JOSHUA 7 - BUKUIT NE TILIIL Sireet ne Dutero Kanon

Pireet agobo chalwoktap Akan

¹ Ago ki yai chalwok piigap Israel agobo tuguuk che itabaanatiin. Ki ip Akan weeriitap Karmi, weeriitap Sabdi, weeriitap Zerah ne po pororyetap Judah tuguuk alak eng' che itabaanatiin. Ki nereech kot Kamuktaindet ne Toroor agobo piigap Israel.

² Ki iyookto `Joshua piik eng' Jeriko koba Ai, ne neegitee Beth-aben eng' komostap kong'asiis ne po Bethel komwachi koleenji, “Oba ak osegei emonooto.” Ak ki pa anyun piik kosegei Ai.

³ Ki week ole ki mi Joshua ak koleenji, “Ng'ering' pichooto, ara amat koba piik tugul. Ingoba piik olo po eliphuusyek aeng' anan ko somok koba kobar Ai.”

⁴ Ki pa piik olo po eliphuusyek somok, ago kimweiso komweune piigap Ai.

⁵ Kibaris piigap Ai kobar piigap Israel, piik olo po sosom ak lo ak koon eng' ormariichet kot koit Sebarik, ak kobarat korektoi. Kimeiyo miising' kot mugulelwegap piik.

⁶ Kigereer Joshua ngoroikyik ak kong'uruuk kot koit ng'wony togeennyi, ak konde temburyek metowekwak, ineendet ak poisyegap Israel eng' taitap moingetap Kamuktaindet ne Toroor agoi koskoleny.

⁷ Ki le Joshua, “Pwo, wee Kiptaiyat Kamuktaindet ne Toroor! Amu nee si imutu pichu kolong'une Jordan, igoochech eunegap Amorik kelusye? Kita kaigai kemeny Jordan pitoniin!

⁸ Ee Kiptaiyat, amwae nee anyun ye kagomweune Israel puunikwak!

⁹ Tuun kasei Kanaanik ak tugul che menyei emet agobo kiito, koyiemech ak kotil kainennyo kobet eng' ng'wony. Tos iite nee kaineng'ung' ne oo?”

¹⁰ Koleenji `Kamuktaindet ne Toroor Joshua, “Ng'eet! Amu nee si ibutyi ng'wony ing'uruuge ko uu ni?

¹¹ Kogoyai Israel tengekto, ee kogobistoe kayomisennyu ne kiga ang'at ak kogoip tuguuk eng' che itabaanatiin, kogochoorso, koberberis ak kogonde ole mi tuguukwak.

¹² Nooto anyun amu nee si ma imuuchi piigap Israel kotononso eng' taitap puunikwak, komweune puunikwak amu kagoek che chubootiin. Ma ami kobootok kogeny ngot ko mong'em eng' kwenung'wong' tuguuchooto itabaanatiin.

¹³ Ng'eet ianyiny piik ak ileenji, Oanyinygei agobo mutai, amu kamwa ko uu ni Kamuktaindet ne Toroor, Kamuktaindetap Israel kole, ‘Mi tuguuk che itabaanatiin kwenung'ung', ee Israel. Memuuchi itonone taitap puuniguk agoi oiste chooto itabaanatiin eng' kwenung'wong'.

¹⁴ Kimutwok karon oriigu kobee pororyosyekwok. Pororyet ne namei Kamuktaindet ne Toroor, koriigu kobeen ortinwekwak. Ak ooreet ne namei Kamuktaindet ne Toroor, koriigu kobeen kooriikwak, ak koot ne kanam `Kamuktaindet ne Toroor, koriigu chiito agenge agenge.

¹⁵ Chii ne kinyoorchin kiit ne itabaanat, kebeelei eng' maat kobooto tuguuk tugul che tinyei amu kobistoe kayomisetap Kamuktaindet ne Toroor, ak amu koyai abusnateet eng' Israel.’ ”

¹⁶ Kong'eet anyun `Joshua karon miising' ak komut Israel koriik kobee pororyosyekwak, ak ki kinam pororyetap Judah.

¹⁷ Ki imut `ineendet ortinwegap Judah koriik ak ki kinam ooreetap Seraik. Ki imut ooreetap Seraik koriik konyonune chiito agenge agenge ak ki kinam Sabdi.

¹⁸ Ki imut koonnyi konyonune chiito agenge agenge ak ki kinam Akan, weeriitap Karmi, weeriitap Sabdi, weeriitap Zerah, ne po pororyetap Judah.

¹⁹ Koleenji Joshua Akan, “Weeriinnyu asaain ale, igoochi toroornatet Kamuktaindet ne Toroor, Kamuktaindetap Israel. Ng'aang'ji ineendet ak imwaiwo nguno kiit ne koiyai, mat iung'ena.”

²⁰ Ki wolji `Akan Joshua koleenji, “Eng' iman ko koayachi chalwok Kamuktaindet ne Toroor, Kamuktaindetap Israel, ak koayai ko uu ni ak ko uu ni.

²¹ Kinga keer eng' tuguuk che ki kiluul ngoryeet ne karaaran ne po Babilon ak shekelisyek pogol aeng' che po fedha, ak thahabu ne nyigiisindanyi ko shekelisyek konom, agase myat anyun ak aip. Ung'ootiin tuguuchooto eng' ng'wony eng' kwenutap emainnyu ak ko tabanu ng'wony fedha eng' tuguuchooto.”

²² Ki iyookto anyun `Joshua piik, ak ki rwai koba emait; ak ogeero kiung'otin eng' emainnyi ak kitabanu fedha ng'wony.

²³ Ki inem eng' kwenutap emait ak koipchi Joshua, ak piigap Israel tugul. Ki inde ng'wony eng' taitap Kamuktaindet ne Toroor.

²⁴ Yeityo konam `Joshua ak Israel tugul Akan weeriitap Zerah kobooto fedha, ngoryeet ak thahabu, weeriikyik, tiibiikyik, tuukyik, sigirokyik, keechiirekyik, emainnyi ak tugul che ki tinyei ak komut koba atebweetap Akor.

²⁵ Ki leenji Joshua, “Amu nee si inyalilech? Inyaliilin Kamuktaindet ne Toroor rani.” Ak kilach Israel tugul ineendet eng' koik; ki peel eng' maat ak kolach eng' koik.

²⁶ Ki iruruuch koik eng' paragunnyi ak mi koichooto agoi ra. Ki istogei anyun nereegek eng' Kamuktaindet ne Toroor. Ki kiguure anyun yooto atebweetap Akor agoi ra.