RUTH 2 - BUKUIT NE TILIIL Sireet ne Dutero Kanon

Koturisye Ruth eng' mbareetap Boaz

¹ Ki tinyei `Naomi chiitap ooreetap manong'otyonnyi, chii ne oo ne mogoryo, ne po ooreetap Elimelek, ak kainennyi ko ki Boaz.

² Ak ki leenji `Ruth chemoabindet Naomi, “Ngawo mbar si aturot peek che kameto kesiik. Amang'u ale anyooru ineendet ne imuuch koriirena.” Koleenji Naomi, “Ui, cheptonyu.”

³ Ki wo anyun Ruth mbar ak koturisyot kosubi piik che kesisyei. Ki it keljiinennyi, ye kingo it kebebertap mbareet ne po Boaz, nooto ki po ooreetap Elimelek.

⁴ Ki it anyun koit Boaz kobunu Bethlehem, ak kogat kesiik koleenji, “Ingotep Kamuktaindet ne Toroor kobootok.” Kowolji `icheek ineendet kole, “Ingoberuurin Kamuktaindet ne Toroor.”

⁵ koteebeee `Boaz otwogindennyi ne kitononjin piik che kesisyei koleenji, “Po kap ng'oo chebi?”

⁶ Kowolji `otwogindet ne kitononjin piik che kesisyei koleenji, “Ineendet ko cheptap Moab ne kibwanei ak Naomi ye kingo weeksei eng' emetap Moab.

⁷ Koleenjo ineendet, ‘Kaigai, chamwo aturisyot ak ayumate peek eng' kwenutap ratuutigap peek, asubi piik che kesisyei.’ Kait ak koturis kong'etee karon agoi nguno ne ma imuny kot koek nguno ne kaimuny kitigin.”

⁸ Koleenji `Boaz Ruth, “Kas anyuno cheptonyu! Amat iwe iturisyote eng' mbareet age, anan isiirte eng' yu, ago tebi ineegite kwonyiik.

⁹ Tokyi konyeguk kogeer mbareet ne kesei icheeget, ak iwe isup icheek. Kaang'at murenik aleenji mat kotwain. Ye amin melel, iwe iee peek che kagoramji tereenik murenichooto.”

¹⁰ Ki ing'uruuk Ruth kot kotiiny ng'wony togeennyi eng' teegis, ak koleenji chiichooto, “Amu nee si anyoor myeeindo eng' taing'ung' kot ibwaata anee ne aa too?”

¹¹ Kowolji `Boaz ineendet koleenji, “Kogemwaiwo tuguuk tugul che ki iyachi korgeng'ung' po yugoi kobooch ngo me manong'otyong'ung', ak ko uu ye ki ibagaakte kwandang'ung' ak kamenng'ung' kobooto emet ne ki kisikyinin, ak inyoo ole mi piik che ki ma ingen eng' tai.

¹² Ingoyaagun Kamuktaindet ne Toroor poisyeng'ung', ingogoonin melekto ne nyiitaat Kamuktaindet ne Toroor, Kamuktaindetap Israel, ne ki inyoo imwechi kebebaikyik!”

¹³ Koleenji Ruth, “Inganyoor myeeindo eng' taing'ung' kiptaiyandennyu, amu kaigaigaa ak amu kaing'alaalji cheptong'ung' ne otwogin eng' chamyet, agot nganda ma uu age eng' tiibiiguk che otwogik.”

¹⁴ Kingo it saitap amitwogik, koleenji `Boaz ineendet, “Nyoo putul amitwogichu, ak iamde kererutyeng'ung' siki.” Ki tebi Ruth anyun ak kesiik ak ki igoochi Boaz peek che kagigeel. Ki am kobiyo kot kong'et katuganik.

¹⁵ Kingo kang'eet kwo koturisyot, kong'at `Boaz parnotikyik koleenji, “Ingoturot chebi agot eng' kwenutap ratuutik ago mo kerong'.

¹⁶ Ong'usyi metoweegap peek eng' ratuutik, ak ometoochi kotur amoger kong' ineendet.”

¹⁷ Kiturisyot anyun Ruth eng' mbar agoi koskoleny. Kiboor che kagoturot, ak ki olo po keruutik tiptem.

¹⁸ Kila koip turoonik kwo nganaseet ak koboorchi korgennyi po yugoi che tee che kagotur. Ki ipchi amitwogik che kigaituuch ko kagobiyo, ak kogoochi ineendet.

¹⁹ koteebeee Naomi koleenji, “Keturee ano ra turoonichu techu? Keturee mbareetap ng'oo? Iberuurot ineendet ne kanain.” Komwochi `Ruth Naomi koleenji kaboisyei eng' mbareetap chiito ne kiguure Boaz.

²⁰ Koleenji `Naomi osotyondonooto ki po weeriinnyi, “Ingoberuur Kamuktaindet ne Toroor Boaz! Ma metoi rireenennyi eng' che saptos ak che ki kobek.” Kotestai kora koleenji, “Chiichooto ko chiitap ooreennyo ne neegit.”

²¹ Kole Ruth, “Wei, kamwaiwo kole atebee ole neegitee parnotikyik agoi kotar kogosori peek.”

²² Koleenji `Naomi Ruth, “Cheptonyu, kaigai obe ak otwogik che kwonyiik si ma iimin piik eng' mbareet age.”

²³ Ki tebi kobois anyun ak otwogik che kwonyiik agoi kegosor baale ak nganuuk, ak komeng'iis kobooto korgennyi po yugoi.