Adlezenn 1 - Bibl Koad 21: Ar Bibl e Brezhoneg evit ar Vretoned

Pennad 1 Mont kuit eus Horeb. Dibab ar pennoù. Ar spierien kaset. Disentidigezh ar bobl

¹ Setu ar c'homzoù a lavaras Moizez da Israel a-bezh, en tu-mañ d'ar Jordan, er gouelec'h, er blaenenn a-dal da Suf, etre Paran, Tofel, Laban, Hazerod ha Di-Zahab.

² Unnek devezh a zo adalek Horeb, dre hent Menez Seir, betek Kadesh-Barnea.

³ D'an daou-ugentvet bloaz, d'an unnekvet miz, d'an deiz kentañ eus ar miz, Moizez a lavaras da vibien Israel kement en doa gourc'hemennet an AOTROU dezhañ evito,

⁴ goude m'en doe trec'het Sihon, roue an Amoreaned a oa o chom en Hesbon, hag Og, roue Basan a oa o chom en Ashtarod hag en Edrei.

⁵ D'an tu-mañ d'ar Jordan, e bro Voab, Moizez en em lakaas da zisklêriañ al lezenn-se o lavarout:

⁶ An AOTROU hon Doue a gomzas ouzhimp en Horeb hag a lavaras: A-walc'h oc'h chomet er menez-mañ.

⁷ Distroit hag it kuit, deuit war-zu menez an Amoreaned hag el lec'hioù tro-dro, d'ar blaenenn, d'ar menez, d'an draonienn, d'ar c'hreisteiz, da aod ar mor, da vro ar Gananeiz, d'al Liban betek ar stêr vras, ar stêr Efratez.

⁸ Setu, lakaet em eus ar vro dirazoc'h, kit ha dalc'hit ar vro en doa touet an AOTROU reiñ d'ho tadoù, da Abraham, da Izaak, da Jakob ha d'o lignez war o lerc'h.

⁹ Komzet em eus ouzhoc'h en amzer-se ha lavaret em eus: Ne c'hellan ket va-unan dougen ac'hanoc'h.

¹⁰ An AOTROU ho Toue en deus ho kresket, ha setu-c'hwi, hiziv, niverus evel stered an neñv.

¹¹ Ra gresko ac'hanoc'h c'hoazh an AOTROU, Doue ho tadoù, mil gwech kement all, ha ra vennigo ac'hanoc'h evel m'en deus lavaret deoc'h!

¹² Penaos e c'hellin va-unan dougen ho poanioù, ho pec'hioù hag ho tabutoù?

¹³ Roit eus ho meuriadoù tud fur, poellek hag anavezet, hag e lakain anezho da bennoù warnoc'h.

¹⁴ Respontet hoc'h eus o lavarout: Mat eo ober ar pezh ec'h eus lavaret.

¹⁵ Kemeret em eus neuze pennoù ho meuriadoù, tud fur hag anavezet, ha lakaet em eus anezho evel pennoù warnoc'h: kabitened a vilieroù, kabitened a gantoù, kabitened a hanter-gantoù, kabitened a zegoù hag ofiserien e-touez ho meuriadoù.

¹⁶ En amzer-se em eus roet urzhioù d'ho parnerien o lavarout: Selaouit ho preudeur ha barnit gant reizhder etre un den hag e vreur pe un diavaeziad.

¹⁷ Ne reot van eus diavaez an dud er barnedigezhioù, selaou a reot an hini bihan evel an hini bras, n'ho po aon rak den ebet, rak ar varn a zo da Zoue, hag e lakaiot da zont dirazon an dra a vo re ziaes evidoc'h, ha me he c'hlevo.

¹⁸ En amzer-se em eus roet urzhioù deoc'h diwar-benn an traoù ho poa d'ober.

¹⁹ Aet omp kuit eus Horeb ha kerzhet hon eus dre holl er gouelec'h bras hag euzhus-se, war-zu menez an Amoreaned, evel m'en doa gourc'hemennet an AOTROU hon Doue deomp, ha deuet omp betek Kadesh-Barnea.

²⁰ Lavaret em eus deoc'h: Erru oc'h betek menez an Amoreaned, a ro deomp an AOTROU hon Doue.

²¹ Setu, an AOTROU da Zoue a laka dirazout ar vro: pign, kemer dalc'h anezhañ, evel m'en deus lavaret an AOTROU, Doue da dadoù. Na'z pez ket aon ha bez dispont!

²² Goude bezañ tostaet ouzhin, hoc'h eus lavaret: Kasomp tud a-raok deomp evit spiañ ar vro hag evit rentañ kont deomp eus an hent a bignimp drezañ hag eus ar c'hêrioù ma'z aimp e-barzh.

²³ Ar c'homzoù-se o deus plijet din. Kemeret em eus daouzek den eus ho touez, un den dre veuriad.

²⁴ Mont a rejont hag e pignjont ar menez, hag e teujont betek gwazh Eshkol hag e weljont ar vro.

²⁵ Kemeret o deus en o daouarn frouezh eus ar vro da zegas anezho deomp, hag e rentjont kont deomp o lavarout: Ar vro a ro deomp an AOTROU hon Doue a zo mat.

²⁶ C'hwi ne fellas ket deoc'h pignat enni, met disentet hoc'h eus da urzh an AOTROU ho Toue.

²⁷ Grozmolet hoc'h eus en ho teltennoù o lavarout: Dre ma kasae an AOTROU ac'hanomp eo en deus hol lakaet da vont kuit eus bro Ejipt, evit hol lezel etre daouarn an Amoreaned d'hon distrujañ.

²⁸ Da belec'h emaomp o pignat? Hor breudeur o deus lakaet hor c'halonoù da deuziñ o lavarout: Ur bobl vrasoc'h hag a vent uheloc'h egedomp eo; ar c'hêrioù a zo bras ha mogeriet betek an neñv; gwelet hon eus eno mibien Anak.

²⁹ Lavaret em eus: Na spontit ket ha n'ho pet ket aon dirazo.

³⁰ An AOTROU ho Toue a gerzh dirazoc'h hag a stourmo e-unan evidoc'h, evel m'en deus graet evidoc'h en Ejipt dirak ho taoulagad,

³¹ hag er gouelec'h, e-lec'h ma ec'h eus gwelet an AOTROU da Zoue o tougen ac'hanout evel ma toug un den e vab, a-hed an hent hoc'h eus graet evit dont betek al lec'h-se.

³² En desped da gement-se n'hoc'h eus ket kredet en AOTROU ho Toue,

³³ a yae en ho raok war an hent evit klask ul lec'h da sevel ho teltennoù, en tan e-pad an noz evit diskouez deoc'h an hent a gerzhec'h warnañ, hag er goabrenn e-pad an deiz.

³⁴ An AOTROU a glevas mouezh ho komzoù hag a fuloras, hag e touas o lavarout:

³⁵ Hini ebet eus tud ar rummad fall-se ne welo ar vro vat am eus touet reiñ d'ho tadoù,

³⁶ nemet Kaleb mab Jefune. Eñ a welo anezhi, hag e roin dezhañ, dezhañ ha d'e vibien, ar vro en deus baleet enni, dre m'en deus heuliet e leunder an AOTROU.

³⁷ An AOTROU a fuloras a-enep din ivez en abeg deoc'h, ha lavaret en deus: Te kennebeut ned i ket enni.

³⁸ Jozue mab Nun, da servijer, a yelo enni; kaloneka anezhañ rak eñ eo a lakaio Israel da berc'hennañ e hêrezh.

³⁹ Ho pugale vihan, hoc'h eus lavaret diwar o fenn e vijent ur preizh enni, hag ho mibien n'anavezont ket hiziv ar pezh a zo mat pe fall, int eo ar re a yelo enni, dezho e roin anezhi, int a berc'henno anezhi.

⁴⁰ Met c'hwi, distroit ha kit d'ar gouelec'h war-zu ar Mor Ruz.

⁴¹ Respontet hoc'h eus o lavarout: Pec'het hon eus a-enep an AOTROU, pignat a raimp hag e stourmimp evel m'en deus gourc'hemennet an AOTROU hon Doue. Gourizet hoc'h eus pep hini e armoù brezel, hag e oac'h prest da bignat war ar menez.

⁴² An AOTROU a lavaras din: Lavar dezho: Na bignit ket ha na stourmit ket, rak n'on ket en ho touez, gant aon na vefec'h pilet gant hoc'h enebourien.

⁴³ Komzet em eus ouzhoc'h met n'hoc'h eus ket selaouet, disentet hoc'h eus da urzh an AOTROU, pignet oc'h gant lorc'h war ar menez.

⁴⁴ An Amoreaned, hag a oa o chom er menez-se, a zeuas a-ziarbenn deoc'h hag a redas war ho lerc'h evel ma ra ar gwenan; pilet oc'h bet e Seir betek Horma.

⁴⁵ D'ho tistro hoc'h eus gouelet dirak an AOTROU, met an AOTROU ne selaouas ket ho mouezh ha ne roas ket e skouarn deoc'h.

⁴⁶ Chomet oc'h e Kadesh kalz a zeizioù, keit ha ma chomjoc'h eno.