RUTH 3 - BUKUIT NE TILIIL Sireet ne Dutero Kanon

Komwechin `Naomi Boaz

¹ Ki leenji `Naomi korgennyi po yugoi, “Cheptonyu, tos ma cheeng'un anee ole imuung'ee, si komyeeit eng' inyee?

² Tos ma po ooreennyo Boaz, ne ki omi ak tiibiikyik? Keero, iruri baale kooi kemoi eng' rwanyut ne kiboorsee.

³ Iungei nguno ak iilgei, ak ilaach ngoroiguk, yeityo iwe olooto mi rwanyut; ago amat iboorchigei ineendet kot kooges amisyet ak eiset.

⁴ Ye kagoru, igeer ye karu; iwe anyun ak ing'aany keelyekyik ak iru yooto; si komwaun kiit ne kanyool iyai.”

⁵ Ki leenji `Ruth Naomi, “Ayae chooto tugul kemwa.”

⁶ Ki choortagei anyun kwo ole mi rwanyut, kwo koyai tugul che kamwachi korgennyi po yugoi.

⁷ Ye kingo kagoamis Boaz ak koe ak kobaibait muguleldanyi, kwo koru ye pooch karurugutyetap peek. Ki nyo Ruth mutyo ak kong'aany keelyekyik, ak koru yooto.

⁸ Ak kingo ek kemoi kween kosiir chiichooto eng' rwondo, ak koweigei ak eng' yooto konai kole kiruei kwony eng' keelyekyik.

⁹ Ki le ineendet, “Ii ng'oo?” Ak ki wol kole, “Aa Ruth cheptong'ung' ne otwoget. Tugee cheptong'ung' ne otwoget ngoryeeng'ung' amu ii chiitap ooreet ne neegit.”

¹⁰ Ki le chiichooto, “Ingoberuurin Kamuktaindet ne Toroor, cheptonyu, kaibooru myeeindo ne oo eng' let kosiir eng' taunet, amu ma isup murenik che mengech, ngo che ponoon anan ngo che mogore.

¹¹ Nooto anyun cheptonyu, meiywei; ayaun tugul chooto kemwa, amu ingen nganaseet tugul ne po piikyuk kole, ii kwondo ne tinyei atebeet ne nyolunot.

¹² Iman aa chiitap ooreet ne neegit, ago miitei chiito age neta koneegit kosiiro.

¹³ Tebi kemouni, ak ngot koyaun chiichooto mutai karon nooto nyolunot eng' chiitap ooreet, ko myee nooto, ko ingoyai nooto nyolunot eng' chiitap ooreet. Ago ngot koma yaun nooto nyolunot eng' chiitap ooreet, ayai anyun nooto nyolunot eng' chiitap ooreet, ko uu ye sabei Kamuktaindet ne Toroor. Ru anyun agoi koeech.”

¹⁴ Ki ru eng' keelyekyik agoi koeech, ak king'eet kotomo kinyit chii. Amu ki le Boaz, “Amengonai chii kole konyo kwony rwanyut.”

¹⁵ Ki leenji, “Ibu ngoryono ilaachi ak itaach.” Ak kingo yai ko uu nooto, ko kigerchi keruutik lo che po baale, ak kogesenji. Ki wo Boaz koweektagei nganaseet.

¹⁶ Kingo it Ruth ole mi korgennyi po yugoi, koteebe koleenji, “Ko uu nee ng'aleek cheptonyu?” Ak ki mwachi ineendet tuguuk tugul che koyachi chiichooto.

¹⁷ Ak ki le, “Kagono kerutichu lo po baale; amu ki le, ‘Amewe puch ole mi korgeng'ung' po yugoi.’ ”

¹⁸ Ki le anyun, “Muitee cheptonyu, kot inai kiit ne egu ng'aleechooto. Amu ma imuunyi agoi koyai kioto chiichooto rani kosulda.”