JEREMIA 37 - BUKUIT NE TILIIL Sireet ne Dutero Kanon

Koyiemei `puunik Jerusalem

¹ Ak ki laitoran Zedekiah weeriitap Josiah kogeer Konia weeriitap Jehoiakim ne ki ieet Nebukadresar laitoryatap Babilon koek laitoryat eng' emetap Judah.

² Ago ma kas ineendet, anan otwogikyik, anan piigap emet, ng'aleegap Kamuktaindet ne Toroor che kimwaei eng' maotyot Jeremiah.

³ Ak ki iyookto Zedekiah laitoryat Jeukal weeriitap Selemya, ak Zephaniah weeriitap Maaseia tisiindet, koba kapmaotyot Jeremiah, koleenji saiywech anyun Kamuktaindet ne Toroor, Kamuktaindennyo.

⁴ Kinyonei anyun Jeremiah oriit ak komandoi eng' kwenutap piik: amu kitom korat chii ineendet eng' korgoreet.

⁵ Ak ki ibok lugeetap Pharaoh eng' Misiri: ak kingo kagogas Kaldeik che kiga koyiem Jerusalem ng'aleekwak, koba eng' Jerusalem.

⁶ Yeityo konyonji ng'olyootap Kamuktaindet ne Toroor maotyot Jeremiah, koleenji,

⁷ Mwaei Kamuktaindet ne Toroor, Kamuktaindetap Israel, kole: Omwachi ko uu ni laitoryatap Judah, ne kaiyokwok obwa oteepsena, oleenji: Keero, lugeetap Pharaoh, ne kanyo kotoretin, koweeksei kobendi Misiri emennywa.

⁸ Ak kobwa Kaldeik kogeny, ak kobargei ak nganasani; ak koluul, ak kobeel.

⁹ Mwaei Kamuktaindet ne Toroor kole: Amat oberberge, ole, Istoeneige iman Kaldeik: amu ma istogei.

¹⁰ Amu nganda ki obar lugeet komugul ne po Kaldeik che kiboryenok, kot kong'et kityo piik che ki kiguoten eng' icheek, kota kong'eetei chii age tugul eng' emainnyi, ak kobeel nganasani.

Kegerei Jeremiah eng' korgoreet

¹¹ Ak kingo kagotogosta lugeetap Kaldeik koba eng' Jerusalem, amu ki iywei lugeetap Pharaoh,

¹² kwo anyun Jeremiah eng' Jerusalem agoi emetap Benjamin, kwo konam kebebertanyi eng' olooto, eng' kwenutap piik.

¹³ Ak ye kimi ormariichetap Benjamin, ko ki mi agine yooto kiptaiyatap riibiik, ne ki kiguure Irija, weeriitap Selemya, weeriitap Hananiah; ak ki nam maotyot Jeremiah, koleenji iwendi onamegei ak Kaldeik.

¹⁴ Kowolji anyun Jeremiah, koleenji lembech nooto; ma wendi kenamge ak Kaldeik; ago ma kasyi: konam anyun Irija Jeremiah, ak komutyi pounik.

¹⁵ Ak ki nereekyi pounik Jeremiah, ak kobir, ak kotoorchi korgoreet eng' kootap Jonathan siriindet; amu kiga koyai yooto koek korgoreet.

¹⁶ Kingo kagoit Jeremiah kootap keriinget, agoi kooriik che kigerchin piik, ak kingo kagotebee Jeremiah olooto peetuusyek che chaang';

¹⁷ koyookto anyun Zedekiah laitoryat kimut ineendet konyo: ak kiteepse laitoryat ineendet eng' ung'oot eng' koonnyi, koleenji tos mi ng'olyoot age tugul ne punu Kamuktaindet ne Toroor? Ak ki le Jeremiah, Miitei. Ki mwa kogeny kole kindein eutap laitoryatap Babilon.

¹⁸ Ki mwachi kogeny Jeremiah Laitoryat Zedekiah koleenji, ki ayaun tengek nee, anan otwogiguk, anan pichu, kot otoorcha korgoreet?

¹⁹ Mi ano anyun nguno maotikwok che ki maotenwok, koleenjinok, Manyonjinin laitoryatap Babilon obargei, anan kobargei ak emoni?

²⁰ Asaain anyun, ee kiptaiyandennyu laitoryat, ale, kaswa soomennyu; asaain ale ameweekyo kootap Jonathan siriindet, si ma meechi olooto.

²¹ Ki ng'at anyun Zedekiah laitoryat, ak ki kimut Jeremiah kwo seremutap riibiik, ak ki kigoochin magatyat eng' peetuut age tugul kobunu ooreetap piik che peelei magatiinik, agoi kogeskei magatiinik tugul eng' nganaseet. Ki tebi anyun Jeremiah ko uu nooto eng' seremutap riibiik.