JOEL 1 - BUKUIT NE TILIIL Sireet ne Dutero Kanon

¹ Ki nyoonji `ng'olyootap Kamuktaindet ne Toroor Joel weeriitap Pethuel kole,

Riirek agobo ng'emisyetap chereng'enyinik

² Ogas ng'olyoondoni, okweek poisyek, oep iit, okweek tugul che omenye emet. Tos ki piit niito eng' peetuusyekwok, anan eng' peetuusyegap kwanisyekwok?

³ Omwachi lagokwok agobo niito, ak ingomwachi lagokwok lagokwak, ak komwachi lagokwak ibinda age.

⁴ Ki am chereng'endet che kiituuch munene; ak ki am tinapchet che kiituuch chereng'endet; ak ki am masaek che kiituuch tinapchet.

⁵ Kimaini chu! Ong'eetyee ak oriirye; owaakye, okweek tugul kimain, amu kumik che anyiny che ki istoi eng' kutusweekwok.

⁶ Amu kagobookyi emennyu `pororyet pororyet ne oo ak ko kiim; kelekyik ko kelegap ng'etundo, tinyei kipkermet che po ng'etundo ne koget.

⁷ Kagong'em ketinnyu ne po sabibuk, ak kobach mogoywennyu; ki kobony ak kowiirta; kagoleelagitu mooriikyik.

⁸ Oteeiye ko uu pergeiyat ne iyuegei kuniet agobo manong'otyotap ming'inatennyi.

⁹ Kageisto kagoochinetap peek che ng'ootiin ak kagoochinet ne kieei eng' kootap Kamuktaindet ne Toroor. Riirtos tisiik, kiboitinigap Kamuktaindet ne Toroor.

¹⁰ Kagong'emak mbareet, riirei emet; amu kageng'em peek, kagoyaamyo divaik che leelach, kagorarta mwanik.

¹¹ Olilanse, ee okweek kabotik, oteiye, ee okweek saborigap keetiigap sabibuk, agobo nganuuk ak baale; amu kagong'emak kesisyet.

¹² Kagoyaam keetitap sabibuk, ak kagores mogoywet. Kagoyaam keetitap logoek, kobooto tiiret agine, ak keetit age ne po logoek, ee kagoyaamyo keetiik tugul che po mbar; ee iman, kagores poiboiyet eng' weeriigap piik.

¹³ Ogermenegei kuniok ak oteeiye, okweek tisiik; owaach, okweek kiboitinigap kaptisisyet; obwa, osyep kuniok kemout komugul, okweek kiboitinigap Kamuktaindennyu! Ka kiet kagoochinetap peek che ng'ootiin ak kagoochinet ne kieei eng' kootap Kamuktaindeng'wong'.

¹⁴ Otabaan karugutetapkei, oguur tuiyet ne po kaming'inetapke. Oyum poisyek kobooto piik tugul che menyei emet kobwa kootap Kamuktaindet ne Toroor Kamuktaindeng'wong', ak oriirchi Kamuktaindet ne Toroor.

¹⁵ Pwo amu peetuunooto! Amu kagoriik peetuutap Kamuktaindet ne Toroor, ak nyoonei ko uu ng'emisyet ne punu Ineendet Ne po Kamuktaet.

¹⁶ Tos ma ki isto amitwogik kegeerei, ee, kobooto poiboiyet ak kagasetapkei eng' kootap Kamuktaindennyo?

¹⁷ Nundos kesweek eng' ng'ung'unyekwak; kagong'emogis chogenik, kagebut chogenik; amu kagoyaamyo peek.

¹⁸ Tigendos tyong'ik ne tya! Kaiimgei akwotisyegap tuuga, amu ma mi ole agete; ee, nyalildos akwotisyegap keechiirek.

¹⁹ Ee Kamuktaindet ne Toroor, ariirchinin; amu kagogees maat susweegap surkwen, ak kagolalyo keetiik tugul che po timiin.

²⁰ Ee, isyeng'jinin tyong'igap timiin, amu kagoteenyo kereruusyek ak kagogees maat susweegap surkwen.