JOHANA 12 - BUKUIT NE TILIIL Sireet ne Dutero Kanon

Kiili Jeso eng' Bethania

¹ Ak kingo ta komi peetuusyek lo si koit paska konyo Jeso Bethania, ole ki mi Lazaro, ne ki ing'eeti Jeso komong' eng' che ki pek.

² Kichopchi icheek eng' olooto ineendet amitwogik che po lagat: koboisyechi Marta; ago ki mi Lazaro kobooto icheek che ki amisyei ak ineendet.

³ Ki inem anyun Maria mwaita ne nyamdut ne po ratilit agenge, ne po kamanuutyet ne oo, ak koilee keelyegap Jeso, ak kouuse suumeekyik keelyekyik: ak ki nyi koot nyamdutyet ne po mwaata.

⁴ Ago ki le Judas Iskaryot, ne ki agenge ne po kasubikyik, ne kimachei kong'wekta ineendet,

⁵ “Ko amu nee si ma ki aldae mwai dinarisyek pogol somok, si kigoochi kibananook?”

⁶ Ki mwa ni anyun, ma amu ki riiree kibananook; ago amu ki choriin, ak ki tinyei lolet, ak ki ibei tuguuk che mi oriit.

⁷ Kole Jeso, “Omete kogonorchi peetuutap tubeennyu.

⁸ Amu mi kibananook kobootok kotugul; ago ma mi anee ak okweek kotugul.”

Teteet kebar Lazaro

⁹ Ki nai anyun piik che chaang' che po Yahudik kole mi olooto: ak ki pwa, ma agobo Jeso ineegei, ago si kobiit kogeer Lazaro agine, ne kiga kong'eet ineendet eng' che ki pek.

¹⁰ Ago ki irwooch tisiik che eecheen kole kobar Lazaro agine;

¹¹ amu kiitabaangei che chaang' che po Yahudik, koba koyan Jeso amu ineendet.

Taagetap Jeso eng' Jerusalem

¹² Ak eng' peetuut ne ki isubi nooto, ye kingo kas tuiyet ne oo ne po piik che kigabwa igoorto, kogas kole nyoonei Jeso Jerusalem.

¹³ Ki nam anyun mooriik che po sosik, ak koba kotorookta ineendet ak komwa eng' kutit ne oo kole, “Hosanna! Iberuurot ineendet ne nyoonei eng' kainetap Kiptaiyat, nooto Laitoryatap Israel.”

¹⁴ Ak ye kingo kagonyoor Jeso moitap sigiryet, kolaany; ko uu ye ki kisir keele:

¹⁵ “Meiywei, inyee, ee, cheptap Zion. Keero, nyoonei Laitoryandeng'ung', kobunu moitap sigiryet!”

¹⁶ Ki ma iguiyo kasubikyik eng' tai tuguuchuuto: ago kingo kagitoroor Jeso, kobwaat anyun icheek kole ki kisir tuguuchuuto agobo ineendet, ak kiga keyachi ineendet tuguuchuuto.

¹⁷ Kibaoryan anyun tuiyet ne ki mi kobooto ineendet ye kiguurei Lazaro komong' eng' kererit, ak ki ing'eet ineendet eng' che ki pek.

¹⁸ Ki pa anyun tuiyet amu nooto kotorookta ineendet, amu ki kas kole kiga koyai kaboorunoni.

¹⁹ Kimwachigei anyun Pharisaik icheegei kole, “Ogeero, ma oterter eng' kiy: ogeero, kagosup `ineendet piik tugul che po ng'wony.”

Komachei Yunanik kogeer Jeso

²⁰ Ak ki mi Yunanik alage eng' che kigaba kotogosta kosa eng' igoorto.

²¹ Ki pwa chooto anyun ole mi Philipu, ne po Bethsaida ne po Galilaya, ak koteebe ineendet kole, “Kiptaiyat, kimache kegeer Jeso.”

²² Ki nyo Philipu komwachi Andrea: ak ki pwa Andrea ak Philipu komwachi Jeso.

²³ Ak ki wolji Jeso koleenji, “Kait sait, ne kitoroore Weeriitap chii.

²⁴ Amwaiwok, iman, iman, ale, Ngo ma me paiywat ne ibutyin ng'ung'unyek, kotebyei ineegei; ago ngo me, koiyiei che chaang'.

²⁵ Ineendet ne chamei saboondanyi kobeeti; ak ineendet ne wechei saboondanyi eng' ng'wonyuni koriip kot koit saboondap koigeny.

²⁶ Ngo poisyeiwo chii age tugul, ko nyolu kosubota; ak si ole ami, komi olooto agine kiboityondennyu: ngo poisyeiwo chii, koteechei ineendet Kwanda.

Komwaei Jeso agobo meennyi

²⁷ “Nyalili nguno saboondanyu; amwae nee anyun? Tos amwa ale ‘Abba we, sarwo eng' saini?’ Ago ki anyo amu niito si anyoor eng' saini.

²⁸ Abba, itoroor kaineng'ung'.” Ki mong' anyun kutit eng' kipsengwet, kole, “Ki atoroor ak ta atoroori kogeny.”

²⁹ Ki mwa anyun tuiyet ne kitononi eng' olooto kogasei, kole, katul. Kole alak, “Kang'alaalji malaikaiyat.”

³⁰ Kowolji Jeso koleenji, “Kama nyo kutini agobo anee, ago agobo okweek.

³¹ Kabiit nguno kirwoogetap ng'wonyuni: ak kagitoorta anyun nguno ne oo ne po ng'wony komanda.

³² Ak ye kiuita eng' ng'wony, amutyige piik tugul.”

³³ Ago ki mwa ni, koboortoi meet ole meitoi.

³⁴ Ki wolji anyun tuiyet ineendet, koleenji, “Kigegas eng' Ng'atuutik keele tebyei Kristo koigeny. Teptoi ano anyun si imwa ile, kanyool keuito Weeriitap chii? Ng'oo Weerooto po chii?”

³⁵ Koleenji Jeso anyun, “Ta komi lapkeiyet eng' kwenung'wong' eng' peetuusyek che matya. Obendoti ye ta otinye lapkeiyet, si ma namak mesundeito: ak ineendet ne wendoti eng' mesundeito koma naei ole wendi.

³⁶ Ye ta otinye lapkeiyet, oyan lapkeiyet, si kobiit oegu weeriitap lapkeiyet. Ki mwa Jeso tuguuchu, ak kwo koung'egei icheek.”

Terchinetap kayaneet eng' Jeso

³⁷ Ago nga kiga koyai kaboorunoik che chaang' che tee cho eng' tainnywa, koma iyan ineendet.

³⁸ Kiyaak niito si kobiit kosulda ng'olyootap maotyot Isaiah, ne ki mwa, kole, “Kiptaiyat, ki iyan ng'oo ng'aleekyok? Ak kigeng'aang'ji ng'oo eutap Kiptaiyat?”

³⁹ Ma imuuch anyun koyan amu ng'olyoondoniito, amu ki mwa Isaiah kogeny, kole,

⁴⁰ “Ki kotuch `ineendet konyekwak, ak Ki kogoochi ineendet mugulelwekwak kouegitu; si ma keere konyekwak, anan konai eng' mugulelwekwak, ak koweek, ak asoop icheek. ”

⁴¹ Ki mwa tuguuchu Isaiah, amu ki keer toroornatennyi; ak ki ng'alaal agobo ineendet.

⁴² Ago ki iyan ineendet che chaang' agot eng' pounik; ago ma ng'aany ineendet amu Pharisaik, si ma ki oon icheek eng' sinagogit:

⁴³ amu ki chamei kalasunetap piik kosiir kalasunetap Kamuktaindet.

Kuursetap Jeso agobo kiyan ineendet

⁴⁴ Ak ki mwa Jeso eng' kutit ne oo, kole, “Ineendet ne iyana, koma iyana anee, ago iyani ineendet ne ki iyookwo.

⁴⁵ Ak ineendet ne keera kogeerei ineendet ne ki iyookwo.

⁴⁶ Ki anyoo aegu lapkeiyet eng' ng'wony, si ma kotebyei eng' mesundeito chii age tugul ne iyana.

⁴⁷ Ak ngo kas chii age tugul ng'aleekyuk, ama riip, ko marwookyini ineendet: amu ki ma anyoo arwookyi ng'wony, ago ki anyoo asaru ng'wony.

⁴⁸ Ineendet ne eesyoa, ama taachei ng'aleekyuk, kotinyei ne irwookyin: ng'olyoot ne ki amwa, nooto ne irwookyin ineendet eng' peetuutap let.

⁴⁹ Amu ki ma amwae aneege; ago ki koono Kwanda ne ki iyookwo, ng'atuutyet, ne kanyool amwa, ak ne kanyool aamda.

⁵⁰ Ak angen ale saboondap koigeny ng'atuutyennyi: tuguuk che amwae anyun, ko ko uu ye ki mwaiwo Kwanda, amwae ko uu nooto.”