NEEMIA 3 - BUKUIT NE TILIIL Sireet ne Dutero Kanon

Keteechei irimeetap Jerusalem

¹ Ki ng'eet anyun Eliasib tisiindet ne oo kobooto tupchosyekyik tisiik ak koteech ormariichetap keechiirek. Ki ianyiny ak konde kurgotikyik. Ki ianyiny ak koteech kogeny agoi teekseet ne kooi ne po Hamea kot koit teekseet ne kooi ne po Hananel.

² Kiteeksei korubei ineendet piigap Jeriko, ak che kiteeksei kogeny korubei icheek ko ki Sakur weeriitap Imri.

³ Ki teech weeriigap Hasenaa ormariichet ne po njireenik. Ki inde tugatugigap kurgotik, konde kereiywekyik, poldiinikyik che ki kiige, ak temeleiywekyik.

⁴ Che kiteechei kogeny korubei icheek ko ki Meremot weeriitap Uriah, weeriitap Hakos, ak che korubei icheek ko ki Mesulam weeriitap Berekiah, weeriitap Mesesabel. Che kirubei `icheek ko ki Zadok weeriitap Baanah.

⁵ Che kirubei ko ki Tekoitik, ago ma machuuljigei piikwak che taagunotiin poisyetap kiptaiyannywa.

⁶ Ki teech kogeny ormariichet ne po keny Joiada weeriitap Pasea ak Mesulam weeriitap Besodeia. Ki inde tugatugigap kurgotikyik, kereiywekyik, poldiinikyik che ki kiige ak temeleiywekyik.

⁷ Ne kirubei icheek ko ki Melatia Gibeonindet, ak Jadon Meronotindet, piigap Gibeon ak che po Mispa, piik che po ng'echereetap laitornatet ne po pounindet ne mi aineet pitoniin.

⁸ Ne kiteechei kogeny korubei icheek ko ki Uzziel weeriitap Haraia, kitang'igap thahabu. Ne kirubei ineendet ko ki Hananiah purugindetap tuguuk che ng'uu ne anyiny ak ki igimit Jerusalem agoi irimeet ne tebees.

⁹ Ne kiteechei kogeny korubei icheek ko ki Repaiah weeriitap Hur ne pounindetap kebebertap kooretap Jerusalem.

¹⁰ Ak ne kiteechei kogeny korubei icheek ko ki Jedaiah weeriitap Harumap, ole tokyingei koonnyi. Kirubei ineendet Hatus weeriitap Hasabneia.

¹¹ Kiteechei kebeberta age Malkija weeriitap Harim, ak Hasub weeriitap Pahat-moap kobooto teekseet ne kooi ne po mastinwek.

¹² Ki teech kogeny korubei icheek Shallum weeriitap Haloes, pounindetap kebebertap kooretap Jerusalem, ineendet ak tiibiikyik.

¹³ Ki teech kogeny Hanun kobooto piik che ki menyei Sanoa ormariichet ne po atebweet. Ki teech icheek ak konde kereiywekyik, poldiinikyik che ki kiige ak temeleiywekyik. Ki teech irimeet ne po mitainik olo po pogol ang'wan agoi ormariichetap kiptangasyat.

¹⁴ Ki teech kogeny ormariichetap kiptangasyat Malkija weeriitap Regap, pounindetap kooretap Beth-hakerem. Ye kingo teech, konde kereiywekyik, poldiinikyik che ki kiige ak temeleiywekyik.

¹⁵ Ki teech kogeny ormariichetap kondap peek Shallum weeriitap Kolhose, pounindetap kooretap Mispa. Ye kingo teech, kotuch, konde kereiywekyik, poldiinikyik che ki kiige ak temeleiywekyik. Ki teech irimeet ne po tamboiyotap Shelah ole neegitee seremutap kaplaitoryat, agoi lang'eiywot ne kichoortoegei kebendi nganaseetap Daudi.

¹⁶ Ne kiteechei kogeny korubei ineendet ko ki Nehemiah weeriitap Asbuk pounindetap kebebertap kooretap Beth-zur, agoi ole tokyingei kereeriisyegap Daudi, agoi tamboiyot ne ki kibal ak agoi kootap piik che nyigoonen.

Tisiik che kiteekso

¹⁷ Che kiteechei kogeny korubei ineendet ko ki Lawiik, Reum, weeriitap Bani, ak ne kiteechei kogeny korubei ineendet ko ki Hasabia, pounindetap kebebertap kooretap Keila, agobo korennyi.

¹⁸ Ne kiteechei kogeny korubei ineendet ko kitupchosyekwak, Babai weeriitap Henadad, pounindetap kebebertap kooretap Keila.

¹⁹ Ne kiteechei kogeny korubei ineendet ko ki Eser weeriitap Jeshua, pounindetap Mispa, kebeberta age ne tokyingei ole kitogostoe agoi keit ole kigonoree kariigap lugeet eng' ole weegegei irimeet.

²⁰ Ne kirubei ko ki Baruk weeriitap Sabai ne ki teech kogeny eng' kagiiletapkei kebeberta age kobooch ole weegegei irimeet agoi kurgeetap kootap Eliasib tisiindet ne oo.

²¹ Ak ne kiteechei kogeny kebeberta age korubei ineendet ko ki Meremot weeriitap Uriah weeriitap Akos, kobooch kurgeetap kootap Eliasib agoi ole pooch kootap Eliasib.

²² Che kiteechei kogeny korubei ineendet ko kitisiik, piigap Warenget.

²³ Che kiteechei kogeny korubei ineendet ko ki Benjamin ak Hasub ole tokyingei koonnywa. Che kiteechei kogeny korubei icheek ko ki Azariah weeriitap Maaseia weeriitap Anania ole neegitee koonnyi.

²⁴ Ne kiteechei kogeny kebeberta age korubei ineendet ko ki Binui weeriitap Henadad, kobooch kootap Azariah kot koit ole weegegei irimeet agoi luuita.

²⁵ Ki teech kogeny Palal weeriitap Usai ole tokyingei ole weegegei irimeet ak teekseet ne kooi ne ki ichumda eng' koot ne po parak ne po kootap laitoryat ne neegitee seremutap riibiik. Ki teech kogeny korup ineendet Pedaiah weeriitap Paros.

²⁶ (Ki menyei otwogigap Hekaluut Ophel, agoi komosta ole tokyingei ormariichetap peek ole po kong'asiis ak teekseet ne kooi ne ki ichumda.)

²⁷ Che kiteechei kogeny kebeberta age korubei ineendet ko ki Tekoitik che tokyingei teekseet ne kooi ne ki ichumda agoi irimeetap Ophel.

²⁸ Ki teech kogeny tisiik paragutap ormariichetap paraisiit; kiteechei age tugul ne tokyingei koonnyi.

²⁹ Che kiteechei kogeny korubei icheek ko ki Zadok weeriitap Imer kotokyingei koonnyi, ak ne kiteechei kogeny korubei ineendet ko ki Semaiah weeriitap Shekaneiah, riibindetap ormariichet ne po kong'asiis.

³⁰ Ne kiteechei kogeny kebeberta age korubei ineendet ko ki Hananiah weeriitap Selemya ak Hanun weeriit ne po lo ne po Salap. Ne kiteechei kogeny korubei ineendet ko ki Mesulam weeriitap Berekiah kotokyingei koonnyi ne po oriit.

³¹ Ne kiteechei kogeny korubei ineendet ko ki Malkija ne ki age eng' kitang'igap thahabu kot koit kootap otwogigap Hekaluut ak ne po chemung'arainik, kotokyingei ormariichetap Hamikad kot koit ole kitogostoe eng' luuita.

³² Ki teech kogeny kitang'igap thahabu ak chemung'arainik kwenutap ole kitogostoe eng' luuita ak ormariichetap keechiirek.