NG'ATUTIK 3 - BUKUIT NE TILIIL Sireet ne Dutero Kanon

Kebarei Og Laitoryatap Bashan.

¹ `Kingeweege anyun `ketogoste ooreet ne wendi Bashan, kobokyech Og laitoryatap Bashan ak piikyik tugul konyo koyai lugeet eng' Edrei.

² Ki leenjo Kamuktaindet ne Toroor, “Meiywei Og, amu kaande ineendet, piikyik ak emennyi tugul eung'ung', asi iyachi ineendet ko uu ye ki iyachi Sihon laitoryatap Amorik ne ki menyei Hesbon.”

³ Ki indewech eunekyok anyun `Kamuktaindet ne Toroor, Kamuktaindennyo Og laitoryatap Bashan ak piikyik tugul ak `ki kibar kot koma ng'et chii agot agenge.

⁴ Ki kiluul nganasookyik tugul eng' peetuusyechooto ak ki ma piit nganaseet agot agenge ne ma kiluul. Eng' tugul ko nganasook tamanwogik lo eng' emet komugul ne po Argob nooto ki laitorani Og ne po Bashan.

⁵ Kiga king'ote nganasochuuto tugul irimosyek che kooen ak ki tinyei kurgotik, ak temeleiywek. Ki mi kora nganasook che chaang' miising' che ki ma king'ot.

⁶ Ki king'em anyun kiwong'u, ko uu ye ki king'em Sihon laitoryatap Hesbon. Ki king'em nganaseet age tugul ne ki kimenyei ak ki kibar: piik, kwonyiik kobooto ak lagok.

⁷ Ago ki kiluul kobunjech tuuga tugul ak tuguuk che ki mi nganasook.

⁸ Ki kirep emet eng' peetuusyechooto eng' eunegap laitorinik aeng' che po Amorik che ki mi Jordan pitoniin. Yuto ko kobooch atebweetap Arnon agoi tulweetap Hermon,

⁹ ne kuure Sidonik Hermon Sirion ak kuure Amorik tulwoonooto Senir.

¹⁰ Kiga kiluul nganasook tugul che po warenget, Gilead komugul, Bashan komugul agoi Saleka ak Edrei, nganasoogap laitornatetap Og eng' Bashan.

¹¹ (Amu ki ng'et Og ineegei, laitoryatap Bashan, ne po che ki ng'et eng' Repaik; ogeero, ki po karnet itogunnyi; tos ma mi itogunooto Rabbah ne po lagogap Ammon? Ki futisyek taman ak somok koindonyi ak ki mitainik futisyek lo tebeesindanyi, ko uu kakwautyetap chiito.)

Kepchei Kong'asiis ne po Jordan

¹² Kingenam emonooto kobunjech eng' peetuusyechooto kobooch Aroer, ne neegitee atebweetap Arnon, kebebertap emetap tuloonook ne po Gilead ak nganasookyik, agoochi piigap Reuben ak che po Gad.

¹³ Ki agoochi kebeberta age ne po emetap Gilead ak Bashan komugul ne ki laitorani Og ak emet tugul ne po Argob agot Bashan komugul ooreetap Manasseh. (Kiguure nooto emetap Repaik.

¹⁴ Kiluul Jair weeriitap Manasseh emet komugul ne po Argob, agoi kiwotetap Gesurik ak Maakatik ak kiguure chooto ak Bashan Habot-Jair agoi ra.)

¹⁵ Ki agoochi Makir emetap Gilead.

¹⁶ Ak ki agoochi piigap Reuben ak piigap Gad kobooch Gilead agoi atebweetap Arnon kwenutap atebweet ak kiwotennyi agoi aineetap Jabbok, nooto kiwotetap lagogap Ammon.

¹⁷ Ki agoochi kobooto Arabah ak Jordan kobooto kiwotennyi kobooch Kineret agoi araraita ne miitei Arabah ak Araraitap Munyuk ne miitei kelutap Piska ole tokyingei kong'asiis.

¹⁸ Eng' peetuunooto ko ki ang'ataak aleenjok, “Ki kogoonok Kamuktaindet ne Toroor Kamuktaindeng'wong' emoni kobunjook: olande ko kaolaach kariik ondoe tupchosyekwok piigap Israel, okweek tugul che po lugeet.

¹⁹ Ago ingotebi eng' nganasookwok che ki agoonok osotikwok, lagokwok ak tuukwok (amu angen ale otinye tuuga che chaang'.)

²⁰ Otoret tupchosyekwok agoi kogoochi `Kamuktaindet ne Toroor kamuung'et ko uu okweek ak konyaban icheek emet ne igoochin Kamuktaindet ne Toroor Kamuktaindeng'wong' eng' Jordan pitoniin. Ye kagoyaak ko uu nooto, oweege anyun chii tugul ole miitei tuguukyik che ki agoonok.”

²¹ Kingo pata ang'at Joshua peetuunooto aleenji, “Ki igeer eng' konyeguk tuguuk tugul che ki yachi `Kamuktaindet ne Toroor Kamuktaindeng'wong' laitorinichuuto aeng'. Yachin anyun ko uu nooto Kamuktaindet ne Toroor laitornatosyek tugul che mi ole iwendi.

²² Amoiywei icheek, amu Kamuktaindet ne Toroor Kamuktaindeng'wong' ne yaei lugeet agobo okweek.”

Kotobeni Musa emetap Kanaan

²³ Ki asaa Kamuktaindet ne Toroor eng' peetuunooto aleenji,

²⁴ “Ee Kiptaiyat Kamuktaindet ne Toroor, kaitau iboorchi kiboityondeng'ung' etunateng'ung' ak eung'ung' ne kiim. Amu ma mi kamuktain age kipsengwet anan ng'wony ne imuuchi koyai ko uu poisyoniguk ak ko uu poisyoniguk che kiimeen?

²⁵ Kasain ale ichamwo alanda awo ageer emet ne karaaran ne mi Jordan pitoniin, tulwoonooto karaaran ak Lebanon.”

²⁶ “Ago kinereekyo Kamuktaindet ne Toroor agobo okweek ak ma kaswa. Amu ki leenjo, ‘Ingoyamin; amata ing'alaalwo kogeny agobo ng'olyoondoniito.

²⁷ Togoste Piska parak ak tooben komostap cherongo, murot kaataam ak murot tai. Keer kora ole tokyingei kong'asiis, ak igeerote eng' konyeguk, amu melandoe Jordanini.

²⁸ Ago ng'at Joshua, igiil ineendet ak igimit, amu ineendet ne landoi kondoe pichu ak kogoochi konyaban emet neta igeere.’ ”

²⁹ `Ki kitebee anyun atebweet ne tokyingei Beth-peor.