JOSHUA 3 - Bukuit Ne Tilil

Kolandoe `Israel Jordan

¹ Kong'eet anyun Joshua karon miising', ak koba eng' Shitim agoi koit Jordan, `ineendet ak piigap Israel tugul. Kiruiyo yooto kotom kolanda.

² Kingo pata peetuusyek somogu, koba kiptainik kobun kwenutap nganaseet

³ ak kong'at piik koleenji, “Ye ogeer moingetap arorutyetap Kamuktaindet ne Toroor Kamuktaindeng'wong', ak Lawiik che tisiik koibei, ong'eetyee anyun eng' ole omi ak osup.

⁴ Osup si kobiit onai ooreet ne nyoljinok obun, amu tomo obune orani. Ago oloochiine ak moinget eng' olo po mitainik eliphuut agenge; amoriikyi.”

⁵ Ki leenji `Joshua piik, “Oanyinygei okweek; amu yaei Kamuktaindet ne Toroor kwang'utik mutai eng' kwenung'wong'.”

⁶ Ki ng'alaalji `Joshua tisiik koleenji, “Oganap moingetap arorutyet ak oip olande ondoe piik.” Koip anyun moingetap arorutyet ak koba kondoe piik.

⁷ Ki leenji `Kamuktaindet ne Toroor Joshua, “Atau rani atoroorin eng' taitap Israel tugul, si kobiit konai icheek kole ami kobooten ko uu ye ki ami kobooto Musa.

⁸ Ng'at tisiik che ibei moingetap arorutyet ileenji, ‘Ye oit ngeguutap peegap Jordan, otononse.’ ”

⁹ Koleenji anyun `Joshua piigap Israel, “Obwa yu si ogas ng'aleegap Kamuktaindet ne Toroor Kamuktaindeng'wong'.”

¹⁰ Ki testai Joshua kole, “Onae eng' ni ole mi kwenung'wong' Kamuktaindet ne sabei, ak oonei ineendet eng' taing'wong' ne matiny Kanaanik, Hitik, Hibik, Perisik, Girgasik, Amorik ak Jebusik.

¹¹ Ogeero, choorchingei Jordan moingetap arorutyetap Kiptaiyat ne po ng'wony komugul kondoenak kolandoi.

¹² Olewen anyun piik taman ak aeng' eng' ortinwegap Israel, chiito agenge eng' ooreet age tugul.

¹³ Ye tononie keelyegap tisiik che ibei moingetap Kamuktaindet ne Toroor, Kiptaiyatap ng'wony komugul peegap Jordan, kopcheigei ak kotononso peek che punu meto kototen.”

¹⁴ Ye kingo ng'eetyo piik eng' emaisyekwak koba kolandae Jordan, ko ki indoe tisiik che ibei moingetap arorutyet.

¹⁵ Ago ye kingo it Jordan che ki ibei moinget ak kingo tyech tabandap peek, (kinyiie peek aineetap Jordan kot kosiir ngeguusyekyik tugul eng' peetuusyek tugul che po kesisyet)

¹⁶ kotononso anyun peek che punu meto koba parak. Kitoten eng' ole loo eng' Adam, nganaseet ne neegitee Zarethan, ko peek che kichoortagei kobendi araraitap Arabah, nooto po Munyuk, ko ki igestagei. Ki ilanda anyun piik kolong'ji ole tokyingei Jeriko.

¹⁷ Kitononso tisiik che ki ibei moingetap arorutyetap Kamuktaindet ne Toroor eng' ole yaamaat eng' kwenutap Jordan, ye kilondoi Israel tugul, ak ki landa agoi kogestagei pororyet tugul eng' ole yaamaat.