RUTH 4 - BUKUIT NE TILIIL Sireet ne Dutero Kanon

Kotuni `Boaz Ruth

¹ Kingo togosta Boaz kwo ormariichetap nganaseet ak kotep ng'wony eng' yooto, ko ki nyo kobun yooto chiichooto po ooreet ne neegit nooto ki mwaei Boaz. Ak ki leenji, “Nyoo yu ornyo, ak itep ng'wony.” Ki wo anyun chiichooto ak kotep ng'wony.

² Ki kuur `Boaz poisyek taman che po nganaseet ak koleenji, “Obuur eng' yu.” Kobuur anyun icheek.

³ Ki leenji anyun `Boaz chiitap ooreet ne neegit, “Aldoi Naomi ne ki koweek eng' emetap Moab kooret ne ki po tupchennyo Elimelek.

⁴ Koabwaat amwaun ale ial koronooto eng' taitap pichu ibuuri eng' yu, ak eng' taitap poisyegap piikyuk. Ngot imach ityaach, ityaach; ago ngot ko memach ityaach, imwaiwo si anai. Amu ma mi age ne ityaachi kobatenen; ak arubin.” Ak ki wol kole, “Atyachi.”

⁵ Ki testai kole Boaz, “Eng' peetuut ne ialeen koronooto Naomi, ko ialeen Ruth chemoabindet agine, osotyotap ne ki kome, si kobiit ilaalji maat ne ki kome eng' porotennyi.”

⁶ Ki le chiichooto po ooreet ne neegit, “Ma muuchi atyakyigei, ngayai ko uu nooto amuuch ang'em porotennyu. Ip imandap katyaget ne kata atyachi kobunjiin; amu ma muuchi atyach.”

⁷ Ki uu ni piteet ne ki mi Israel agobo katyaget ak agobo waleet: si ki kimiit kayanjinet, ko ki icheru chiito kweiyondennyi ak kogoochi chiitap kokwennyi. Ki piteetap paornateet eng' Israel nooto.

⁸ Koleenji anyun `Boaz chiichooto po ooreet ne neegit, “Aljigei.” Ak ki icher kweiyondennyi.

⁹ Ki leenji `Boaz poisyek ak piik tugul, “Oo paorinik ra, ole kaal eng' eutap Naomi, tuguuk tugul che ki po Elimelek, ak tuguuk tugul che ki po Kilion ak che ki po Malon.

¹⁰ Kogeny, ko kaal Ruth chemoabindet ne ki osotyotap Malon, koek osotyonnyu, si kobiit alaalji maat eng' porotennyi ineendet ne kime, si ma pet kainennyi eng' tupchosyekyik ak eng' kurgeetap oldanyi. Oo paorinik rani.”

¹¹ Ki le anyun piik tugul che ki mi ormariichet kobooto poisyek, “Ki paorinik. Ingoyai Kamuktaindet ne Toroor kwondo ne kanyo koong'ung' koigei Rael ak Leah, chooto aeng' che ki teech kootap Israel. Iegu ne nyolu eng' Ephratah ak iegu ne tagunoot eng' Bethlehem.

¹² Ak eng' kesweek che tuun koonin Kamuktaindet ne Toroor eng' kwonyi, ko ingogergeit koong'ung' ak kootap Peres ne ki sikyi `Tamar Judah.”

Sigetap lakweet

¹³ Ki imut anyun `Boaz Ruth ak ki ek osotyonnyi. Ki ituiyogei ak ineendet ak ki igoochi Kamuktaindet ne Toroor komanach, ak kosich weeriit.

¹⁴ Ki leenji `kwonyiik Naomi, “Iberuurot Kamuktaindet ne Toroor, ne ma pagakten eng' peetuuni ametinye chiitap ooreet ne neegit koalin. Ingotook kainennyi eng' Israel!

¹⁵ Egu ineendet ne weegun saboondang'ung' ak koek ne riibin eng' osindang'ung'; amu osotyotap weeriing'ung', ne chamin, ne kaigai eng' inyee kosiir weeriik tisap, ko kasich lakweet.”

¹⁶ Ki nam `Naomi lakweet ak kotiny eng' tegeennyi, ak ki ek ineendet cheplakwet.

¹⁷ Ki toochi kainet kwonyiigap kokwet, kole, “Kogesikyi Naomi weeriit.” Ki kuure kainennyi Obed. Ineendet kwandap Jesse, kwandap Daudi.

¹⁸ Chu anyun ko ortinwegap Peres: ki sich `Peres Hesron,

¹⁹ kosich `Hesron Ram ak kosich `Ram Aminadab,

²⁰ ki sich `Aminadab Nason, kosich `Nason Salmon,

²¹ ki sich `Salmon Boaz, kosich `Boaz Obed,

²² ki sich `Obed Jesse ak kosich Jesse Daudi.