JOSHUA 13 - BUKUIT NE TILIIL Sireet ne Dutero Kanon

Kebeberwegap emet che kitom kenam

¹ Kiga koosit Joshua amu kiga kotar kenyiisyek che chaang'. Ak ki mwachi `Kamuktaindet ne Toroor koleenji, “Kaiositu ak itinye kenyiisyek che chaang', ago ta kong'etunot emet ne oo ne nyolu kenam.

² Ni emet ne ta ko ng'etunot: komoswek tugul che po Philistiik ak che po Gesurik,

³ kiityin keele po `Kanaanik koroniito kobooch Sihor ne mi murot tai ne po Misiri, kot koit kiwotetap Ekron eng' murot kaataam. Ki po kiptainik muut che po Philistiik: Gasaik, Asdodik, Askelonik, Gitik, Ekronik ak Abik,

⁴ eng' murot tai, emet tugul ne po Kanaanik, Meara ne po Sidonik, kot koit Apek, agoi kiwotetap Amorik,

⁵ ak emetap Gebalik, Lebanon tugul, ne tokyingei ole charunee asiista, kobooch Baal-gad eng' tulweetap Hermon keel kot koit ole kimandoe kebendi Lebo-hamath.

⁶ Piik tugul che menyei emetap tuloonook kong'etee Lebanon kot koit Misrepotmaim agot Sidonik tugul, aoone icheek koba eng' taitap piigap Israel. Ago igoochi emoni Israel koek porotennywa ko uu ye ki ang'atiin.

⁷ Pchechi anyun pororyosyechuuto sogool ak kebebertap eng' che po Manasseh.”

Poroteetap ortinwek aeng' che po Israel

⁸ Ki sich porotennywa piigap Reuben ak che po Gad kobooto ne kigaigoochi Musa eng' Jordan pitoniin tokyingei kong'asiis, ko uu ye ki igoochi `icheek Musa otwogindetap Kamuktaindet ne Toroor:

⁹ kobooch Aroer, ne mi tabandap atebweetap Arnon, ak nganaseet ne mi kwenutap atebwonooto ak warenget tugul ne po Medeba agoi Dibon,

¹⁰ nganasook tugul che po Sihon laitoryatap Amorik, ne ki laitorani eng' Hesbon, agoi kiwotetap lagogap Ammon,

¹¹ Gilead ak kiwotetap Gesurik ak Maakatik ak tulweet tugul ne po Hermon ak Bashan tugul agoi Saleka,

¹² laitornatet tugul ne po Og eng' Bashan, ne ki laitorani eng' Astarot ak Edrei (ineendet ko agenge eng' Repaik che ki ng'et); kiga kobar chuuto `Musa ak koon.

¹³ Ago maon piigap Israel Gesurik anan ko Maakatik. Ki meny Gesurik ak Maakatik kwenutap Israel agoi ra.

¹⁴ Pororyetap Lawiik kityo ne ma igoochi poroteet, amu porotennywa kagoochinoigap Kamuktaindet ne Toroor, Kamuktaindetap Israel, che kigoitoi kobun maat ko uu ye ki mwachi ineendet.

¹⁵ Ki igoochi `Musa pororyetap lagogap Reuben ko uu ortinwekwak.

¹⁶ Ki pooch kiwotennywa Aroer ne mi tabandap atebweetap Arnon ak nganaseet ne mi kwenutap atebweet kobooto warenget tugul ne neegitee Medeba

¹⁷ ak Hesbon ak nganasookyik tugul che mi warenget; Dibon ak Bamotbaal ak Beth-baal-meon,

¹⁸ ak Jahas, Kedemot, Mepaat,

¹⁹ Kiriataim, Sibma ak Seret-sahar eng' tulweetap atebweet,

²⁰ Beth-peor, chepkeigeusyegap Piska ak Beth-Jesimoth;

²¹ Nganasook tugul che po warenget, laitornatet tugul ne po Sihon laitoryatap Amorik, ne ki laitorani eng' Hesbon ne ki par `Musa kobooto kirwoogigap Midian ak Ebi, Rekem, Sur, Hur ak Reba pounigap Sihon che ki menyei emonooto.

²² Ki par `piigap Israel Balaam agine weeriitap Beor orgoiyot eng' rotwetap chok.

²³ Kiwotetap lagogap Reuben ko ki Jordan ak tabandanyi. Niito poroteetap lagogap Reuben ko uu ortinwekwak, nganasookwak che eecheen ak che mengeechen.

²⁴ Ki igoochi `Musa pororyetap Gad, ko uu ortinwekwak.

²⁵ Kiwotennywa ko ki Jaser, nganasook tugul che po Gilead ak kebebertap emetap lagogap Ammon, agoi Aroer ne mi taitap Rabbah,

²⁶ kobooch Hesbon kot koit Ramat-mispe ak Betonim. Kobooch Mahanaim kot koit kiwotetap Debir,

²⁷ ak eng' atebweet, Beth-aram, Beth-nimra ak Sukoth kobooto Sapon nooto ne ki ng'et eng' laitornatetap Sihon laitoryatap Hesbon ne ki Jordan kiwotennyi kot koit ole pooch tabandap araraita ne po Kineret Jordan pitoniin ole tokyingei kong'asiis.

²⁸ Niito ko poroteetap lagogap Gad ko uu ortinwekwak, nganasookwak che eecheen ak che mengeechen.

²⁹ Ki igoochi `Musa kebebertap pororyetap Manasseh poroteet. Ki punji icheek kebebertap pororyetap Manasseh ko uu ortinwekwak.

³⁰ Kiboch kiwotennywa Mahanaim, Bashan tugul, laitornatet tugul ne po Og laitoryatap Bashan ak nganasook tugul che po Jair che mi Bashan, nganasook che eecheen tamanwogik lo.

³¹ Kibooto kebebertap Gilead, Astarot, Edrei, nganasook che eecheen che po laitornatetap Og eng' Bashan. Ki punji chuuto lagogap Makir weeriitap Manasseh kebebertap lagogap Makir ko uu ortinwekwak.

³² Chuuto ko porotosyek che kipchei `Musa eng' warengosyegap Moab Jordan pitoniin eng' Jeriko ne tokyingei kong'asiis.

³³ Ago ma igoochi `Musa pororyetap Lawiik poroteet age tugul. Kamuktaindet ne Toroor, Kamuktaindetap Israel, ko porotennywa ko uu ye ki kamwachi icheek.