JOSHUA 11 - BUKUIT NE TILIIL Sireet ne Dutero Kanon

Kiterteeri laitorinik alak

¹ Ye kingo kas Jabin laitoryatap Hasor agobo niito, koyookto ng'olyoo kwo kap Jobap laitoryatap Madon, kap laitoryatap Simron, kap laitoryatap Aksap,

² ak koyookto kwo kap laitorinik che ki mi murot kaataam ne po emetap tuloonook, ak eng' Arabah murot tai ne po Kinnereth, ak eng' warenget kobooto che ki mi Napoth-dor eng' cherongo.

³ Ki iyookyi ng'olyoo kora Kanaanik eng' kong'asiis, ak eng' cherongo kobooto Amorik, Hitik, Perisik, Jebusik eng' emetap tuloonook ak Hibik eng' Hermon keel eng' emetap Mispa.

⁴ Ki pwa komong' anyun icheeget ak lugosyekwak tugul. King'iisyat icheek kobooto paraisisyekwak ak kariisyek ko uu ng'aniek che mi ngeguutap nyanjet eng' chaang'indo.

⁵ Ki tuiyo laitorinichuuto tugul ak kobwa koteech komosta agenge eng' ye neegitee peegap Merom si kobargei ak Israel.

⁶ Ki leenji `Kamuktaindet ne Toroor Joshua, “Meiywei icheek, amu mutai ko tee ni asiis agoitoi icheek tugul kebar eng' taitap Israel. Iebe kwarinigap paraisisyekwak ak ibeel kariisyekwak eng' maat.”

⁷ Konyo anyun `Joshua kobooto piikyik tugul che po lugeet eng' ye neegitee peegap Merom ak kobookyi icheek.

⁸ Ak ki inde `Kamuktaindet ne Toroor icheek eunegap Israel, si kobar ak koon kot koit Sidon ne oo ak Misrepot-maim agoi atebweetap Mispe ole tokyingei kong'asiis. Ki par icheek kowong' kot koma ng'et agot agenge.

⁹ Ki yachi `Joshua icheek ko uu ye ki ng'at Kamuktaindet ne Toroor. Ki ep kwarinigap paraisisyekwak yeityo kobeel kariisyekwak eng' maat.

¹⁰ Ki week `Joshua eng' ak konam Hasor ak kobar laitoryandennyi eng' rotwetap chok. Ki ne oo Hasor eng' tai eng' laitornatosyechooto tugul.

¹¹ Ki par piik tugul che ki mi nganasanooto eng' rotwetap chok kobar kogees; ma ng'et agot agenge, ak kobeel Hasor eng' maat.

¹² Ki nam Joshua nganasook tugul che po laitorinichooto ak laitorinikwak tugul; ak kobar kooges icheek eng' rotwetap chok ko uu ye ki kang'at `Musa otwogindetap Kamuktaindet ne Toroor.

¹³ Ago ki ma peel `Israel nganasook che kitonondos eng' tuloonookwak kobatee Hasor kityo ne ki peel Joshua.

¹⁴ Ki ip Israel tuguuk tugul che po nganasochuuto ak kokweri tuuga koek chechwaak. Ki par chii age tugul eng' rotwetap chok, kot kogees icheek, ama pagaakta agot agenge kota ko sabei.

¹⁵ Ko uu ye ki kang'at `Kamuktaindet ne Toroor Musa otwogindennyi, koging'at `Musa Joshua ko uu nooto, ak ki yai `Joshua ko uu nooto. Ma pagaakta kiy age tugul ne ma yai eng' tuguuk tugul che ki ng'at `Kamuktaindet ne Toroor Musa.

Emotinwek che ki nam Joshua

¹⁶ Ki nam anyun Joshua emet komugul: emetap tuloonook, Murot tugul ne po Tai, emet tugul ne po Goshen, warenget, Arabah, emetap tuloonook ne po Israel ak warengetap emonooto.

¹⁷ Ki nam kora kobooch tulweetap Halak ne tokyingei Seir agoi Baal-gad eng' atebweetap Lebanon eng' Hermon keel. Ki nam laitorinikwak tugul, ak kokweerot kobar.

¹⁸ Ki yai Joshua lugeet eng' peetuusyek che chaang' kobooto laitorinichooto.

¹⁹ Ma piit nganaseet agot agenge ne ki yai kaalyeet ak piigap Israel kobatee Hibik che ki menyei Gibeon. Ki nam chooto tugul eng' pooryeet.

²⁰ Ki ng'olyootap Kamuktaindet ne Toroor ne ki iuit mugulelwekwak si kobargei ak Israel eng' lugeet, si kong'em icheek kogees, ak ma kiriree icheek, ago si kobiit kong'em icheek kogees ko uu ye ki kang'at `Kamuktaindet ne Toroor Musa.

²¹ Ki nyo Joshua eng' peetuusyechooto kobar Anagik kowong' eng' emetap tuloonook, ak eng' emotinwegap Hebron, Debir, Anap, eng' emet tugul ne po tuloonoogap Judah ak eng' emet tugul ne po tuloonoogap Israel. Ki par `Joshua icheek kogeskei kobooto nganasookwak.

²² Ma ng'et agot agenge Anagichooto eng' emetap piigap Israel; kobatee king'etune Gaza, Gath ak Ashdod kityo.

²³ Ki nam anyun Joshua emet komugul, ko uu tugul che ki kamwachi `Kamuktaindet ne Toroor Musa. Ki igoochi `Joshua emonooto Israel koek porotennywa ko uu pcheutigap pororyosyekwak. Ki imuuny anyun emet eng' pooryeet.