JOSHUA 20 - BUKUIT NE TILIIL Sireet ne Dutero Kanon

Nganasook che kimwechin

¹ Ki ng'alaalji `Kamuktaindet ne Toroor Joshua koleenji,

² Mwachi piigap Israel leenjin, “Otabaan nganasook che kimwechin, ko uu ye ki amwachi Musa.

³ Mwechin rumiindet age tugul ne kalel ko manai ak koek eng' okweek ole kimwechin keungei ineendet ne yaaktoi korotiik.

⁴ Mwechin `rumindonooto age eng' nganasochooto yeityo kotonon eng' kurgeetap nganaseet ak komwa ng'aleekyik kogas poisyegap nganasanooto. Ye ibata, komut kwo nganaseet oriit ak kogoochi ui ak komeny eng' kwenunnywa.

⁵ Ngot koon ineendet ne yaaktoi korotiik koma igoitoi poisyek rumindonooto kwo eunekyik, amu ki par chiitap kokwennyi eng' lelet ak ki ma kowechei ineendet eng' tai.

⁶ Myee anyun komeny nganasanooto agoi kwo kotonon eng' taitap tuiyet si kirwookyi. Menye olooto kot kome tisiindet ne oo ne mi eng' peetuusyechooto. Ye me tisiindonooto, koweektagei anyun rumindonooto kwo nganasennyi ne kimweune agoi koonnyi.”

⁷ Amu nooto anyun, ko ki itabaan Kedesh eng' Galilaya eng' emetap tuloonook ne po Naphtali, Shekem eng' emetap tuloonook ne po Ephraim ak Kiriath-arba (nooto ko Hebron) eng' emetap tuloonook ne po Judah.

⁸ Eng' Jordan pitoniin eng' Jeriko ne tokyingei kong'asiis, ko ki itabaan Beser eng' surkwen eng' warengetap pororyetap Reuben, Ramot eng' Gilead eng' pororyetap Gad ak Golan eng' Bashan eng' pororyetap Manasseh.

⁹ Chuuto kogi nganasook che ki kitabaanji lagok tugul che po Israel ak che po punootyot ne menyei kwenunnywa. Ki kiitabaan keele si komwechi olooto chii age tugul ne kabar chii ama nai si ma me eng' eutap ne yaaktoi korotiik kot kotonon eng' taitap tuiyet.