JOSHUA 6 - BUKUIT NE TILIIL Sireet ne Dutero Kanon

Kenamei Jeriko

¹ Kiga kiger Jeriko kot amu piigap Israel. Ki ma komandoi chii anan kochut oriit.

² Ki mwachi `Kamuktaindet ne Toroor Joshua koleenji, “Keero, kande eung'ung' Jeriko, laitoryandennyi ak murenikyik che po lugeet.

³ Oyiem nganaseet; murenik tugul che po lugeet omuuti nganaseet konyil agenge. Oyae ko uu nooto eng' peetuusyek lo.

⁴ Ngo ip tisiik tisabu igondisyek tisap che po kuinoigap mengichik eng' taitap moinget. Eng' peetuut ne po tisap, omuut nganaseet konyil tisap ak koguut tisiik igondisyek.

⁵ Ye ogas cheetap igoondit ko kagoguut tisiik koek keny, kowaakyo piik tugul waagaat ne oo, ak koluul irimeetap nganaseet kwo ng'wony ak kwo chii age tugul kotogosta kotoorchigei ye kageer.”

⁶ Ki kuur `Joshua weeriitap Nun tisiik koleenji, “Oip moingetap arorutyet, ak ingoip tisiik tisabu igondisyek tisap che po kuinoigap mengichik kondoe moingetap Kamuktaindet ne Toroor.”

⁷ Kong'at piik koleenji, “Oba ak oyiem nganaseet ak ingondoe murenik che ilaachi kariik moingetap Kamuktaindet ne Toroor.”

⁸ Ko uu ye ki mwachi `Joshua piik, ko ki pa tisiik tisabu che ki ibei igondisyek tisap che po kuinoigap mengichik kondo eng' taitap Kamuktaindet ne Toroor, koguutei igondisyek, ak kosubi eng' let moingetap arorutyetap Kamuktaindet ne Toroor.

⁹ Ki indoe murenik che ki ilaachi kariik tisiik che kiguutei igondisyek, ak kosubu piik che kiletu moinget, koguutoti tisiik igondisyek ak kobendi.

¹⁰ Ki ng'at `Joshua piik koleenji, “Amat owaach anan otwegu, anan komang'une ng'olyoo kutiswekwok kot koit peetuut ne aleenjok owaach, owaach anyun.”

¹¹ Ki ip anyun moingetap Kamuktaindet ne Toroor kimuute nganaseet konyil agenge, ak ye ibata, kobwa kemoi nganaseet koruiyo.

¹² Ki ng'eet Joshua karon miising', ak koip tisiik moingetap Kamuktaindet ne Toroor.

¹³ Ki pa ko uu nooto kotugul tisiik tisabu che ki ibei igondisyek tisap che po kuinoigap mengichik kondoe moingetap Kamuktaindet ne Toroor koguutei igondisyek. Ki indoe icheek murenik che ki ilaachi kariik ak ki isup piik che kiletu moingetap Kamuktaindet ne Toroor koguutoti tisiik igondisyek ak kobendi.

¹⁴ Kiyiem nganaseet peetuut ne po aeng' konyil agenge, yeityo koweektagei koba nganaseet; ak ki yai ko uu nooto peetuusyek lo.

¹⁵ Eng' peetuut ne po tisap, kong'eetyo karon miising' ko kairir emet, ak komuut nganaseet konyil tisap. Peetuunooto kityo ne kiyiem nganaseet konyil tisap.

¹⁶ Eng' ne po tisap koguutei tisiik igondisyek, koleenji `Joshua piik, “Owaach anyun amu kagogoonok Kamuktaindet ne Toroor nganasani!

¹⁷ Nganaseet ak tugul che mi oriitinnyi kitabaanjin Kamuktaindet ne Toroor. King'emei kobatee Rahab chepkugoniot ak tugul che mi koonnyi amu kiuny piik che ki kiyogu.

¹⁸ Oriipkei okweeget eng' kiy ne itabaanat si ma ye kaotabaan, kota onam kogeny si oyai nganaseetap Israel koek ne chuboot ak koityi nyalil.

¹⁹ Ago fedhaisyek, thahabu tugul ak tuguuk tugul che po sugunonik ak che po kariik ko kitabaanjin Kamuktaindet ne Toroor, ak keipu chooto kobwa ole kigonoree tuguugap Kamuktaindet ne Toroor.”

²⁰ Ki waakyo piik ak koguut tisiik igondisyek. Kingo kas piik cheetap igoondit, kowaakyo eng' waagaat ne oo. Eng' yooto kogiluul irimeet koobutyi ng'wony ak ki laany piik koba nganaseet oriit. Ki wo chii tugul tai kotoorchigei ye kageerei ak konyaban.

²¹ Kibaree rotwetap chok tugul che ki mi nganaseet kogees: murenik ak kwonyiik, ne ming'in ak ne oos, tany, keechiir ak sigiryo.

²² Ki leenji `Joshua pichooto aeng' che kigaba kosegei emet, “Oba kootap chepkugoniot ak oomutu komong' tugul che mi koonnyi ak tugul che tinyei ko uu ye ki oyosyechi.”

²³ Ki pa ko anyun murenjoto aeng' segeik, ak koomut Rahab komong' kobooto kwandanyi, kamennyi, tupchosyekyik ak tugul che ki tinyei; ki imut komong' saang' tilyonutikyik tugul ak icheek. Ki pa ak kotebee saang'utap nganaseetap Israel.

²⁴ Ye kingobata, kobeel nganaseet kobooto tuguuk tugul che ki mi oriit. Ago tuguugap fedhaisyek, thahabu, tuguuk che po sugunonik ak che po kariik ko ki inde ole kigonoree tuguugap Kamuktaindet ne Toroor.

²⁵ Ki pagaach `Joshua Rahab chepkugoniot kosap, kobooto piigap kootap kwandanyi ak tugul che ki tinyei. Ki meng'iis icheek ak Israel agoi ra amu kiuny piik che kigaiyookto Joshua koba kosegei Jeriko.

²⁶ Ki ng'at `Joshua icheek koyastos kole: “Chuboot eng' taitap Kamuktaindet ne Toroor chii ne ng'eetei koteechei nganasani po Jeriko! Age tugul ne lumei lumeiywondennyi, ko mee taaitanyi, ak age tugul ne lumdoi kurgennyi, ko mee toweennyi.”

²⁷ Ki mi Kamuktaindet ne Toroor kobooto Joshua, ak ki yom emet komugul kalasunennyi.