NG'ATUTIK 2 - BUKUIT NE TILIIL Sireet ne Dutero Kanon

Panda eng' surkwen

¹ “Ki kiweege anyun kenam pandanyo keebe surkwen eng' ooreet ne wendi Araraita ne Piriir, ko uu ye kimwaiwo Kamuktaindet ne Toroor. Ki kimuut tulweetap Seir peetuusyek che chaang'.

² Eng' let komwaiwo Kamuktaindet ne Toroor koleenjo,

³ ‘kogoyam peetuusyek che ki omuut tulwooni. Ara anyun oweege oba murot kaataam.’

⁴ Ng'at piik ileenji, kanyool obun kiwotetap tupchosyekwok lagogap Esau che menyei Seir. Nga iyweok,

⁵ ko oriipkei miising' anyun si momoiye kiy ak icheeget, amu ma koi agoonok emennywa, agot ne yamei kotyech keeldo. Amu ki agoochi Esau tulweetap Seir kobunji.

⁶ Oale icheeget amitwogik eng' fedha si oam, ak oale kogeny icheeget peek eng' fedha si oee.

⁷ “Amu ki koberuurin Kamuktaindet ne Toroor Kamuktaindeng'ung' eng' poisyet tugul ne po euneguk. Ki konai pandang'ung' eng' ong'atani oo. Ki imi kobooten Kamuktaindet ne Toroor Kamuktaindeng'ung' eng' kenyisyechu artam ak ma rarun kiy.

⁸ “Ki kirop anyun kiwotetap tupchosyekyok lagogap Esau che menyei Seir kebun ooreetap Arabah ne wegegei Elath ak Esiongeber ak ki kiweege kebun ooreetap surkwen ne po Moab.

⁹ Ki leenjo Kamuktaindet ne Toroor, ‘Ameiim Moab anan iborye icheeget eng' lugeet, amu ma koonin emennyi kobunjiin; amu ki agoochi lagogap Lot emetap Ar kobunji.’

¹⁰ (Ki menyei Emik olooto keny, piik che kiimeen ak ko chaang', ak ko kooen, ko uu Anagik.

¹¹ Ki iti icheeget keele Repaik, ko uu Anagik: ago kuure `Moabik icheek Emik.

¹² Ak ki menyei Horik ak icheek keny Seir, ak ko ki isubu lagogap Esau pichooto. Ki par koisto eng' tainnywa ak komeny olooto kogeer icheek ko uu ye ki yai Yahudik eng' emennywa ne ki igoochi Kamuktaindet ne Toroor.)

¹³ “Kileenjech Kamuktaindet ne Toroor, ‘Ong'eetyee anyun, olandae kererutap Sered.’ Ki kilandae anyun kererunooto.

¹⁴ Kobooch ngap keng'eetye eng' Kadesh-barnea, agoi kelandae kererutap Sered, ko ki kenyiisyek sosom ak sisiit. Kiga kogeskei ibinda tugul ne po murenigap lugeet eng' nganaseet ko uu ye ki iyosyechi Kamuktaindet ne Toroor.

¹⁵ Ki kirindoi icheek eutap `Kamuktaindet ne Toroor si kobar icheek eng' nganaseet kot kogeskei tugul.

¹⁶ “Kingo kagobek piik tugul che po lugeet kowong'kei,

¹⁷ koleenjo `Kamuktaindet ne Toroor,

¹⁸ ‘Isiirtoe rani Ar kiwotetap Moab,

¹⁹ ak ye iriikte ole neegitee lagogap Amonik, ko meiim anan omoiye kiy ak pichooto, amu ma koonin emetap lagogap Amonik kobunjiin, amu ki agoochi lagogap Lot kobunji.’ ”

²⁰ (Ki iti keele po emonooto agine Repaik. Ki menyei Repaik keny olooto. Kuuree Amonik pichooto Samsumik.

²¹ Piik che eecheen ak ko chaang' ak ko kooen, ko uu Anagik. Ki par `Kamuktaindet ne Toroor icheek eng' tainnywa ak ki pwa yooto ak komeny kogeer icheek,

²² ko uu ye ki yachi lagogap Esau, che ki menyei Seir, ye kingo par Horik eng' tainnywa. Ki pwa icheek komeny olooto kogeer pichooto agoi ra.

²³ Ki pwa Kaptorik che ki punu Kaptor kobwa kobar Abik che ki menyei kestonik agoi Gaza ak komeny olooto kogeer icheek.)

²⁴ “Yeityo kong'atech `Kamuktaindet ne Toroor anyun koleenjech, ‘Onam pandang'wong' olandae atebweetap Arnon. Kande eung'ung' Sihon Amorindet laitoryatap Hesbon, kobooto emennyi. Tau anyun nam kobunjiin ak iyai lugeet ak ineendet.

²⁵ Atau ra agoochini koiywein ak koaragenso agobo inyee piik che miitei kurereet tugul ne po kipsengwet komugul che ta kogasei ng'aleeguk. Potandos ak konyoor ng'wanindo amu inyee.’ ”

Kobarei `Yahudik Sihon Laitoryatap Hesbon

²⁶ “Ki ayookte piik koba eng' surkwen ne po Kedemot koba kap Sihon laitoryatap Hesbon koip ng'aleek che po kaalyeet, koleenji,

²⁷ ‘Chamwo abun emeng'ung'. Abune ooreet ne oo kityo, ma mastoi eutap tai anan murot kaataam.

²⁸ Koono amitwogik che aame aal ak aal peek che aee. Chamwo kityo awo asiirto,

²⁹ ko uu ye ki chamwo lagogap Esau che menyei Seir ak Moabik che menyei Ar agoi alandae Jordan awo emet ne koonech Kamuktaindet ne Toroor, Kamuktaindennyo.’ ”

³⁰ “Ago ki ma chamwech Sihon laitoryatap Hesbon kebun oldanyi, amu ki iuit muguleldonyi `Kamuktaindet ne Toroor Kamuktaindeng'ung', kot koma chamdagei si kondeun ineendet eung'ung' ko uu rani.

³¹ “Ki leenjo Kamuktaindet ne Toroor, ‘Katau anyun ande taing'ung' Sihon ak emennyi. Tau anyun nam si inyaban emennyi.’

³² Kimong'jech anyun Sihon ineendet ak piikyik tugul, kobwa koyai lugeet eng' Jahas.

³³ Kigoon `Kamuktaindet ne Toroor, Kamuktaindennyo ineendet eng' tainnyo ak ki kibar ineendet, weeriikyik ak piikyik tugul.

³⁴ `Ki kinam nganasookyik tugul eng' peetuunooto ak `keng'em nganaseet age tugul ne ki kimenyei, kobooto kobogorisyek ak lagok. Ma kimete agot agenge ne ki ng'et.

³⁵ `Ki kiluul tuuga kobunjech kobooto tuguuk che ki mi nganasook che kiga kenam.

³⁶ Kobooch Aroer ne mi tabandap atebweetap Arnon, ak nganaseet ne mi atebweet agoi Gilead, ko ki ma piit nganaseet ne ki kimiit kosiirech. Kigoon `Kamuktaindet ne Toroor, Kamuktaindennyo tugul eng' tainnyo.

³⁷ Ago kobatee emetap lagogap Amonik ne ki ma iriikyi komoswek tugul che po aineetap Jabbok, ak nganasook che po emetap tuloonook ak oldo tugul ne kietenech Kamuktaindet ne Toroor, Kamuktaindennyo.”