JOSHUA 5 - BUKUIT NE TILIIL Sireet ne Dutero Kanon

¹ Ye kingo kas laitorinik tugul che po Amorik che ki mi komostap cherongo eng' Jordan, ak laitorinik tugul che po Kanaanik che ki neegitee nyanjetap Mediterenian kole ki yai `Kamuktaindet ne Toroor aineetap Jordan koyaam eng' taitap piigap Israel kot kolandae, kobek mugulelwekwak kot ko mata kong'et nyiganateet eng' icheek amu piigap Israel.

Kimuratani piik eng' Gilgal

² Ki mwachi `Kamuktaindet ne Toroor Joshua eng' peetuusyechooto koleenji, “Yai rotoogap sengwetoik che uueen, ak imuratan kogeny piigap Israel.”

³ Ki yai anyun `Joshua rotoogap sengwetoik ak koyatita piigap Israel eng' tulweetap Kamuratanet.

⁴ Kiit ne ki igoochi Joshua koyatitais ko ni; murenik tugul che ki mang'une Misiri, tugul che ki po lugeet, ko ki pek eng' surkwen eng' ooreet ye kingo kagomong' eng' Misiri.

⁵ Nganda kiga kiyatita piik tugul che kigamong' eng' olooto, ko tugul che ki kisikyi surkwen eng' ooreet ye ki mong'u eng' Misiri ko kitom keyatita.

⁶ Ki pendat piigap Israel kenyiisyek artam eng' surkwen kot kobek pororyet tugul. Ki pek murenigap lugeet che ki mang'une Misiri amu ma kas iit kutitap Kamuktaindet ne Toroor. Kiga koyasyechi `Kamuktaindet ne Toroor icheek kole ma chamjin kogeer emet ne kiga koyasyechi kogoochi kwanisyekwak, emet ne nyiitaat cheego ak komi kumyat eng' chaang'indo.

⁷ Ki imuratan `Joshua lagokwak si kogeer icheek, amu ki tomo kimuratan; ki ma kimuratan eng' ooreet.

⁸ Kingo kagimuratan pororyet tugul, kotebee komoswekwak eng' nganaseet agoi koyam komong'.

⁹ Ki mwachi `Kamuktaindet ne Toroor Joshua koleenji, “Kamilde aistaenok rani teweernatetap Misiri.” Ki kiguure anyun yooto Gilgal agoi ra.

¹⁰ Ki teech piigap Israel emaisyekwak eng' Gilgal, ak koyai paska koskoleny eng' peetuutap taman ak ang'wan ne po arawet eng' warengetap Jeriko.

¹¹ Eng' peetuunooto ne ki isubi paska, ko ki am piigap Israel kesuutigap emet che po kenyiit, magatiinik che ma kinde mermereek ak peek che kagigeel.

¹² Kitilak mana eng' peetuunooto ki iamei kesuutigap emonooto che po kenyiit. Mata konyoor kogeny piigap Israel mana; ki am eng' kenyinooto amitwogigap emetap Kanaan.

Igoortap paska

¹³ Ye ki neegit koit Joshua Jeriko, ko kitabendo ak ki keer kotononi chiito ko katokyigei ineendet kotinyei rotwetap chok eng' eunnyi ne kang'us. Ki wo Joshua ole miitei ineendet ak koteebe koleenji, “Ii nenyo anan ii po puunikyok?”

¹⁴ Kowol chiichooto kole, “Achicha, kaanyo nguno aegu kiptaiyatap lugeet ne po Kamuktaindet ne Toroor.” Ki ing'uruuk Joshua kot koit ng'wony togeennyi kolas ak koleenji, “Imwachini nee otwogindeng'ung', ee kiptaiyandennyu?”

¹⁵ Ki mwachi `kiptaiyat ne po lugeetap Kamuktaindet ne Toroor Joshua koleenji, “Icheru kweoniguk eng' keelyeguk, amu tiliil yo itonone.” Ak ki yai Joshua ko uu nooto.