JOSHUA 2 - BUKUIT NE TILIIL Sireet ne Dutero Kanon

Kiyooktoi segeik koba Jeriko

¹ Ki iyookto Joshua weeriitap Nun piik aeng' eng' Shitim koba eng' ung'oot kosegei emet. Ki ng'at icheek koleenji, “Oba ogeer emet komugul, miising' ko Jeriko.” Ki pa anyun icheek ak ki it kootap chepkugoniot ne kigainennyi ko Rahab ak koruiyo yooto.

² Ki kimwachi laitoryatap Jeriko keleenji, “Keero, kait emoni kemouni piigap Israel, kobwa kosegei emet.”

³ Ki iyookto `laitoryat piik koba koleenji Rahab “Imong'u kobwa saang' pichoo ko kabwa koong'ung', amu kobwa si kosegei emet komugul.”

⁴ Ago ki imut kwonyooto pichooto aeng' kouny yeityo kole, “Ee, kobwanjo iman pichooto, ago komaanai ole kobunu.

⁵ Kongoimen, ko kait sait ne kigeree ormariichet, ko komanda pichooto. Ole koba pichooto ko mangen, osup ochakte, amu omuuchi onam.”

⁶ Kiga komut `ineendet icheek koba koot parak ak kotuge mobegap mabuteek che kiga kotet komyee eng' koot.

⁷ Ki pa anyun pichooto koosup icheek eng' ooreet kotokyigei Jordan kot koit tabarwek ole kilandoe. Ak ne matyanit ko kata kobendi pichooto ki isubi icheek, keger ormariichet.

⁸ Ye kitom koruiyo segeik, kotogosta kwonyooto kwo ole mi icheek eng' koot parak,

⁹ ak koleenji, “Angen ale ki koonok Kamuktaindet ne Toroor emoni, ak ki koityech arageneet agobo okweek, ak komeyo mugulelwegap meng'iigap emoni tugul eng' taing'wong'.

¹⁰ Kigegas ole ki iyaamnda `Kamuktaindet ne Toroor Araraita ne Piriir eng' taing'wong' ye ki obwane obunu Misiri, ak kiit ne ki oite laitorinik aeng' che po Amorik, icheeget Sihon ak Og che ki mi Jordan pitoniin che ki obar ogesu.

¹¹ Ye ki ngegas agobo nooto, kogimeiyo mugulelwekyok ak ki mata komi nyiganateet eng' chii age tugul amu okweek. Kamuktaindet ne Toroor Kamuktaindeng'wong' ko iman Kamuktaindet eng' parak kipsengwet ak eng' ng'wony.

¹² Asaok nguno ale, oyosyeiwo eng' Kamuktaindet ne Toroor, ko uu ye kayaiywok ne myee ko tuun oyachi ne myee ak okweek kootap abba. Ogoono kaboorunet ne po iman,

¹³ amat obar kwandanyu ak kamennyu, tupchosyekyuk che weeriik ak che tiibiik kobooto tuguukwak tugul, ak osaru saboonwekyok eng' meet.”

¹⁴ Koleenji `pichooto ineendet, “Igeeri saboonwekwok saboonwekyok! Ngot ko mong'ande poisyoninyo, ko ye tuun koonech Kamuktaindet ne Toroor emet, keyaun ne myee ak ne po iman.”

¹⁵ Ki choortae anyun icheek rogoet kobun tirisyet. Amu ki mi koonnyi irimeetap nganaseet parak ak ki menyei irimonooto parak.

¹⁶ Ki leenji icheek, “Oba tulweet si ma nyoorwok piik che cheeng'otok. Ounygei eng' yooto peetuusyek somok agoi koweek piik che cheeng'otok. Ye ibata obe anyun pandang'wong'.”

¹⁷ Ki leenji `pichooto ineendet, “Manamech ng'oogistap kayasyoning'ung' ni kesimjech kiyasyeun.

¹⁸ Keero, ye ki itu emoni iratyi porowoni piriir tirisyet ne kechoortaenech, ak iyum kobwa koong'ung' kwandang'ung' kamenng'ung', tupchosyeguk ak piiguk tugul che po kootap kwandang'ung'.

¹⁹ Ngomanda chii age tugul eng' kurgeetap koong'ung' kwo ooreet, kotebee korotiikyik metinnyi, ak ma namech ng'oogisto. Ago ngot kotwa chii eng' acheek chii age tugul ne mi kobooten eng' ko, kotebee korotiikyik metowekyok.

²⁰ Ago ngot ing'ande poisyoninyo koma namech ng'oogistap kayosyeng'ung' ne kesimjech kiyasyeun.”

²¹ Kowol ineendet, “Ingoyaak ko uu ng'aleekwok.” Ak kiunda koba ak koba icheek pandanywa. Ak kiratyi anyun porowet ne piriir tirisyet.

²² Ki pa anyun pichooto agoi tulweet ak kotebee olooto peetuusyek somok, agoi koweek pichooto ki isuubi icheek. Ki cheeng'at pichooto ki isubi icheek eng' ooreet tugul ago ma nyoor.

²³ Ki week anyun pichooto aeng'u kochoorgei eng' tulweet. Ki pa kolanda, koba kot koit ole mi Joshua weeriitap Nun; ak ki mwachi ineendet tuguuk tugul che kagoityi icheek.

²⁴ Ak ki leenji `pichooto Joshua, “Iman ki konde Kamuktaindet ne Toroor emet tugul eunekyok, ak ko ne siirei nooto, kobegu kowoi piigap emonooto eng' tainnyo.”