ISAIAH 53 - BUKUIT NE TILIIL Sireet ne Dutero Kanon

¹ Ng'oo ne ki iyan ng'aleekyok? Ak ki king'aang'ji ng'oo eutap Kamuktaindet ne Toroor?

² Amu tuun eetu eng' tainnyi ko uu keetit ne ng'arng'ar, ak eetu ko uu tigityot eng' emet ne yaamaat: ma tinyei itoon anan korooronindo; ak ye kigeere ineendet koma mi korooronindo kot kecham.

³ Ki kisas, ak ki eesyo `piik ineendet; chiitap aragenosyek, ne ingen ng'wanindo: ak ki kisas ineendet ko uu chiito ne ung'e piik togoochikwak, ama kiit ineendet keele kiy.

⁴ Ki ip iman ng'waninwekyok, ak kigesen aragenosyekyok: ago ki kiit ineendet keele ki kibir, ki pir Kamuktaindet ak konyaliil.

⁵ Ago ki kitoor agobo pistaosyekyok, ki kiguoten agobo tengekwogikyok: kinyooru kalyennyo eng' pirennyi; ak kisoobenech pirutikyik.

⁶ Ki uu acheek tugul keechiirek che ki kobetyo; kigosup age tugul eng' acheek ooreennyi; ak kigonde `Kamuktaindet ne Toroor ineendet tengekwogikyok acheek tugul.

⁷ Ki kinyalil, ago ki iming'ingei, ma twek; ki igei ineendet aarwetap keechiir ne ki kweryei kwo ole kieng'e, ko uu keechiiryet ne siisei eng' taitap piik che tilei koroorikyik; ee, ma twek.

⁸ Ki kinam eng' suryet ak kirwookyi; ak ng'oo ne ibwaati eng' ibindanyi kole ki kiisto ineendet eng' emetap che saptos: Amu ki kibir agobo pistoetap piikyuk.

⁹ Ak ki yachi ineendet kererit kobooto kiptengegiinik, ago ki kitup eng' meennyi kobooto mogoreek; nganda ki ma yai koroomnateet age tugul, ama mang'une kutinnyi ng'aalseet age tugul.

¹⁰ Ago ki cham Kamuktaindet ne Toroor koguoten ineendet; ki igoochi arageneet; ye tuun iyai saboondanyi koek kagoochinet agobo tengekto, tuun keerei iyotennyi, tuun tesei peetuusyekyik, ak kotesak chametap Kamuktaindet ne Toroor eng' eunnyi.

¹¹ Tuun keerei che pitunee ng'wanindap saboondanyi, ak koyam; tuun iityin otwogindennyu ne po iman, imanda, piik che chaang', eng' naennyi: ak tuun ibei tengekwogikwak.

¹² Apchechini anyun ineendet kebeberta kobooto piik che eecheen, ak kopchei parunenik kobooto piik che kiimeen; amu ki igoito saboondanyi agoi meet, ak ki kiitito pistoik: ago kigesen tengekwogigap piik che chaang', ak ki sa agobo pistoik.