TOBIT 3 - BUKUIT NE TILIIL Sireet ne Dutero Kanon

¹ Ki ariir anyun anee ak eng' ng'wanindo ne oo ko ki atau ariir kosai peegap kong'; ak ki atau asaa eng' kaimetapkei:

² “Ee Kiptaiyat, inyee ne po imanda, po iman poisyoniguk tugul; ortinweguk tugul ko po riirge ak iman; irwookyini ng'wony.

³ Ara anyun, ee Kiptaiyat, ibwaata ak igeero. Me piroo amu tengektonyu, anan ko amu kachililennyu, anan ko yautigap che ki ichiliil aguiywogikyuk eng' taing'ung'. Ki koyaun icheek tengek;

⁴ ak kongelelji icheek ng'atuutiguk. Nooto anyun ki imetech kibokyech, keluulech ak kebarech. Kiyaech keegu che kimbolatee ak kegenderech, ak kesasei eng' pororyosyek tugul che ki kiyesyech.

⁵ Eng' kasarwek che chaang' ko kigoochi kergong'yet aguiywogikyuk ko aechin ak tengektonywa, ak kaigona pireet kosupkei ak tengektonyu. Ki kibeet kayaneet, kebut ng'atuutiguk, ara nooto anyun amu nee si ki kinyooru kergong'yet ne yameigei.

⁶ Yaiywo anyun ko uu ye imache. Icheru saboondanyu, si abet eng' ng'wonyuni, ak koek poortonyu kogeny tembur. Eng' anee ko kaigai ame kosiir asabe; amu kisasa ama tinye tengek; ki atil mageet ne matiny. Kiptaiyat, cham istoo eng' nyasutyoni, imuta ole mi kamung'etap koigeny. Meesyoiwo soomennyu.”

Kaimutigap Sarah

⁷ Peetuunooto, eng' nganaseetap Ekbatana eng' Media, ko ki chup Sarah cheptap Ragueli, chepto agenge ne po kiboitiniigap kwandanyi.

⁸ Kiga kotun Sarah inooto murenik tisabu, ago ki parei chesawilyet Asmodeo manong'otyonyi age tugul kotomo kotuiyo ak Sarah. Ki mwachi kiboityondonooto ki tye Sarah koleenji, “Inyee pariindoni po muren! Keer oo! Ki inyooru manong'ootik tisap ama mi agot agenge ni ki isigee kaina.

⁹ Amu nee si ibireech? Ui weechigei, isup murenichooto kigobek. Kaigai agot ma kiroo lakwa ne isiche!”

¹⁰ Ye kingo kas Sarah ng'aleechooto, ko ki iimgei kot miising' kot kosoi peegap kong', ak koit kolaany koot parak komachei kogeetkei. Ago ki ibwaat kogeny ak kole, “Acha, ma keetigei si ma sas `piik abba nenyu ak kole ‘Ki tinyei lakweet agenge kityo, chepto ne ki chame kot, ak ki igetkei amu ng'wanindo!’ Kiit ne uu no koyaei Abba nenyu ne kagoosit kome, ak anyooru anee leluut. Ma koi abargei anee, achicha; asoome kiptaiyat koip sabeennyu, si ma kase konyil age chubisyosyek che uu chu!”

Saaetap Sarah

¹¹ Ki eng' kasarata, kong'eet Sarah ak kotonon eng' ye neegitee tirisya ak konamji eunekyik parak ak kotoi saat kole: “Iberuurot inyee, ee Kamuktaindet ne tinyei rireenet! Iberuurot kaineng'ung' koigeny; ingolasun poisyoniguk tugul koigeny.

¹² Ak nguno, ee Kiptaiyat, ko kaatokyin togeennyu, ak konyalin konyekyuk

¹³ Ng'at keisto eng' ng'wonyuni Asi ma kase kereetap kong' konyil age

¹⁴ Ingen, ee Kiptaiyat ile ma tinye tisya ne po ibeetapkei ak muren age tugul.

¹⁵ Tomo ang'em kainennyu anan kainenetap kwandanyu eng' emetap luulenatet. Aa lakweetap kwandanyu ne ineegei; ma tinye lakwa age ne imuuch kondi; ama tinyei chii ne po ooreennyi anan ko chii ne imuuch kotuno. Kogomeyo murenikyuk tisabu. Amu ne sita sap? Ago ngot koma poiboichinin ee Kiptaiyat iiste saboondanyu, ko kaigai koswa kaimutikyuk.”

Waluunet saautigap Tobit ak Sarah

¹⁶ Ki chamak anyun saautigap Tobit ak Sarah eng' taitap Kamuktaindet.

¹⁷ Ki kiyookto anyun malaikaiyat Raphael si kotoret icheek: kocherchi Tobit kamanagik che kigatuch konyekyik si kogeer kogeny lapkeiyetap Kamuktaindet ak kotestai kotet tetuutik kotinyng'ei ak koito ne po Sarah ak Tobias weeriitap Tobit. Ki king'at kora Raphael kwo kotyach Sarah eng' ratetap chesawilyet Asmodeo. Ki tinyei chamdaet Tobias kotun ineendet eng' icheek tugul che kimachei kole ta itun ineendet. Ye kingo nyoonei ko Tobit kong'etee serem, ko ki chorugei agine Sarah cheptap Raguel kobunu koot ne po parak.