Filemon 1 - Bibl Koad 21: Ar Bibl e Brezhoneg evit ar Vretoned

¹ Paol, prizoniad Jezuz-Krist, ha Timote hor breur, da Filemon, hor c’haret-mat hag hor c’henlabourer,

² d’hor c’haret-mat Apfia, da Arkipuz hor c’henvrezelour, ha d’an Iliz a zo en da di:

³ Ar c’hras hag ar peoc’h ra vo roet deoc’h a-berzh Doue hon Tad hag an Aotrou Jezuz-Krist!

Pedennoù Paol

⁴ Trugarekaat a ran va Doue dalc’hmat, o kaout soñj ac’hanout em pedennoù,

⁵ o vezañ klevet diwar-benn ar feiz ac’h eus en Aotrou Jezuz ha da garantez evit an holl sent,

⁶ evit ma vo efedus oberenn da feiz nerzhus en ur lakaat da c’houzout an holl vat en em ra en ho touez e Jezuz-Krist.

⁷ Rak, va breur, da garantez he deus roet deomp ul levenez vras hag ur frealz mat, dre ma ec’h eus laouenaet kalonoù ar sent.

Goulenn Baol diwar-benn Onezim

⁸ Dre-se, petra bennak ma em eus e Krist ul librentez vras da c’hourc’hemenn dit ar pezh a zo dereat,

⁹ koulskoude e pedan kentoc’h ac’hanout en anv ar garantez, o vezañ ar pezh ez on, Paol koshaet, ha bremañ zoken prizoniad Jezuz-Krist,

¹⁰ e pedan ac’hanout evit va bugel Onezim, am eus ganet o vezañ er chadennoù,

¹¹ a zo bet gwechall didalvoud dit, met a zo bremañ talvoudek dit koulz ha din, hag a gasan en-dro dit.

¹² Degemer anezhañ evel va c’halon va-unan.

¹³ C’hoant em boa d’e zerc’hel ganin, evit ma servije ac’hanon en da lec’h en ereoù ma’z on evit an Aviel.

¹⁴ Met n’eo ket bet fellet din ober netra hep da ali, evit na vefe ket da vadober evel un dra ret, met a volontez vat.

¹⁵ Rak marteze n’eo bet pellaet diouzhit nemet evit un nebeud amzer, evit ma kavi anezhañ a-nevez da viken,

¹⁶ n’eo ket mui evel ur sklavour, met dreist ur sklavour, evel ur breur karet-mat, dreist-holl ganin-me ha muioc’h c’hoazh ganit-te, hervez ar c’hig hag hervez an Aotrou.

¹⁷ Mar sellez eta ac’hanon evel unanet dit, degemer anezhañ eveldon va-unan.

¹⁸ Mar en deus graet ur gaou bennak ouzhit pe mar dle dit un dra bennak, laka kement-se war va c’hont.

¹⁹ Me Paol a skriv kement-mañ eus va dorn va-unan, me en paeo hep lavarout dit penaos en em dleez da-unan din.

²⁰ Ya, breur, ra resevin ar blijadur-se diganit en Aotrou, laouena va c’halon en Aotrou.

²¹ Skrivañ a ran dit leun a fiziañs e senti ouzhin, oc’h anavezout penaos e ri zoken muioc’h eget na lavaran.

Distro Paol

²² War un dro, kempenn din ul lojeiz, rak esperout a ran e vin rentet deoc’h dre ho pedennoù.

²³ Epafraz, va c’henbrizoniad e Jezuz-Krist,

²⁴ Mark, Aristark, Demaz, ha Lukaz, va c’henlabourerien, a salud ac’hanout.

²⁵ Ra vo gras hon Aotrou Jezuz-Krist gant ho spered! Amen.