JOSHUA 9 - BUKUIT NE TILIIL Sireet ne Dutero Kanon

Ng'aalsetap piigap Gibeon

¹ Ye kingo kas laitorinik tugul (laitorinigap Hitik, Amorik, Kanaanik, Perisik, Hibik, kobooto Jebusik) che ki mi Jordan pitoniin, emetap tuloonook, ak warenget, ak ngeguut tugul ne po araraitap Mediterenian ne mi tai eng' Lebanon,

² koyumgei kobargei ak Joshua ak Israel.

³ Ago kingo kas piigap Gibeon kiit ne ki kayachi `Joshua Jeriko ak Ai,

⁴ koyai ng'aalseet ak icheek: ki pa koigei piik che kiyooktoi, ki ip kuniok che oosen eng' sigirokwak, lolotinwegap divaik che oosen che ki kogereer ak ko che kigenabanap.

⁵ Ki ilaach kweonik che ki koosegitu che kigeginogin ak kolaach ngoroik che oosen. Magatiinik tugul che ki amitwogikwak ko kiga koyaamyo ak ko kiga koucho.

⁶ Ki pa ole mi Joshua eng' nganaseet eng' Gilgal, ak komwachi ineendet ak piigap Israel koleenji, “Ki punu emet ne loo, ara anyun ongeyai arorutyet ak okweek.”

⁷ Koleenji piigap Israel Hibik, “Kale ng'oo momenye kwenunnyo, kimuktoi ano keyai arorutyet ak okweek?”

⁸ Koleenji `icheek Joshua, “Ki otwogiguk.” koteebee `Joshua icheek koleenji, “Oo ng'oo? Ak obunu ano?”

⁹ Kowol kole, “Punu otwogiguk emet ne loo kot amu kainetap Kamuktaindet ne Toroor Kamuktaindeng'ung'; amu kigegas etunatennyi ak tuguuk tugul che ki yai eng' Misiri,

¹⁰ ak tuguuk tugul che ki yachi laitorinik aeng' che po Amorik che ki mi Jordan pitoniin, Sihon laitoryatap Hesbon ak Og laitoryatap Bashan ne ki mi Astarot.

¹¹ Kimwaiwech poisyekyok ak tugul che menyei emennyo kole, Oip amitwogik che po panda; obe otorookte Israel ak oleenji, ‘Ki otwogikwok, obwa anyun si keyai arorutyet ak okweek.’

¹² Ki kiibu magatinichuchok eng' kooriikyok kota komi ma eng' peetuut ne ki king'eetosi kebwane oling'wong', ago nguno ko ki koyaamyo ak koucho.

¹³ Kileelach lolotinwechu kiga kinyiit divaik ak ko nguno ko ki kogereeris. Ki koosegitu ngoroikyok ak kweonikyok amu panda ne kooi kot.”

¹⁴ Ki am icheek amitwogigap pichooto ama teep ng'olyoo kobun kutitap Kamuktaindet ne Toroor.

¹⁵ Ki yai Joshua ak icheeget kayanjinetap kaalyeet, ak koarorto kobagaakta pichooto kosapcho, ak ki igimit pounigap tuiyet eng' kayosyet.

¹⁶ Ago kingo pata peetuusyek somogu ko kagoyai arorutyet ak icheek, kogas keele kaagaa ki piigap kokwennywa ak komenyei kwenunnywa.

¹⁷ Ki pa piigap Israel ak koit nganasoogap pichooto eng' peetuutap somok. Nganasokwak ko ki Gibeon, Kepira, Beerot ak Kiriath-Jearim.

¹⁸ Ago ma par `piigap Israel icheek, amu kiga koyasyechi pounigap tuiyet eng' Kamuktaindet ne Toroor, Kamuktaindetap Israel. Ki ing'unyng'uny tuiyet komugul agobo pounik.

¹⁹ Ago ki leenji pounik tugul tuiyet komugul, “Ki kiyasyechi icheek eng' Kamuktaindet ne Toroor, Kamuktaindetap Israel, ara anyun ma kimuuchi ketwa icheek.

²⁰ Kiyachini ko uu ni; kibagaaktoi kosapcho, si ma ityeech nereegek amu kayasyoet ne ki kiyasyechi.”

²¹ Ki leenji `pounik icheek, “Obagaach kosapcho.” Ki ek anyun pichooto che petei kweenik ak koramjin peek tuiyet komugul ko uu ye ki kamwachi pounik.

²² Ki iyookto anyun Joshua keguur icheek, ak ki ng'alaalji koleenji, “Amu nee si ong'alech ole, ‘Kimenye ole loo miising' eng' okweek,’ ago kaagaa omenye kwenunnyo?

²³ Ara anyun oo chubootiin, amagoi petyo eng' okweek che otwogik che petei kweenik ak che ramei peek che po kootap Kamuktaindennyu.”

²⁴ Ki wolji `icheek Joshua koleenji, “Amu ki kimwaiwech acheek otwogiguk iman ko uu ye ki ng'at `Kamuktaindet ne Toroor Kamuktaindeng'ung' otwogindennyi Musa kogoonok emet tugul ak kobar eng' taing'wong' piik tugul che menyei emoni. Ki kiyai anyun niito amu ki kiaragen miising' agobo saboonwekyok amu okweek.

²⁵ Ki mi anyun nguno euneguk. Iyaiywech ko uu ye igeere ile myee eng' inyee.”

²⁶ Ki yachi anyun ko uu nooto, kosar eng' eunegap piigap Israel, ak ma ki par icheek.

²⁷ Ki yai `Joshua icheek eng' peetuunooto koek che petei kweenik ak koramjin peek tuiyet ak kaptisisyetap Kamuktaindet ne Toroor eng' ole leweni ineendet, ak mi ko uu nooto agoi ra.