NG'ATUTIK 1 - BUKUIT NE TILIIL Sireet ne Dutero Kanon

Ng'aleek che kindoune

¹ Chu ng'aleek che ki mwachi `Musa Yahudik tugul komi surkwen eng' Jordan pitoniin. Yooto ko Arabah ne tokyingei Suph, kwenutap nganaseetap Paran eng' komosta age ak nganasoogap Tophel, Laban, Haseroth ak Di-sahab eng' komosta age.

² Imuuch kotar peetuusyek taman ak agenge panda ne kebendi kong'etee Horeb eng' ooreet ne punei tulweetap Seir agoi Kadesh-barnea.

³ Eng' peetuutap tai ne po arawetap taman ak agenge, eng' kenyiitap artam, komwachi `Musa piigap Israel ng'atuutik tugul che kiga kong'at `Kamuktaindet ne Toroor ineendet kole asi kogoochi icheek.

⁴ Ki mwachin `Musa Yahudik ng'atuutichuuto ye kingo kagoterteer Sihon laitoryatap Amorik, ne ki menyei Hesbon ak Og laitoryatap Bashan, ne ki menyei Astarot eng' Edrei.

⁵ Eng' Jordan pitoniin eng' emetap Moab, ko ki toi anyun Musa koboor ng'atuutyoni. Kole:

⁶ Ki mwaiwech Kamuktaindet ne Toroor, Kamuktaindennyo eng' Horeb kole, Kogoyam peetuusyek che ki omeny tulwooni.

⁷ Otau pandang'wong', ak obe emet ne po tuloonoogap Amorik; oba oldinwek tugul che neegitee olooto eng' Arabah, emetap tuloonook, warenget komostap murot tai ak ole neegitee ngeguut, emetap Kanaanik ak Lebanon agoi ainonooto oo po Yufrets.

⁸ Ogeero, kande emet taing'wong'; omong'ji anyun onam kobunjook emet ne ki iyasyechi `Kamuktaindet ne Toroor kwanisyekwok, Abraham, Isak ak Jakobo kole igoochin icheek ak iyotennywa ne piitu let.

Koleweni `Musa kandoik

⁹ Ki leenji `Musa piik, “Ki amwaiwok kota kemi tulweetap Sinai aleenjok ma muuchi agesenaak aneege.

¹⁰ Ki kotesaak `Kamuktaindet ne Toroor Kamuktaindeng'wong', ak oo sere rani ko uu kecheigap kipsengwet.

¹¹ Ingotesaak `Kamuktaindet ne Toroor, Kamuktaindetap kwanisyekwok konyil eliphuut kosiir koiiteng'wong' ne po nguno ak ingoberuurook ko uu ye ki koarorwok!

¹² Amuktoi ano aneege agesen kaimutikwok, lautikwok ak suryosyekwok?

¹³ Olewenjigei piik che ng'oomen che tinyei utaatyet ne nin ak ko che taagunotiin kobun ortinwekwok si agoochi kondoiywok.

¹⁴ Ki owolwo oleenjo, ‘Myee kioto kemwaiwech keyai.’

¹⁵ Ki anam anyun kandoigap ortinwekwok, piik che utaatiin ak ko taagunotiin, ak agoochi icheek kondoikwok koek kiptainigap eliphuusyek, kiptainigap pogolusyek, kiptainigap konomusyek ak kiptainigap tamanusyek ak pounik ko uu ortinwekwok.”

¹⁶ “Ki ang'at kirwoogikwok peetuunooto aleenji, ‘Ogasyi ng'aleek tupchosyekwok, orwookyi eng' imanda chii ak ne tupcho; ak toondet ne mi kobootok.

¹⁷ Amotiytiy piik eng' kirwooget; ago ogasyi ne ming'in ak ne oo kogergeit. Amoiywei togoch ne po chii amu po kirwooget Kamuktaindet. Ng'olyoot ne katemenak oibwa si agas.’

¹⁸ Ki ang'ataak eng' peetuunooto agobo tuguuk tugul che kanyool oyai.”

Kobistoe `Yahudik ng'atuutyetap Kamuktaindet ne Toroor

¹⁹ “Ki kibe eng' Horeb kebune surkwen nooto oo tugul ak ko oo kamuiset. Ki kibunu ooreet ne po emetap tuloonook ne po Amorik ko uu ye king'atech Kamuktaindet ne Toroor, Kamuktaindennyo ak ki kipwa agoi Kadesh-barnea.

²⁰ Ki aleenjok anyun, ‘Kaoitu emetap tuloonook ne po Amorik ne koonech Kamuktaindet ne Toroor, Kamuktaindennyo,

²¹ ak kagonde Kamuktaindet ne Toroor Kamuktaindeng'ung' emet taing'ung'. Ara togoste anyun nam kobunjiin ko uu ye kimwaun Kamuktaindet ne Toroor, Kamuktaindetap kwanisyeguk, ameiywei anan iaragen.’ ”

²² “Ak ko ki obwa tugul ole ami oleenjo, ‘Ongiyookte piik kondoenech koba kosegeiywech emet, si kobwa komwaiwech ole teptoi ooreet ne kebune ketogostoi ak nganasook che ki ite.’

²³ Ki ibaibaa kioto komyee ak ki alewen anyun murenik taman ak aeng' eng' okweek, agenge eng' ooreet age tugul.

²⁴ Ki pa kotogosta tulweet ak ki it atebweetap Eskol ak ki segei `icheek olooto

²⁵ ak kobut logoegap emonooto koibwech. Ki ibwech ng'aleek ak icheek komwa kole, Myee emonooto koonech Kamuktaindet ne Toroor, Kamuktaindennyo.”

²⁶ “Ago ki ma ocham otogoste olooto, ago ki obistoe ng'atuutyetap Kamuktaindet ne Toroor Kamuktaindeng'wong'.

²⁷ Ki ong'unyng'ung'se eng' emaisyekwok ole, ‘Ki imoong'wech Kamuktaindet ne Toroor eng' emetap Misiri amu kiwechech, si kobiit kondeech eunegap Amorik kobarech.

²⁸ Ki togostoi kebendi ano anyun? Ago kagoochi tupchosyekyok mugulelwekyok kochootyo ye ka ngo leenjech eecheen piik ak ko kooen kosiirech, ak ko eecheen nganasook ak ki kiteech irimosyekwak kot koit kipsengwet, ne siirei nooto ko ki kigeerchi olooto weeriigap Anagik.’ ”

²⁹ Ki aleenjok anyun, “Among' komuok anan oiywei icheek.

³⁰ Yaei pooryeet agobo okweek Kamuktaindet ne Toroor Kamuktaindeng'wong' ne indoenok ko uu tugul che kiyaiywok eng' Misiri,

³¹ ak eng' surkwen ole ki igeer ile kigesenunenen Kamuktaindet ne Toroor Kamuktaindeng'wong', ko uu ye keseni chii weeriinnyi, eng' ortinwek tugul che ki obunu agoi oitu olito.

³² Ago ma oyan Kamuktaindet ne Toroor Kamuktaindeng'wong' eng' ng'olyoondoni,

³³ ineendet ne ki indoenak eng' ooreet si kocheeng'wok ole oteeche emaisyekwok si koboorwok eng' maat ooreet ne obendi kemoi ak eng' pooldet peet.

³⁴ “Ak ki kas Kamuktaindet ne Toroor tweguunetap ng'aleekwok ak kinereech ak koyasyo kole,

³⁵ ‘Ma keerei iman agot agenge eng' pichu po ibini ya emet ne karaaran ne ki ayosye ale agoochini kwanisyekwok,

³⁶ kobatee Kaleb weeriitap Jepune. Agoochini ineendet kobooto lagokyik emonooto kityech. Amu ki isup Kamuktaindet ne Toroor eng' kagesunatetapkei.’

³⁷ Ki nereekyo Kamuktaindet ne Toroor amu okweek kole: ‘memandoi aginye olooto,

³⁸ ak ko itei Joshua weeriitap Nun ineendet ne tononi eng' taing'ung'. Ara anyun igimit ineendet amu igoochin `ineendet Israel konyaban emonooto.

³⁹ Ak itei olooto lagokwok che mengech che ki omwa ole egu luulenik ak lagokwok che nguno koma ingen ne myee anan ne ya. Eng' iman ko chooto che itei olooto ak agoochini icheek emet kobunji.

⁴⁰ Ago oweege okweek ak onam pandang'wong' agoi omande surkwen eng' ooreet ne wendi Nyanjet ne Piriir.’

⁴¹ “Ki owolwo anyun oleenjo, ‘Kigeyachi Kamuktaindet ne Toroor tengekto. Ara anyun kibendi keyai pooryeet, ko uu tugul che king'atech Kamuktaindet ne Toroor, Kamuktaindennyo.’ Ki rat chii tugul kariikyik che po lugeet ak ki osartae obe tulweet.

⁴² Ago ki leenjo Kamuktaindet ne Toroor ileenji, ‘Amat otogoste anan oyai pooryeet, amu ma mi anee kwenung'wong', si ma kibaraak eng' taitap puunikwok.’

⁴³ Ki ang'alaalwok anyun ko uu nooto, ak ki ma ogas, ago ki ongelelji ng'atuutyetap Kamuktaindet ne Toroor eng' menoteet ak ki otogoste tulweet.

⁴⁴ Kimong'jok Amorik che ki menyei tulwoonooto, nyoo koonak ko uu ye oonei piich segemik ak ki iterteeraak ochoorchinigei Seir agoi Horma.

⁴⁵ Ki oweege oriirye eng' taitap Kamuktaindet ne Toroor, ago ma kas Kamuktaindet ne Toroor riirekwok ama epchok iit.

⁴⁶ Ki otebee anyun Kadesh peetuusyek che chaang' che tee peetuusyek che ki otar eng' yooto.