ: Kavet hon eus ar Mesiaz, da lavarout eo ar C’hrist.

⁴² Hag e tegasas anezhañ da Jezuz. Jezuz, o vezañ sellet outañ, a lavaras dezhañ: Te eo Simon mab Jona; galvet e vi Kefaz, da lavarout eo Pêr.

⁴³ An deiz war-lerc’h, Jezuz a c’hoantaas mont e Galilea. Kavout a reas Filip hag e lavaras dezhañ: Heuilh ac’hanon.

⁴⁴ Filip a oa eus Betsaida, kêr Andrev ha Pêr.

⁴⁵ Filip a gavas Natanael hag a lavaras dezhañ: Kavet hon eus an hini a zo bet skrivet diwar e benn gant Moizez el lezenn ha gant ar brofeded: Jezuz mab Jozef, eus Nazared.

⁴⁶ Natanael a lavaras dezhañ: Hag eus Nazared e c’hell dont un dra vat bennak? Filip a lavaras dezhañ: Deus ha gwel.

⁴⁷ Jezuz, o welout Natanael o tont d’e gavout, a lavaras diwar e benn: Setu ur gwir Israelad ha n’eus troidell ebet ennañ.

⁴⁸ Natanael a lavaras dezhañ: A-belec’h ec’h anavezez ac’hanon? Jezuz a respontas dezhañ: A-raok ma c’halvas Filip ac’hanout, pa oas dindan ar wezenn-fiez, da welet em eus.

⁴⁹ Natanael a respontas dezhañ: Mestr, te eo Mab Doue, te eo roue Israel.

⁵⁰ Jezuz a respontas dezhañ: Abalamour ma em eus lavaret dit em eus da welet dindan ar wezenn-fiez, e kredez? Traoù brasoc’h eget ar re-mañ a weli.

⁵¹ Hag e lavaras dezhañ: E gwirionez, e gwirionez, me a lavar deoc’h, a-vremañ e welot an neñv digor hag aeled Doue o pignat hag o tiskenn a-us da Vab an den.