JOSHUA 19 - BUKUIT NE TILIIL Sireet ne Dutero Kanon

Kooretap ortinwek alak

¹ Ki mong' parparyatap aeng' kobutyi pororyetap lagogap Simion ko uu ortinwekwak. Ki imii porotennywa kwenutap poroteetap lagogap Judah.

² Kigebeberta ne po porotennywa Beer-sheba, Sheba, Molada,

³ Hasarsual, Bala, Esem,

⁴ Eltolat, Betul, Horma,

⁵ Ziklag, Beth-markabot, Hasar-susa,

⁶ Beth-lebaot ak Saruen. Tugul kogi nganasook taman ak somok kobooto kokwotinwekwak.

⁷ Ain, Rimon, Eter ak Asan, nganasook ang'wan kobooto kokwotinwek,

⁸ ak kokwotinwek tugul che ki yiem nganasochuuto agoi Balat-Beer, Ramah ne po murot tai. Ki poroteet ne po pororyetap lagogap Simion ko uu ortinwekwak.

⁹ Ki pun poroteetap lagogap Simion kebeberta ne po lagogap Judah; ki amu ki oo kebeberta ne po Judah kosiir, ko ki sich anyun lagogap Simion poroteet eng' kwenutap porotennywa.

Kooretap Zebulun

¹⁰ Ki mong' parparyatap somok kobutyi lagogap Zebulun ko uu ortinwekwak. Kiwotetap porotennywa kogiwo agoi Sarid,

¹¹ ak kotogosta kotokyigei cherongo kot koit Marala ak kotiny Dabeset, yeityo kwo agoi kotiny aineet ne mi taitap Jokneam.

¹² Kong'eetee Sarid, koweek kotokyigei kong'asiis ak kwo kot koit kiwotetap Kislot-tabor. Kimong'ji Daberat ak kotogosta kwo Japia.

¹³ Kisiirto kong'etee yooto kotokyigei kong'asiis kwo Get-eper agoi Et-kasin, ak ki wo kot koit Rimon ak komurok kotokyigei Nea.

¹⁴ Kiyiemak kiwoteet eng' murot kaataam kwo Hannathon ak kobekyi atebweetap Ipta-el,

¹⁵ Katat, Naalal, Simron, Idala ak Bethlehem; nganasook taman ak aeng' kobooto kokwotinwekwak.

¹⁶ Ni ko poroteetap lagogap Zebulun ko uu ortinwekwak; nganasochu kobooto kokwotinwekwak.

Kooretap Issakar

¹⁷ Ki mong' parparyatap ang'wan ne po lagogap Issakar ko uu ortinwekwak.

¹⁸ Ki it kiwotennywa Jezreel, Kesulot, Sunem,

¹⁹ Aparaim, Shion, Anaarat,

²⁰ Rabit, Kision, Ebes,

²¹ Remet, En-ganim, En-hada agoi Beth-pases.

²² Kitiiny kora kiwoteet Tabor, Saasuma ak Beth-shemesh, ak komong'ji Jordan; nganasook taman ak lo kobooto kokwotinwekwak.

²³ Ni ko poroteet ne po pororyetap lagogap Issakar ko uu ortinwekwak; kokwatinwek kobooto nganasookwak che mengeechen.

Kooretap Asher

²⁴ Ki mong' paraparyatap muut kobutyi pororyetap lagogap Asher ko uu ortinwekwak.

²⁵ Ki kiwotennywa Helkat, Ali, Beten, Aksap,

²⁶ Alamelek, Amad ak Misal ak eng' cherongo ko tiiny Karmel ak Sihor-libnat.

²⁷ Kong'eetee yooto koweek kotokyigei kong'asiis ak kwo agoi Beth-dagon, ak ko tiiny Zebulun, atebweetap Ipta-el ak kotokyigei murot kaataam kwo Beth-emek ak Neiel, yetyo komong'ji Kabul eng' murot kaataam,

²⁸ ak Hebron, Rehob, Haman ak Kanah agoi koit Sidon ne oo.

²⁹ Eng' yooto koweegak kiwoteet kwo Ramah ak koit nganaseetap Tyro ne ki king'ot, yeityo koweek kwo Hosah ak kobekyi nyanjetap Mediterenian eng' emetap Aksip,

³⁰ Uma, Apek ak Rehob. Ki nganasook tiptem ak aeng' kobooto kokwotinwekwak.

³¹ Ni ko poroteet ne po pororyetap lagogap Asher ko uu ortinwekwak; nganasochu ak kokwotinwekwak.

Kooretap Naphtali

³² Ki mong' parparyat ne po lo kobutyi lagogap Naphtali ko uu ortinwekwak.

³³ King'eete kiwotennywa Helep, eng' keetit ne ki mi Saananim, Adaminekeb ak Jabneel agoi Lakum ak komong'ji Jordan.

³⁴ Eng' yooto koweek kiwoteet kotokyigei cherongo kwo Asnot-tabor, Hukok ak kwo kotiiny Zebulun eng' murot tai ak Asher eng' cherongo, ak Judah eng' kong'asi, eng' Jordan.

³⁵ Nganasook che kiga king'ot ko Sidim, Ser, Amat, Rakat, Kineret,

³⁶ Adama, Ramah, Hasor,

³⁷ Kedesh, Edrei, En-hasor,

³⁸ Iron, Migdal-el, Horem, Beth-anat ak Beth-shemesh; nganasook taman ak sogool kobooto kokwotinwekwak.

³⁹ Ni ko poroteet ne po pororyetap lagogap Naphtali ko uu ortinwekwak; nganasook kobooto kokwotinwekwak.

Kooretap Dan

⁴⁰ Ki mong' parparyat ne po tisap kobutyi pororyetap lagogap Dan ko uu ortinwekwak.

⁴¹ Kiwotetap porotennywa ko ki Sora, Estaol, Ir-semes,

⁴² Saalabin, Aijalon, Itla,

⁴³ Elon, Timnah, Ekron,

⁴⁴ Elteke, Gibeton, Baalat,

⁴⁵ Jeud, Bene-berak, Gat-rimon,

⁴⁶ Mejarkon ak Rakon, kobooto kiwoteet ne tokyingei Joppa.

⁴⁷ Ye ki ngerebee koreet lagogap Dan, koba kotogosta kobargei ak Lesem. Ki iluul ak kobar icheek eng' rotwetap chok, ak konam emet kobunji, yeityo komeny olooto ak koguure Lesem ak Dan koguurtoe kainetap Dan kwandanywa.

⁴⁸ Ni ko poroteet ne po pororyetap Dan ko uu ortinwekwak; nganasochu ak kokwotinwekwak.

Poroteetap Joshua

⁴⁹ Kingo kes anyun kopchee takwegap emet ko porotosyek, kogoochi `piigap Israel Joshua weeriitap Nun poroteet eng' kwenunnywa.

⁵⁰ Ki igoochi nganaseetap Timnatsera eng' emetap tuloonook ne po Ephraim ne kigasoom ko uu ng'atuutyetap Kamuktaindet ne Toroor, ak ki teech nganasanato ak komeny.

⁵¹ Chu porotosyek che kipchei eng' parbarek tisiindet Eleazar ak Joshua weeriitap Nun kobooto che eecheen eng' kooriigap kwanisyek che po pororyosyegap piigap Israel. Kipchei eng' Shiloh koek poroteet eng' taitap Kamuktaindet ne Toroor eng' kurgeetap emait ne kituiyechin. Ki iges anyun pcheetap emet.