Adlezenn 25 - Bibl Koad 21: Ar Bibl e Brezhoneg evit ar Vretoned

Pennad 25

¹ Pa savo un tabut etre tud, hag e tostaint ouzh al lez-varn evit bezañ barnet, e vo reishaet an hini reizh ha kondaonet an hini fall.

² Mard eo dellezek a daolioù an hini fall, ar barner a raio e deurel d'an douar, hag e vo skoet dirazañ eus un niver a daolioù e-keñver e dorfed.

³ Ne vo ket roet dezhañ muioc'h eget daou-ugent taol, gant aon na vefe da vreur disprizet dirak da zaoulagad mar befe pilet muioc'h, dre ur c'hastiz re vras.

⁴ Ne erei ket e c'henoù d'an ejen a vac'ho ar greun.

⁵ Pa vo o chom breudeur a-gevret, hag e varvo unan anezho hep mab, gwreg an hini marv ne zimezo ket er-maez, d'un diavaeziad; he breur-kaer a yelo d'he c'havout, he c'hemero evit e wreg, evel ma'z eo dereat d'ur breur-kaer.

⁶ Ar mab kentañ-ganet a c'hano a adsavo anv ar breur marv, evit na vo ket diverket e anv eus Israel.

⁷ Ma ne fell ket d'an den-se kemer e c'hoar-gaer, e pigno e c'hoar-gaer betek an nor da gavout an henaourien hag e lavaro: Va breur-kaer ne fell ket dezhañ adsevel anv e vreur en Israel, ne raio ket evel ma'z eo dereat d'ur breur-kaer.

⁸ Henaourien kêr a c'halvo anezhañ hag a gomzo outañ. Mar chom start ha ma lavar: Ne fell ket din kemer anezhi,

⁹ neuze e c'hoar-gaer a dostaio outañ dirak an henaourien hag a lamo e votez diwar e droad hag a grañcho ouzh e zremm hag a responto o lavarout: Evel-se e vo graet d'an den na sav ket ti e vreur.

¹⁰ Hag e anv a vo galvet en Israel: ti an divotet.

¹¹ Pa en em ganno gwazed etrezo, an eil a-enep d'egile, mar tosta gwreg unan da zieubiñ he fried eus dorn an hini a bil anezhañ hag, oc'h astenn he dorn, e krog ennañ dre e gevrennoù mezhus,

¹² e troc'hi he dorn dezhi, da lagad a vo didruez.

¹³ Na'z po ket ez sac'h daou seurt mein da bouezañ, unan bras hag unan bihan.

¹⁴ Na'z po ket ez ti daou seurt efa, unan bras hag unan bihan.

¹⁵ Ur maen peurvat ha leal az po, un efa peurvat ha leal az po, evit ma vo hiraet da zeizioù war an douar a ro dit an AOTROU da Zoue.

¹⁶ Rak piv bennak a ra an traoù-se, piv bennak a ra direizhderioù, a zo un euzhusted d'an AOTROU da Zoue.

¹⁷ Az pez soñj eus ar pezh a reas dit Amalek war an hent, pa'z ejoc'h kuit eus an Ejipt,

¹⁸ penaos e teuas a-ziarbenn dit war an hent hep doujañ Doue, o vec'hiañ ac'hanout war da lerc'h hag o pilat da holl re wan, pa oas da-unan dinerzh ha skuizh.

¹⁹ P'en devo roet diskuizh an AOTROU da Zoue dit eus da holl enebourien tro-war-dro, er vro a ro dit an AOTROU da Zoue evel hêrezh evit he ferc'hennañ, e tiverki eñvor Amalek a-zindan an neñv. N'ankounac'ha ket!