JOSHUA 14 - BUKUIT NE TILIIL Sireet ne Dutero Kanon

Kepchee kooret ne mi cherongo ne po Jordan

¹ Chu ko porotosyek che kinyoor piigap Israel eng' emetap Kanaan che kipchechi icheek `Eleazar tisiindet, ak Joshua weeriitap Nun kobooto kandoigap kooriik che po pororyosyegap piigap Israel.

² Ki pchei kosube parbareegap porotennywa ko uu ye ki ng'at `Kamuktaindet ne Toroor Musa agobo pororyosyechooto sogool ak kebeberyat.

³ Kiga kogoochi `Musa poroteet pororyosyechooto aeng' ak kebeberyat eng' Jordan pitoniin. Ma igoochi `Lawiik poroteet age tugul eng' kwenunnywa.

⁴ Ki pororyosyek aeng' lagogap Joseph, chooto ko ki Manasseh ak Ephraim. Ma kigoochi Lawiik kebeberta eng' emonooto kobatee nganasook che ki meny kobooto korotinwek che agete kiyaagikwak.

⁵ Kipchei emet piigap Israel ko uu ye ki kang'at `Kamuktaindet ne Toroor Musa.

Kigoochin Kaleb nganaseetap Hebron

⁶ Ki riikta piigap Judah ole ki mi Joshua eng' Gilgal. Ki mwachi `Kaleb weeriitap Jepune Kenisindet ineendet koleenji, “Ingen kiit ne ki mwa `Kamuktaindet ne Toroor komwachi Musa chiitap Kamuktaindet agobo anee ak inyee eng' Kadesh-barnea.

⁷ Ki abo kenyiisyek artam ye ki iyookwo `Musa otwogindetap Kamuktaindet ne Toroor eng' Kadesh-barnea anyo asegei emet. Ki aipchi ineendet ng'olyoot ko uu ye ki mi muguleldanyu.

⁸ Ki igoochi tupchosyekyuk che ki kitogostoi tugul mugulelwegap piik komeiyo, ago ki asup Kamuktaindet ne Toroor Kamuktaindennyu eng' kagesunatetapkei.

⁹ Ki iyasyo anyun Musa peetuunooto kole, ‘Egu poroteng'ung' ak ko punjin inyee ak lagoguk koigeny emet ne ka tyech keelyeguk amu ki isup Kamuktaindet ne Toroor Kamuktaindennyu eng' kagesunatetapkei.’

¹⁰ Ko uu nooto anyun, ko ki koriibo Kamuktaindet ne Toroor asap ko uu ye ki mwa. Kenyiisyek artam ak muut kobooch peetuut ne ki mwachi `Kamuktaindet ne Toroor Musa ng'olyoondoni, ye kingo ta kobendoti Israel eng' surkwen ak ang'ni nguno atinye kenyiisyek tamanwogik sisiit ak muut!

¹¹ Ta atinye kimnateet rani ko uu eng' atkinye koyooktaa Musa. Kiit ne ki uu kimnateennyu eng' peetuunooto, ko uu nooto kimnateennyu nguno, ta amuuchi awo lugeet ak aweege.

¹² Ara anyun, konoo tulwooni ki kamwa Kamuktaindet ne Toroor eng' peetuunooto. Ki igas eng' peetuunooto ile ki mi Anagik olooto ak nganasook che eecheen che ng'ootaatiin. Imuuch komi Kamuktaindet ne Toroor kobooto, si aoon koba ko uu ye ki mwa ineendet.”

¹³ Ki iberuur `Joshua ineendet ak kogoochi Kaleb weeriitap Jepune Hebron koek porotennyi.

¹⁴ Ki ek anyun `Hebron poroteetap Kaleb weeriitap Jepune Kenisindet agoi ra, amu ki isup Kamuktaindet ne Toroor, Kamuktaindetap Israel eng' kagesunatetapkei.

¹⁵ Kainetap Hebron eng' tai ko ki Kiriath-arba. Ki chiito ne oo Arba kosiir tugul eng' Anagik. Ki imuuny emet eng' lugeet.