JOSHUA 21 - BUKUIT NE TILIIL Sireet ne Dutero Kanon

Nganasook che ki kigoochi Lawiik

¹ Kingo pata, kobwa kandoigap kooriigap kwanisyek che po Lawiik koriik ole mi Eleazar tisiindet, Joshua weeriitap Nun ak kandoigap kooriigap kwanisyek che po pororyosyegap piigap Israel.

² Ki ng'alaalji icheek eng' Shiloh eng' emetap Kanaan, koleenji, “Ki ng'at `Kamuktaindet ne Toroor eng' eutap Musa kole kegoonech nganasook kemeny kobooto emotinwekwak ole agete tuuga.

³ Ak ki igoochi `piigap Israel Lawiik eng' porotennywa ko uu ng'atuutyetap Kamuktaindet ne Toroor, nganasochu, kobooto emotinwekwak.”

⁴ King'eyai kurainik, komong' korook che po ooreetap Kohatik. Ki sich lagogap Aron tisiindet che po ooreetap Kohat nganasook taman ak somok kobun pororyetap Judah, pororyetap Simion ak pororyetap Benjamin.

⁵ Ki sich eng' kuraitap lagogap Kohat che ki ng'et nganasook taman eng' ortinwegap pororyosyegap Ephraim, Dan ak eng' kebebertap pororyetap Manasseh.

⁶ Ki sich eng' kurait lagogap Gerson nganasook taman ak somok eng' ortinwegap ooreetap Issakar, Asher, Naphtali ak eng' kebebertap ooreetap pororyetap Manasseh eng' Bashan.

⁷ Ki sich eng' kurait lagogap Merari ko uu ortinwekwak nganasook taman ak aeng' eng' pororyetap Reuben, Gad ak eng' pororyetap Zebulun.

⁸ Ki igoochi anyun eng' kurait `piigap Israel Lawiik nganasochooto kobooto emotinwekwak che kiyagisye ko uu ye ki ng'at `Kamuktaindet ne Toroor eng' eutap Musa.

⁹ Ki igoito eng' pororyetap lagogap Judah ak eng' pororyetap lagogap Simion nganasochu kagimwa eng' yu eng' kainaik:

¹⁰ Ki punji chooto lagogap Aron che po ortinwegap Kohatik che ki po lagogap Lawi: amu ki nenywa kuraitap tai.

¹¹ Ki igoochi Kiriath-arba kwandap Anak (nooto ko Hebron) eng' emetap tuloonook ne po Judah kobooto emotinwekwak che kiyagisye che kiyiem.

¹² Ago ki igoochi Kaleb weeriitap Jepune korotinwegap nganaseet kobunji kobooto kokwotinwekwak.

¹³ Ki igoochi icheek `lagogap Aron tisiindet Hebron kobooto emotinwekyik che kiyagisye, nooto kogi nganaseet ne mwechin rumiindet ak Libna kobooto emotinwekyik che kiyagisye,

¹⁴ ak Jatir kobooto emotinwekyik che kiyagisye, ak Estomoa kobooto emotinwekyik che kiyagisye.

¹⁵ Holon kobooto emotinwekyik che kiyagisye ak Debir kobooto emotinwekyik che kiyagisye,

¹⁶ ak Ain kobooto emotinwekyik che kiyagisye ak Juta kobooto emotinwekyik che kiyagisye, Beth-shemesh ak emotinwekyik. Nganasook sogool eng' pororyosyechuuto aeng'.

¹⁷ Eng' pororyetap Benjamin, ko ki Gibeon kobooto emotinwekyik, Geba kobooto emotinwekyik che kiyagisye,

¹⁸ Anatoth kobooto emotinwekyik che kiyagisye ak Almon kobooto emotinwekyik che kiyagisye. Tugul ko nganasook ang'wan.

¹⁹ Nganasook tugul che po lagogap Aron, tisiik, ko ki taman ak somok kobooto emotinwekwak che kiyagisye.

²⁰ Ak ki sich ortinwegap lagogap Kohat, Lawiik, che icheek che ki ng'et eng' lagogap Kohatik, nganasoogap kurainnywa eng' pororyetap Ephraim.

²¹ Ki igoochi icheek Shekem kobooto emotinwekyik che kiyagisye eng' emetap tuloonook ne po Ephraim, nooto kogi nganaseet ne mwechin rumiindet ak Gezer kobooto emotinwekyik che kiyagisye.

²² Ak Kibasaim kobooto emotinwekyik che kiyagisye ak Beth-horon kobooto emotinwekyik che kiyagisye. Tugul ko nganasook ang'wan.

²³ Eng' pororyetap Dan, ko ki Elteke kobooto emotinwekyik che kiyagisye, Gibeton kobooto emotinwekyik che kiyagisye,

²⁴ Aijalon kobooto emotinwekyik che kiyagisye ak Gat-rimon kobooto emotinwekyik che kiyagisye. Tugul ko nganasook ang'wan.

²⁵ Ak eng' kebebertap pororyetap Manasseh, ko ki Taanak kobooto emotinwekyik che kiyagisye ak Gat-rimon kobooto emotinwekyik che kiyagisye; nganasook aeng'.

²⁶ Nganasook tugul che po ortinwegap lagogap Kohat che ki ng'et ko ki taman kobooto emotinwekwak che kiyagisye.

²⁷ Ki igoochi lagogap Gerson eng' ortinwegap Lawiik eng' kebebertap pororyetap Manasseh, Golan eng' Bashan kobooto emotinwekyik che kiyagisye, nooto kogi nganaseet ne mwechin rumiindet ak Be-estera kobooto emotinwekyik che kiyagisye, chooto ko nganasook aeng'.

²⁸ Eng' pororyetap Issakar ko ki Kision kobooto emotinwekyik che kiyagisye, Daberat kobooto emotinwekyik che kiyagisye,

²⁹ Jarmut kobooto emotinwekyik che kiyagisye ak En-ganim kobooto emotinwekyik che kiyagisye; nganasook ang'wan.

³⁰ Eng' pororyetap Asher, ko ki Misal kobooto emotinwekyik che kiyagisye, Abdon kobooto emotinwekyik che kiyagisye,

³¹ Elkat kobooto emotinwekyik che kiyagisye ak Rehob kobooto emotinwekyik che kiyagisye, chooto ko nganasook ang'wan.

³² Ak eng' pororyetap Naphtali, ko ki Kedesh eng' Galilaya kobooto emotinwekyik che kiyagisye, nooto kogi nganaseet ne mwechin rumiindet, ak Amot-dor kobooto emotinwekyik che kiyagisye, Kartan kobooto emotinwekyik che kiyagisye. Tugul ko nganasook somok.

³³ Nganasook tugul che po Gershonik ko uu ortinwekwak, ko ki taman ak somok kobooto emotinwekwak che kiyagisye.

³⁴ Ki igoochi ortinwegap lagogap Merari che icheek che ki ng'et eng' Lawiik eng' pororyetap Zebulun, Jokneam kobooto emotinwekyik che kiyagisye, Karta kobooto emotinwekyik che kiyagisye,

³⁵ Dimna kobooto emotinwekyik che kiyagisye, Naalal kobooto emotinwekyik che kiyagisye. Chooto ko nganasook ang'wan.

³⁶ Eng' pororyetap Reuben, ko ki Beser kobooto emotinwekyik che kiyagisye, Jahas kobooto emotinwekyik che kiyagisye,

³⁷ Kedemot kobooto emotinwekyik che kiyagisye ak Mepaat kobooto emotinwekyik che kiyagisye. Tugul ko nganasook ang'wan.

³⁸ Eng' pororyetap Gad, ko ki Ramot eng' Gilead kobooto emotinwekyik che kiyagisye, nooto kogi nganaseet ne mwechin rumiindet, Mahanaim kobooto emotinwekyik che kiyagisye,

³⁹ ak Hesbon kobooto emotinwekyik che kiyagisye, Jaser kobooto emotinwekyik che kiyagisye. Tugul ko nganasook ang'wan.

⁴⁰ Chuuto tugul kogi nganasoogap lagogap Merari ko uu ortinwekwak kobooto che ki ng'et eng' ortinwegap Lawiik; ak kurainnywa kogi nganasook taman ak aeng'.

⁴¹ Nganasook tugul che po Lawiik eng' kwenutap emetap piigap Israel kogi nganasook artam ak sisiit kobooto emotinwekwak che kiyagisye.

⁴² Ki tinyei age tugul eng' nganasochuuto emotinwekyik che kiyagisye che kiyiem ak ki uu nooto eng' nganasochuuto tugul.

⁴³ Ki igoochi anyun `Kamuktaindet ne Toroor Israel emet tugul ne ki iyasyechi kwanisyekwak kole tuun igoochin ak ki nam kobunji ak komeny,

⁴⁴ ak ki igoochi `Kamuktaindet ne Toroor icheek kamuung'et eng' komoswek tugul, ko uu tugul che ki iyasyechi kwanisyekwak, ak ma piit chii eng' puunikwak tugul ne ki imuuch kotonon eng' tainnywa. Ki inde `Kamuktaindet ne Toroor puunikwak tugul eunekwak.

⁴⁵ Ki isulda ng'aleek tugul che myach che kiga komwachi `Kamuktaindet ne Toroor kootap Israel, ma pet ng'olyoo agot agenge ne myee.